Փաստ ինֆո

Քննչական մարմնի հանձնարարությամբ ոստիկանությունը պարզում է լրագրող Տիրայր Մուրադյանի նկատմամբ բռնություն գործադրած երկու անձանց ինքնությունը: Նրանց ինքնությունը պարզվում է լրագրողի կողմից ներկայացված լուսանկարներով:

«Ապրիլի 20-ին, քննիչը գրավոր հանձնարարություն է տվել ՀՀ ոստիկանության քրեական հետախուզության գլխավոր վարչությանը՝ պարզել Տիրայր Մուրադյանի կողմից ներկայացված լուսանկարներում պատկերված անձանց ինքնությունը և ներկայացնել վարույթն իրականացնող մարմնին՝ կից տրամադրելով լուսանկարները»,- «Փաստինֆո»-ին հայտնեցին ՀՀ քննչական կոմիտեից։

Բացի այդ, հանձնարարվել է պարզել նաև դեպքի վայրում տեսանկարահանող սարքերի առկայությունը, դրանց պատկանելիության վերաբերյալ տվյալները, հիշյալ տարածքում ծառայություն իրականացնող ոստիկանության աշխատակիցների ինքնությունները։

Ըստ քրեական գործի տվյալների՝ «Իրազեկ քաղաքացիների միավորում» հասարակական կազմակերպության լրագրող Տիրայր Մուրադյանը ապրիլի 19-ին՝ ժամը 08:30-ի սահմաններում, որպես լրագրող իր աշխատանքն է կատարել Երևանի Արամի փողոցում տեղակայված ՀՀ կառավարության 3-րդ վարչական շենքի դիմաց։

Լուսանկարներ կատարելիս քաղաքացիական հագուստով երկու անձ հարձակվել են լրագրողի վրա և բռնություն գործադրել։ Լրագրողը մարմնական վնասվածքներով տեղափոխվել է «Սուրբ Գրիգոր Լուսավորիչ» բժշկական կենտրոն և ստացել անհրաժեշտ բուժօգնություն։

Ապրիլի 20-ի որոշմամբ, Տիրայր Մուրադյանը ճանաչվել է տուժող:

Դեպքի առթիվ հարուցվել է քրեական գործ՝ ՀՀ քրեական օրենսգրքի 164-րդ հոդվածի՝ Լրագրողի մասնագիտական օրինական գործունեությանը խոչընդոտելը, 1-ին մասի հատկանիշներով:

Աղբյուր` Փաստինֆո