Փաստ ինֆո

Մի շարք միջոցառումներ ուղղակի հետաձգվել են. դրանք դժվար էր իրականացնել, քանի որ արտգործնախարարությունը ժամանակ առ ժամանակ արգելափակման մեջ էր գտնվում: Այս մասին արտասահմանյան լրատվամիջոցների ներկայացուցիչների հետ հանդիպմանը հայտարարեց ՀՀ արտաքին գործերի նախարար Էդվարդ Նալբանդյանը՝ ընդգծելով, որ Հայաստանում ստեղծված վերջին իրադարձությունները խոչընդոտում են տարբեր պետական հիմնարկների, ինչպես նաև արտաքին գործերի նախարարության աշխատանքը:

Ըստ նախարարի, իրենք բազմաթիվ բողոքներ են ստացել Հայաստանում հավատարմագրված օտարերկրյա դեսպանությունների կողմից, որոնք դժգոհություն են հայտնում, թե սահմանափակվել է իրենց ազատ տեղաշարժի հնարավորությունը։

Քաղաքացիներն իրավունք ունեն արտահայտելու իրենց կարծիքը, սակայն ներխուժել դիվանագիտական ներկայացուցչություններ, տարբեր հայտարարություններով դիվանագետներին անհարմար դրության մեջ դնել, դա նաև առցանց ներկայացնել, «չեմ կարծում, որ ժողովրդավարության կամ հայրենասիրության դրսևորում է»:

Այսպիսի իրավիճակում, երբ կրքերը բավականին բորբոքված են, կարևոր է, որ ամեն խոսք ու հաղորդագրություն լինի կշռադատված ու հավասարակշռված, և այստեղ լրատվամիջոցները բավական պատասխանատու աշխատանք ունեն կատարելու, ասաց Էդվարդ Նալբանդյանը:

Նախարարը նշեց, որ վերջին երկու օրերին դիվանագիտական ներկայացուցչությունների ղեկավարների հետ հանդիպումների ժամանակ ինքն անդրադարձել է ԵՄ կողմից արված հայտարարությանը՝ հայտնելով, որ Հայաստանը կիսում է այդ դրույթները:

«Հայաստանը ոչ միայն լիովին հարգում է հավաքների ազատության իրավունքը, այլ գործնականում դրա համարժեք կիրառումն է ապահովում: Նաև նշել եմ, որ Հայաստանի օրենսդրության ու միաջզգային պարտավորությունների համաձայն՝ Հայաստանը նույն մոտեցումը շարունակելու է», - ընդգծեց Հայաստանի արտաքին քաղաքական գերատեսչության ղեկավարը:

Է.Նալբանդյանը նշեց նաև, որ ԵՄ հայտարարության վերաբերյալ հրապարակումներում ասվում է, որ ԵՄ-ն կոչ է անում, որ բոլոր նրանք, ովքեր ձերբակալվել են, պետք է անհապաղ ազատ արձակվեն: Մինչդեռ հայտարարության մեջ ասված է՝ «բոլոր նրանք, ովքեր ձերբակալվել են օրենքով սահմանված կարգով իրենց հիմանարար իրավունքի իրականացման ընթացքում, պետք է անհապաղ ազատ արձակվեն»: Ըստ նախարարի, տարբեր հաղորդագրությունների մեջ բաց էր թողնված այս մասը:

Աղբյուր` Փաստինֆո