Փաստ ինֆո

Վաղը ժամը 12.00-ին ընդդեմ Սերժ Սարգսյանի շարժման ղեկավար Նիկոլ Փաշինյանը ՀՀ վարչապետի պաշտոնակատար Կարեն Կարապետյանին հրավիրում է իր հետ բանակցությունների երկրորդ փուլին: Այս մասին այսօրվա հանրահավաքում հայտարարեց շարժման ղեկավարը՝ ընդգծելով, որ բանակցությունները ծայրից ծայր տեղի են ունենալու լրագրողների ներկայությամբ:

«Մենք փակ դռների հետևում չենք բանակցելու, մենք բանակցելու ենք ժողովրդի աչքի առաջ»,- ասաց Ն.Փաշինյանը՝ հավելելով, որ ժողովուրդն է իշխանությունը, ժողովուրդն է շեֆը և իրենք հաշվետու են ժողովրդին ամեն քայլի համար:

Շարժման ղեկավարը նշեց, որ շարժումն ի գիտություն է ընդունել այն, որ ՀՀԿ ժողովն եկել է ընդհանուր հայտարարի ու լիազորել Կարեն Կարապետյանին մասնակցելու այդ բանակցություններին: «Մենք պատրաստակամ ենք շարունակելու գործընթացը մեր առաջարկած օրակարգի շրջանակում»,- ասաց նա:

Նիկոլ Փաշինյանը հայտարարեց, որ վաղն ու մյուս օրն հանրահավաքներ տեղի կունենան՝ համապատասխանաբար՝ Գյումրիում ու Վանաձորում, հանրապետության երկրորդ ու երրորդ քաղաքներ շարժման մասնակիցները կմեկնեն ավտոերթով: Իսկ այդ ընթացքում Երևանում գտնվող շարժման ակտիվիստները հնարավորություն կունենան հանգստանալ, ուժեր հավաքել, եթե հանգստի կարիք ունենան: Ապրիլի 29-ին, 30-ին ու մայիսի 1-ին գործողությունները վերականգնվելու են աննախադեպ թափով, ասաց Նիկոլ Փաշինյանը:

Շարժման ղեկավարը նշեց, որ իրենք ակնկալում են, որ ԱԺ խմբակցությունները կոնսենսուսով կկայացնեն իրենց որոշումը: Խորհրդարանական խմբակցությունները ժողովրդի հաղթանակը անվերապահորեն ու առանց նախապայմանների պետք է ճանաչեն, ժողովրդի հաղթանակը պետք է արձանագրվի նաև դե յուրե: «Խնդիրը ոչ թե իմ վարչապետ դառնալն է, այլ Հայաստանում հաստատված կոռումպացված ու հակաժողովրդական համակարգը վերացնելը»,- ընդգծեց նա՝ արձանագրելով, որ «այս համատեքստում կոռումպացված ու հակաժողովրդական համակարգի հետ որևէ կոմպրոմիս լինել չի կարող»:

Ն.Փաշինյանը հավելեց, որ այս համատեքստում պաշտոններ բաժանելու, գործարքների, ոլորտներ կիսելու որևէ խոսք լինել չի կարող: Նա հայտարարեց, որ «որևէ կուլիսային պայմանավորվածության չենք գնալու» նաև այն պատճառով, որ այս պրոցեսի գործող առանցքը ժողովուրդն է: «Մեր այս ոգեղեն շարժման որևէ արժեք մեկ միլիմետր անգամ չպետք է տուժի»,- ասաց նա:

Նիկոլ Փաշինյանն՝ անդրադառնալով քաղաքացիական անհնազանդության գործողություններին, հայտարարեց, որ Սոթք- Քարվաճառ ճանապարհին որևէ խոչընդոտ չպետք է ստեղծվի դեպի Արցախի Հանրապետություն ռազմական ու քաղաքացիական բեռների համար, նույնը վերաբերվում է Գորիս-Բերձոր հատվածին: Որևէ խոչընդոտ չպետք է լինի նաև շտապօգնության ու արտակարգ իրավիճակների ծառայությունների աշխատանքի համար:

Աղբյուր` Փաստինֆո