Փաստ ինֆո

Ազգային ժողովի ԵԼՔ խմբակցության ղեկավար Նիկոլ Փաշինյանը, ով տարբեր հարթակներից հայտարարություններ էր հնչեցնում, քննադատում ՀՀ տարբեր պաշտոնյաների, որ բարձր պաշտոններ են ստանձնել՝ չծառայելով զինված ուժերում, այսօր ինքն է հավակնում բարձր պաշտոն ստանձնել։

Պարզվում է՝ զինված ուժերում չծառայելը չի խանգարում, որ Նիկոլ Փաշինյանը հավակնի երկրի գերագույն հրամանատարի պաշտոնը ստանձնելուն։ Համենայնդեպս զինված ուժերում նրա ծառայության վերաբերյալ որևէ տեղեկություն չկա ԱԺ կայքում տեղադրված նրա կենսագրական տվյալների մեջ: 

Պատգամավորի կենսագրությունը կներկայացնենք ամբողջությամբ, սակայն հարկ ենք համարում նշել, որ մի մարդ, ով ոչ վաղ անցյալում Պաշտպանության նախարար Վիգեն Սարգսյանին քննադատում էր և պարզաբանումներ էր պահանջում՝ բանակում ծառայելու վերաբերյալ, այսօր, երկրի ղեկավարի պաշտոնն ստանձնելու ցանկությամբ տարված, մոռացել է, որ չի ծառայել:

ՀՀ սահմանադրության 155-րդ հոդվածի համաձայն՝ Զինված ուժերը Կառավարության ենթակայության ներքո են: Զինված ուժերի կիրառման մասին որոշումն ընդունում է Կառավարությունը: Իսկ նույն հոդվածի 4-րդ կետի համաձայն՝ Պատերազմի ժամանակ զինված ուժերի գերագույն հրամանատարը վարչապետն է:

Այսօր Նիկոլ Փաշինյանը հայտարարում է, որ պատրաստ է լինել երկրի վարչապետ, իր նախաձեռնած հանրահավաքների ժամանակ վանկարկվում է «Նիկոլ, վարչապետ», և ինքը չի սաստում, չի ասում՝ հարգելի ժողովուրդ, բանակում չծառայած մարդն ինչպե՞ս կարող է լինել երկրի գլխավոր հրամանատար, այն էլ՝ ռազմաքաղաքական դժվարին պայմաններում գտնվող երկրում։

Գաղտնիք չէ, որ ցանկացած պահի հակառակորդը կարող է ոտնձգություն իրականացնել ՀՀ սահմանների ուղղությամբ, և նման սադրանքներ լինում են բավական հաճախակի: Տվյալ պարագայում ինչպե՞ս է բանակում չծառայած անձը հավակնում զինված ուժերի գերագույն հրամանատարի պաշտոնը ստանձնել։

Հիշեցնենք, որ ԱԺ-ում Նիկոլ Փաշինյանը, խոսքն ուղղելով ՀՀ պաշտպանության նախարարին, հայտարարել էր,որ Վիգեն Սարգսյանի զինվորական ծառայությունն անցել է ոչ թե բանակում, այլ նախկին նախագահի կաբինետում։

Հետաքրքիր է, իսկ որտե՞ղ է անցել Նիկոլ Փաշինյանի ծառայությունը։ Եվ ու՞ր մնաց նրա «սկզբունքայնությունը» և արդյոք նույն պաթոսով նա ԱԺ ամբիոնից, երբ կքննարկվի վարչապետի թեկնածության հարցը, կանդրադառնա՞, թե ինչպես կարող է բանակում չծառայած մարդը լինել պատերազմական վիճակում գտնվող երկրի զինված ուժերի գլխավոր հրամանատար։

Իհարկե հիմա կասեն ՀՀԿ-ական բազմաթիվ պաշտոնյաներ կան, որ չեն ծառայել, գուցեև կան, բայց կարծես թե հենց այդ արատավոր երևույթների դեմ է չէ պայքարը, իսկ եթե միայն գումարելիների տեղափոխություն պետք է լինի, ապա դրանից գումարը չի փոխվի, և որակական փոփոխություններ էլ չեն լինի։

Այսպիսով, Փաշինյանի կենսագրությունը ներկայացնում ենք ամբողջությամբ.

«Ծնվել է 1975թ. հունիսի 1-ին Իջեւանում: 1991թ. ընդունվել եւ 1995թ. լրագրողական գործունեության պատճառով հեռացվել է Երեւանի պետական համալսարանի բանասիրական ֆակուլտետից (ժուռնալիստիկայի բաժին):

1994-1995թթ. եղել է «Լրագիր», «Լրագիր օր», «Մոլորակ» օրաթերթերի լրագրող, 1998-1999թթ.` «Օրագիր» օրաթերթի գլխավոր խմբագիր, 1999-2012թթ.` «Հայկական ժամանակ» օրաթերթի գլխավոր խմբագիր:

2006թ. եղել է «Այլընտրանք» հասարակական-քաղաքական նախաձեռնության հիմնադիր անդամ, 2007թ. ընդգրկվել է «Իմպիչմենտ» դաշինքի համամասնական ցուցակում (1-ին համար): 2008թ. եղել է ՀՀ նախագահի թեկնածու Լեւոն Տեր-Պետրոսյանի նախընտրական շտաբի անդամ: 2015թ. «Քաղաքացիական պայմանագիր» կուսակցության հիմնադիր անդամ է:

2012-2017թթ.՝ ԱԺ պատգամավոր (համամասնական ընտրակարգ, ՀԱԿ): ԱԺ արտաքին հարաբերությունների, ԱԺ տարածքային կառավարման եւ տեղական ինքնակառավարման հարցերի մշտական հանձնաժողովների անդամ: 14.09.2012-07.03.2013թթ.՝ ԱԺ էթիկայի հարցերով ժամանակավոր հանձնաժողովի նախագահ: «Հայ ազգային կոնգրես» խմբակցության անդամ:
2017թ. ապրիլի 2-ին ԱԺ պատգամավոր է ընտրվել «Ելք» կուսակցությունների դաշինքի թիվ 4 ընտրատարածքի տարածքային ընտրական ցուցակով:

Ամուսնացած է, ունի չորս զավակ»:

Աղբյուր` Փաստինֆո