Փաստ ինֆո

Կարեն Կարապետյանը մի գործողություն ունի անելու՝ անվերապահորեն ու առանց նախապայմանների ճանաչել ժողովրդական թավշյա ոչ բռնի հեղափոխության հաղթանակը: Այս մասին ընդդեմ Սերժ Սարգսյանի վարչապետության շարժման այսօրվա հանրահավաքում հայտարարեց շարժման ղեկավար, ԱԺ պատգամավոր Նիկոլ Փաշինյանը: Մենք պահանջում ենք Հայաստանի Հանրապետական կուսակցության անվերապահ ու միանշանակ կապիտուլյացիան ժողովրդի առաջ, ասաց նա:

Ն.Փաշինյանն արձանագրեց, որ այն պահից, երբ գործող վարչապետը հրաժարական է տվել, նրա հետ հրաժարական է տալիս ամբողջ կառավարությունը, ուստի այդ պահից չկա կառավարություն:

Կարեն Կարապետյանն իրեն հռչակել է վարչապետի ժամանակավոր պաշտոնակատար, մինչդեռ գործող վարչապետի հրաժարականի պայմաններում չի կարող լինել վարչապետի պաշտոնակատար, այլ լինում է առաջին փոխվարչապետի ժամանակավոր պաշտոնակատար:

Ն.Փաշինյանը հայտնեց, որ Կարեն Կարապետյանը հրավիրել է ուժայիններին ու ասել, որ պետք է արտակարգ դրություն մտցնել: Ես զարմանում եմ այդ մարդու տրամաբանության վրա, ասաց Ն.Փաշինյանը՝ հավելելով, ի՞նչ է Սերժ Սարգսյանը «չէ՞ր ֆայմում, որ կարող է արտակարգ դրություն մտցնել»: «Դու չես կարող արտակարգ դրություն մտցնել, որովետև եթե ստից թուղթ ստորագրես, մենք դա չեղյալ կհամարենք»,- ասաց Ն.Փաշինյանը:

Ըստ շարժման ղեկավարի, լուրեր են տարածվում, որ Կարեն Կարապետյանը Մոսկվայի միջոցով իր հարցերը լուծել է և դառնալու է ՀՀ վարչապետ: «Ես կոչ եմ անում նման սադրիչ հայտարարություններ չտարածել»,- ասաց Ն.Փաշինյանը՝ նշելով, որ Մոսկվայի ներկայացուցիչների հետ հանդիպմանն ինքը հավաստիացում է ստացել, որ Ռուսաստանը չի միջամտում Հայաստանի ներքին գործերին:

Նիկոլ Փաշինյանն անդրադարձավ տարածված այն լուրերին, թե «իբր մենք հրաժարվել ենք Կարեն Կարապետյանի հետ բանակցություններից»: Այն ժամանակ, երբ նշանակված էին բանակցությունները, «մեզ զանգում էին հանրապետական պատգամավորներ, խնդրում հաշվի առնել, որ այդ բանակցություններում Կարեն Կարապետյանն իրենց չի ներկայացնում»,- ասաց Ն.Փաշինյանը, նշելով, որ իրենք առաջարկել են, որպեսզի հակառակ կողմից բանակցություններին մասնակցեն Կարեն Կարապետյանը, ԱԺ նախագահ Արա Բաբլոյանն ու ՀՀԿ խմբակցության ղեկավար Վահրամ Բաղդասարյանը:

«Մենք չենք պատրաստվում ժամավաճառությամբ զբաղվել, պատրաստ ենք բանակցել, բանակցությունները պետք է վերաբերվեն իշխանության խաղաղ ու անցնցում փոխանցմանն և դրա շրջանակում ժամանակավոր կառավարության գործունեության հետ կապված ցանկացած հարցի»,- ասաց շարժման ղեկավարը:

Ն.Փաշինյանը նշեց, որ այս օրերին Կարեն Կարապետյանն իր մոտ է հրավիրել Հայաստանում հավատարմագրված դիվանագետների, ու նրանց ասել, որ «իբր մենք հակասահմանադրական գործողություններ ենք իրականացնում, որ իբր ընտրությունը պետք է Հանրապետության հրապարակում տեղի ունենա»: Նիկոլ Փաշինյանն արձագանքեց այդ հայտարարություններին, նշելով՝ «մենք չենք ասում, որ ընտրությունը պետք է տեղի ունենա հրապարակում, ասում ենք, որ ժողովուրդն ունի թեկնածու, հաշվի նստեք դրա հետ, ու կոնսենսուսով առաջարկեք ու քվեարկությամբ ընտրեք ՀՀ վարչապետ»:

Այսօր ՀՅԴ-ն հայտարարել է, որ դուրս է գալիս ՀՀԿ-ի հետ իշխանական կոալիցիայից, «Ծառուկյան» խմբակցությունն իր աջակցությունն է հայտնել համաժողովրդական շարժմանը, կան բազմաթիվ հանրապետական պատգամավորներ, որոնք պատրաստակամություն են հայտնել քվեարկել վարչապետի ժողովրդի թեկնածուի օգտին, ուստի, նշեց Ն.Փաշինյանը, իրենց բոլոր գործողությունները համապատասխանում են ՀՀ սահմանադրությանն ու օրենքներին: Իսկ Կարեն Կարապետյանի ու նրա թիմին վարչապետի ժողովրդի թեկնածուն խորհուրդ է տալիս դադարեցնել այդ ստահոդ քարոզչությունը:

Կարեն Կարապետյանն ու հրաժարական տված կառավարությունը ՀՀ-ում չունի որևէ իշխանություն և ՀՀ ոստիկապետի հայտարարություններն ուղղակիորեն նշանակում են, որ իրենք հրաժարվում են կատարել Կարեն Կարապետյանի որևէ հրաման ու հրահանգ: Վերջինս վարչապետի պաշտոնակատար չէ ու չունի որևէ լիազորություն հրահանգ տալու ուժային կառույցներին: «Ես շատ ավելի իրավունք ունեմ, քան Կարեն Կարապետյանը»,- ասաց Ն.Փաշինյանը՝ հավելելով, որ եթե ՀՀԿ-ն փորձ անի նույնիսկ թեկնածու առաջադրել, ապա ժողովուրդը կշրջափակի ԱԺ, կառավարության, բոլոր կառավարական շենքերը: «Կարեն Կարապետյանին զգուշացնում եմ այլևս ոտք չդնել որևէ կառավարական շենք»,- ասաց նա:

Շարժման՝ տնտեսությանը վնասելու, գործարարների ահաբեկված լինելու հայտարարությունների առնչությամբ շարժման ղեկավարը նշեց, որ Սերժ Սարգսյանը Հայաստանի Հանրապետությունում է և նրա նկատմամբ որևէ հաշվեհարդար չի եղել: Նա ընդգծեց, որ ժողովրդական հեղափոխության նպատակը վենդետան չէ, այլ օրինականությանը, արդարությանը, ազգային միաբանությանը հասնելը: Որևէ մեկը Հայաստանում ահաբեկված չէ և արմատախիլ է արվել պետական ահաբեկչության որևէ դրսևորում:

Հանրապետականը պետք է ստանձնի իշխանության խաղաղ ու անցնցում փոխանցման պարտավորություն, և ինչքան շուտ դա անի, այնքան ավելի լավ ՀՀ-ի ու ԱՀ-ի համար:

Վաղը ժամը տասներկուսից անց են կացվելու քաղաքացիական անհնազանդության գործողությունները՝ փողոցների ու կամուրջների շրջափակում, գործադուլ, դասադուլ, իսկ ակցիաների սկսվելուց հինգ րոպե անց ընթացքի մեջ գտնվող մեքենաները պետք է քսան րոպեով կանգ առնեն: Օրը կամփոփվի հանրահավաքում:

Աղբյուր` Փաստինֆո