Փաստ ինֆո

Ի՞նչ կարգով է նշանակվում վարչապետ, եթե խորհրդարանը ձայների մեծամասնությամբ վարչապետ չի ընտրում: «Փաստինֆո»-ի թղթակցի խնդրանքով պարզաբանում է փաստաբան Նորայր Նորիկյանը:

Կառավարության հրաժարականից հետ ՀՀ գործող Սահմանադրության 149-րդ հոդվածի համաձայն՝ վարչապետի հրաժարական ներկայացնելու կամ վարչապետի պաշտոնը թափուր մնալու այլ դեպքերում կառավարության հրաժարականն ընդունվելուց հետո` յոթնօրյա ժամկետում, Ազգային ժողովի խմբակցություններն իրավունք ունեն առաջադրելու վարչապետի թեկնածուներ: Ազգային ժողովը վարչապետին ընտրում է պատգամավորների ընդհանուր թվի ձայների մեծամասնությամբ:

Այսինքն, 106 պատգամավորից առնվազն 54-ի ձայնի դեպքում կարող է վարչապետ ընտրվել, իսկ եթե վարչապետ չի ընտրվում՝ այդ դեպքում քվեարկությունից յոթ օր հետո անցկացվում է վարչապետի նոր ընտրություն, որին մասնակցելու իրավունք ունեն պատգամավորների ընդհանուր թվի առնվազն մեկ երրորդի առաջադրած վարչապետի թեկնածուները: Եթե պատգամավորների ընդհանուր թվի ձայների մեծամասնությամբ վարչապետ չի ընտրվում, ապա Ազգային ժողովն արձակվում է իրավունքի ուժով:

Նորայր Նորիկյանը նշում է՝ մինչև ապրիլի 30-ը ներառյալ պետք է քննարկվի և առաջադրվի վարչապետի թեկնածություն, իսկ եթե ոչ՝ դրանից հետո 7 օրյա ժամկետում պատգամավորների ընդհանուր թվի առնվազն մեկ երրորդը այսինքն՝ 33 պատգամավոր կարող են առաջադրել վարչապետի թեկնածու:

Նշենք նաև, որ Կառավարությունը նախօրեին ՀՀ Նախագահին է ներկայացրել հրաժարական՝ վարչապետ Սերժ Սարգսյանի հրաժարականից հետո, որն էլ երկրի ղեկավարն ընդունել է:

Սահմանադրության 158-րդ հոդվածի համաձայն՝ կառավարության անդամները շարունակում են իրենց պարտականությունների կատարումը մինչև նոր կառավարության կազմավորումը:
Հիշեցնենք նաև, որ Սերժ Սարգսյանը վարչապետ ընտրվեց ապրիլի 17-ին՝ Ազգային ժողովի նիստում ձայների 77 կողմ, 17 դեմ հարաբերակցությամբ:

Սակայն նրա վարչապետության դեմ շուրջ 11 օր երկում հազարավոր քաղաքացիների կողմից բողոքի ցույցեր տեղի ունեցան որոնք գլխավորում էր ԱԺ ԵԼՔ խմբակցության ղեկավար Նիկոլ Փաշինյանը և վերջինիս հետ չհաջողված երկխոսությունից հետո վարչապետ Սերժ Սարգսյանը նախօրեին հրաժարական տվեց՝ թողնելով երկրի ղեկավարի պաշտոնը։

«Ստեղծված իրավիճակն ունի մի քանի լուծում, բայց դրանցից ոչ մեկին ես չեմ գնա։ Դա իմը չէ։ Ես թողնում եմ երկրի ղեկավարի, Հայաստանի վարչապետի պաշտոնը»,- նշված է Սերժ Սարգսյանի հայտարարության մեջ։

Աղբյուր` Փաստինֆո