Փաստ ինֆո

Սահմանադրությունն այդ ամբողջը կանոնակարգել է, դուրս եկեք Ազգային ժողով ձեր ծրագրով, և եթե ունեք այդ քվեն՝ ստացեք այն և դարձեք վարչապետ: «Շանթ» հեռուստաընկերությանը տված բացառիկ հարցազրույցում հայտարարել է ՀՀ վարչապետի պաշտոնակատար Կարեն Կարապետյանը՝ մեկնաբանելով ընդդիմության առաջնորդ Նիկոլ Փաշինյանի հայտարարությունները՝ բանակցությունների ժամանակ իմ օրակարգն է, այլ օրակարգ չկա, միակ վարչապետը ես եմ, կամ ոչ մեկը...:

Կարեն Կարապետյանն ընդգծել է՝ մենք խոսում ենք ժողովրդավարության մասին, բազմակարծության մասին, մեկս մյուսին լսելու մասին, հանդուրժողականության մասին, Սահմանադրության, պառլամենտական երկրի մասին. սա մոնոպոլիայի է նման, քաղաքական դաշտի մոնոպոլիայի:

«Բայց մոնոպոլիզացնել՝ ասել, ես եմ միայն վարչապետը, այլ թեկնածու չկա, բանակցությունների ժամանակ ես եմ օրակարգը թելադրում, դու օրակարգի իրավունք չունես, չեմ կարծում, որ մենք ցանկացել ենք այդպիսի հասարակություն ձևավորել»,- ասել է ՀՀ վարչապետի պաշտոնակատարը:

Կարեն Կարապետյանը նշել է, որ իրականում կա ճգնաժամ, կան կուտակված պրոբլեմներ և  հստակ պետք է ընտրել, թե որ ուժն է կամ որ ուժերի համախմբումն է տանելու երկիրը դեպի ավելի լավ ապագա, ինչպիսի ծրագրեր կան: «Մենք անձ պետք է չընտրենք, մենք ծրագիր պետք է ընտրենք, մենք թիմ պետք է ընտրենք, մենք պետք է մեկս մյուսին լսելու ունակություն ունենանք, մենք պետք է հանդուրժողական լինենք»,- ասել է Կարեն Կարապետյանը:

Ըստ ՀՀ վարչապետի պաշտոնակատարի, իրենք չեն թաքցնում, որ ունեն իրենց մեղավորության բաժինը, գուցե և շատ մեծ, որ այս անհանդուրժողական մթնոլորտը կա, այսքան կուտակված սոցիալական խնդիրներ կան: «Բայց մենք այդ վիճակից պետք է դուրս գանք, չգիտեմ, մեկս մյուսի հետ խոսելով, ընդունելով սխալները, լսելով մյուս կարծիքները: Չի կարելի ոչ մի բան մոնոպոլիզացնել, դա լավ բանի չի բերելու»,- եզրափակել է հարցազրույցը Կարեն Կարապետյանը:

Աղբյուր` Փաստինֆո