Փաստ ինֆո

Թուրքիան սիրիական Մանբիջում գործելու է ԱՄՆ-ի հետ համատեղ: Այդ մասին հայտարարել է երկրի արտաքին գործերի նախարար Մեվլութ Չաուշօղլուն, նրա խոսքերը փոխանցել է Reuters-ը:

ԱԳՆ ղեկավարը հավելել է նաև, որ Անկարան մտորում է ԱՄՆ-ից հակաօդային պաշտպանության Patriot համակարգ գնելու «շահավետ առաջարկի» մասին:

Դրանից մեկ օր առաջ ՆԱՏՕ-ի գլխավոր քարտուղար Յենս Ստոլտենբերգը հաղորդել է, որ Թուրքիան համաձայնել է համագործակցել Իտալիայի ու Ֆրանսիայի հետ նրանցից հակաօդային պաշտպանության համակարգերի գնման հարցի շուրջ, ինչպես նաև ԱՄՆ-ի հետ քննարկում է համանման համակարգեր ձեռք բերելու հնարավորությունը:

Հյուսիսատլանտյան դաշինքի մասնակից երկրներից սպառազինության գնման առաջարկներ Թուրքիան սկսել է ստանալ ռուսաստանյան «Տրիումֆ» С-400 զենիթահրթիռային համալիրների առաքման մասին Մոսկվայի ու Անկարայի միջև պայմանագրի կնքումից հետո: Այդ մասին հայտնի էր դարձել 2017թ. սեպտեմբերին:

Ապրիլի սկզբին հաղորդվում էր Հալեպի նահանգի սիրիական Մանբիջից (որը վերահսկվում է ԱՄՆ-ի կողմից աջակցվող Սիրիայի դեմոկրատական ուժերի՝ քրդական ու արաբական խմբավորումների մարտիկների կողմից) դեպի հյուսիս-արևմուտք նոր ամերիկյան ռազմական բազա ստեղծելու մասին:

Թուրքիայի ու ԱՄՆ-ի հարաբերություններն էապես վատթարացել են այս տարվա սկզբին: Անկարան բազմիցս պահանջել է Վաշինգտոնից հեռանալ Հալեպ նահանգի արևելքից, քանի որ թուրքական բանակը ծրագրում է քրդերից անվտանգ դարձնել Սիրիայի հետ իր ամբողջ հարավային սահմանը: Մասնավորապես, կոչ էր հնչում դուրս բերել «ամերիկյան զինվորականներին կամ YPG ահաբեկիչներին» սիրիական Մանբիջից, քանի որ նրանք հարձակվում են թուրքական զինվորների և նրանց օգնող Սիրիական ազատ բանակի անդամների վրա:

Թուրքիան Աֆրինում հունվարի 20-ից անց է կացնում «Ձիթենու ճյուղ» գործողությունը՝ քրդերի կազմավորումների դեմ: Զորքերին օգնում են երկրի կառավարության դեմ պայքար մղող, Սիրիայում զինված խմբավորումների ամենախոշոր միավորումներից մեկի՝ Սիրիական ազատ բանակի գրոհայինները: Անկարան ահաբեկիչների շարքին է դասում Դեմոկրատական միություն (PYD) քրդական կուսակցության և նրա ժողովրդական ինքնապաշտպանության զինված ջոկատների (YPG) ներկայացուցիչներին:

Աղբյուր` Փաստինֆո