Փաստ ինֆո

Նախօրեին ԱԺ ԵԼՔ խմբակցության ղեկավար, «Իմ քայլը» շարժման ղեկավար Նիկոլ Փաշինյանը Հանրապետության հրապարակում նախօրեին տեղի ունեցած հանրահավաքի ժամանակ հայտարարեց, որ այսօրվանից՝ ժամը 12-ից, անց են կացվելու քաղաքացիական անհնազանդության գործողությունները՝ փողոցների ու կամուրջների շրջափակում, գործադուլ, դասադուլ, իսկ ակցիաների սկսվելուց հինգ րոպե անց ընթացքի մեջ գտնվող մեքենաները պետք է քսան րոպեով կանգ առնեն։ 

Այսօր արդեն Փաշինյանը Երևանի փողոցներում երթի դուրս եկած քաղաքացիներին հորդորում է դադարեցնել ճանապարհների փակումը: Ավելին՝ կոչ է անում պահպանել երթեւեկության կանոնները։

«Խնդրում ենք բոլոր համարները տեղադրել, բացել և նոր միայն երթևեկել: Մենք ինչի՞ համար պետք է փակենք մեր դեմքը»,- հայտարարեց Փաշինյանը:

Փաշինյանի նախաձեռնած շարժումը կոչ է անում պահպանել երթևեկության կանոնները, չգերազանցել սահմանված արագությունը, մեքենան վարել պետհամարանիշները բաց՝ առանց ծածկելու կամ հանելու դրանք, մաքուր պահել տարածքը, բաց պահել մարզերից դեպի Երևան եկող ճանապարհները, ժամը 23։00-ից հետո դադարեցնել ազդանշանները:

«Հորդորում ենք բոլորին պահպանել վերը նշված կանոնները, այլապես բոլոր անօրինական քայլերը մեր կողմից կդիտվեն որպես սադրանք։ Ով չի հետևում այս կանոններին, նա չի կարող համարվել մեր շարժման մասնակից»,-նշել են նրանք:

Այլ խոսքով՝ հորդորում է պահպանել հասարակական կարգը, ինչը խախտվել էր հենց նրա իսկ շարժման կոչով։ Հարկ ենք համարում նշել, որ այս օրերին առանց պետհամարանիշների կամ փակված պետհամարանիշներով մայրաքաղաքի փողոցներով մեծ արագությամբ բազմաթիվ ավտոմեքենաներ ենք նկատում, ինչի կապակցությամբ բազմաթիվ հայտարարություններ են տարածվել ոստիկանության կողմից՝ արձանագրելով, որ ավտոմեքենաներով ակցիաներին մասնակցող անձինք, որոնք խախտում են երթևեկության կանոնները, վտանգում են երթևեկության մասնակիցների կյանքն ու առողջությունը, անհարկի ազդանշաններով խախտում համաքաղաքացիների անդորրը: Բայց Նիկոլ Փաշինյանն այն ժամանակ չէր լսում այդ հորդորները, մինչեւ որ ողբերգական վթարը չխլեց մեկ տարեկան երեխայի կյանքը։

Օրեր առաջ Նիկոլ Փաշինյանը պնդում էր, թե քաղաքացիական անհնազանդության գործողությունները՝ փողոցներ, կամուրջներ, որոնք, ի դեպ, ունեն ռազմավարական նշանակություն, պետական շենքեր արգելափակելը իրավախախտումների չեն հանգեցնում եւ տեղավորվում են խաղաղ հավաքների տրամաբանության մեջ։ Իսկ այսօր կոչ է անում չխախտել երթեւեկության կանոնները։

Անօրինականությունների դեմ պայքարող Փաշինյանը, ով վարչապետի պաշտոնին է հավակնում, այսօր արդեն իր գործողություններով ցույց է տալիս, որ կարծես թե չի տարբերվելու, եւ ըստ քաղաքական նպատակահարմարության երթեւեկության կանոնների ակներեւ խախտումները,  որոնք վտանգում են քաղաքացիների կյանքը եւ ստեղծում քաոսային իրավիճակի, կներկայացնի որպես քաղաքացիական անհնազանդություն, բայց հետո՝ հանդես կգա հասարակական կարգի պաշտպանության դիրքերից։

Ասենք զարմանալ պետք չէ։ Հանրահավաքի առաջնորդները պարաբերաբար խոսում են բուհերն ու դպրոցները ապաքաղաքականացնելուց, բայց հենց իրենք պարտադրում, որպեսզի դպրոցականները դասադուլ հայտարարեն եւ մասնակցեն իրենց քաղաքական ակցիաների։

Ասել է թե՝ դպրոցների ապաքաղաքականացում վերաբերում է միայն ՀՀԿ-ին, նրանք չպետք է մասնակցեն ՀՀԿ-ի միջոցառումներին, բայց «Քաղաքացիական պայմանագիր» կուսակցության առաջնորդի հանրահավաքներին՝ այո։

Սակայն գումարելիների տեղափոխությունից գումարը չի փոխվում, իսկ այսօրինակ երկակի չափանիշների կիրառումը որեւէ դրական բանի չի հանգեցնի։

Աղբյուր` Փաստինֆո