Փաստ ինֆո

Հանրապետական կուսակցությունից որևէ մեկը չի կարող լինել վարչապետի թեկնածու, օտարերկրյա լրատվամիջոցների հետ հանդիպման ժամանակ հայտարարեց ԱԺ պատգամավոր, «Իմ քայլը» շարժման առաջնորդ Նիկոլ Փաշինյանը։

Նշենք, որ նրա շարժումն ի սկզբանե Սերժ Սարգսյանի վարչապետության դեմ էր, իսկ ներկայումս պահանջում է, որ ԱԺ-ում մեծամասնություն կազմող ՀՀԿ-ն զիջի իշխանությունը։

«Մենք պնդում ենք, որ բանակցություններում մասնակցելու է վարչապետի պաշտոնակատարը, ԱԺ նախագահը և ԱԺ մեծամասնության ղեկավարը։ Մեր օրակարգը պարզ է՝ Սերժ Սարգսյանի հրաժարական, որը կայացավ, այնուհետև ժողովրդի թեկնածուի նշանակումը վարչապետի պաշտոնում, և ես պնդում եմ, որ ՀՀԿ-ից որևէ թեկնածու չի կարող լինել վարչապետի թեկնածու», - ներկայացրեց Նիկոլ Փաշինյանը։ Ըստ նրա՝ վարչապետ պետք է լինի ժողովրդի թեկնածուն՝ հայտարարելով, որ պատրաստ է ստանձնել այդ պատասխանատվությունը, եթե ժողովուրդն իրեն առաջարկի։ Ավելին՝ կարծիք հայտնեց, որ հենց այդպես էլ կլինի։

Վաղվանից, նրա խոսքով, իրենք սկսում են բանակցությունները։  «Ես հույս ունեմ, որ իշխող կուսակցությունը և հրաժարական տված կառավարությունը կհասկանան, որ ընդդիմանալ պետք չէ և պետք չէ փորձել պահել իշխանությունը», - հավելեց ընդդիմադիր գործիչը եւ ընդգծեց, որ բանակցությունների միակ թեման լինելու է իշխանության անցնցում փոխանցումը։

 «Այսօր մենք խոսում ենք ժամանակավոր կառավարության մասին և կարծում եմ՝ միակ կարևոր պատասխանատվությունը, որ պետք է ունենա այդ կառավարությունը, ազատ, արդար ու ժողովրդավարական ընտրությունների անցկացումն է։ Վստահ ենք, որ մեր թավշյա հեղափոխությունը  ունի մեծ պոտենցիալ ու մեծ թիմ՝ դա անելու համար», - հայտարարեց Նիկոլ Փաշինյանը։

Հարցին,  թե արդյոք բանակցությունների ընթացքում կդադարեցվեն փողոցային ցույցերը Փաշինյանը բացասական պատասխան տվեց՝ նշելով, որ որևէ ընդմիջում չի լինի եւ դրանց կշարունակվեն «մինչև թավշյա հեղափոխությունը տրամաբանական ավարտ չունենա»։

«Մենք այս պահին տիրապետում ենք Հայաստանում իրավիճակին և կարող ենք ցանկացած պահի մասսայական միջոցառում անցկացնել», - հավելեց Ն.Փաշինյանը։

Աղբյուր` Փաստինֆո