Փաստ ինֆո

Նիկոլ Փաշինյանի կինը՝ Աննա Հակոբյանը, տեղյակ չէ, թե իր ամուսնու ՖԲ էջում հրապարակված կոչ-հայտարարությունն ում կողմից է տարածվել:

Հիշեցնենք, որ Նիկոլ Փաշինյանի տարածած հայտարարության մեջ կոչ էր արվում քաղաքացիներին դուրս գալ փողոց` հավատարիմ մնալով խաղաղ անհնազանդության ոգուն և շարունակել ապակենտրոն պայքարը։

«Անկախ 3 պատգամավորների ձերբակալությունից նախաձեռնող խումբը վերահսկում է իրավիճակը։ Կոչ եմ անում այսօր երեկոյան՝ 19։00-ին, կրկին միանալ Հանրապետության հրապարակում նախատեսված հանրահավաքին»,- ասվում էր ՖԲ-ում տարածված հայտարարության մեջ։

«Ազատություն» ռադիոկայանին տված հարցազրույցում Նիկոլ Փաշինյանը կինը նշեց, որ ինքը որևէ տեղեկություն չունի, որ ամուսինն անձամբ է տեղադրել հայտարարությունը, չգիտի ամուսնու հե՞տ է արդյոք նրա համակարգիչը, գիտի, որ հեռախոսն նրա մոտ չէ:

«Բայց կարող եմ ենթադրել, որ իրենք կուսակցությունով, շարժման նախաձեռնող խմբով մշտապես քննարկումների մեջ էին, չգիտեմ ինչ էին քննարկում, բայց կարող եմ ենթադրել, որ այդ գործողությունն այդ շրջանակում մտնում է, այսինքն՝ պատահական չէ, բայց թե ով է և ինչպես է, չեմ կարող ասել: Նրա ֆեյսբուքյան էջին կարող էին մուտք ունենալ միայն, կարծում եմ, հաշվված թվով ու իր կողքին գտնվող մարդիկ»,- ասաց Աննա Հակոբյանը:

Հիշեցնենք, որ Հայաստանի Հանրապետության Ազգային ժողովի պատգամավորներ Նիկոլ Վովայի Փաշինյանը, Սասուն Մեխակի Միքայելյանը և Արարատ Սամվելի Միրզոյանն այսօր ձերբակալվել են՝ Հայաստանի Հանրապետության քրեական օրենսգրքի 225.1-րդ հոդվածի 1-ին եւ 2-րդ մասերով սահմանված արարքներ կատարելու կասկածանքով:

Աղբյուր` Փաստինֆո