Փաստ ինֆո

ԱԺ պատգամավոր Նիկոլ Փաշինյանի կողմից կազմակերպած հավաքի մասնակիցների, ինչպես նաև ոստիկանների գործողություններում ոչ իրավաչափ քայլեր կան: «Արմենպրես»-ի հաղորդմամբ՝ լրագրողների հետ հանդիպմանը նման տեսակետ հայտնեց փաստաբան Գևորգ Դավթյանը:

«Ինչպես միջազգային, այնպես էլ պետական օրենսդրությունը հավաքներ անցկացնելու իրավունք տալիս է բոլորին: Հետևաբար, հավաքի անցկացման մեջ որևէ հակաօրինական բան չկա: Այլ բան է, թե այդ հավաքներն ինչ կերպ են ընթանում, և արդյոք դրանց ընթացքում տեղի ունենո՞ւմ են որոշակի արարքներ, որոնք կարող են սպառնալ այլոց իրավունքների և ազատությունների խախտմանը»,-ասաց փաստաբանն ու հավելեց՝ իսկ եթե մեկը հավաքի ընթացքում կատարում է որևէ հակաօրինական գործողություն, այն չպետք է տարածական բնույթ ունենա մյուս մասնակիցների վրա:

Դավթյանի խոսքով՝ ոստիկանության գործողությունները ոչ օրինաչափ են այն ժամանակ, երբ անձին բերման ենթարկելուց առաջ որևէ կերպ չեն հիմնավորում այն: Օրենքով բերման ենթարկում են այն ժամանակ, երբ անձն իր կամքով որևէ վարույթի շրջանակում ցանկություն չի հայտնում ներկայանալ: «Սակայն տեսնում ենք, որ հավաքի ընթացքում ոստիկանների գործողությունները չեն տեղավորվում այդ օրենքի շրջանակում»,-ասաց նա ու հավելեց, որ քաղաքացիները, որոնք տուժում են նրանց այդ գործողությունների արդյունքում, պետք է հետամուտ լինեն՝ փորձեն իրենց փաստաբանների միջոցով վերականգնել իրավունքները:

Փաստաբանը նկատեց՝ հավաքի ազատության իրավունքը ենթադրում է որոշակի խոչընդոտներ իշխանության ներկայացուցիչների համար: Սակայն յուրաքանչյուր գործողություն ունի իր սահմանը:

«Մասնավորապես, ապրիլի 16-ին Մաշտոցի պողոտայում ցուցարարները պոկել են լուսամփոփներ, որը լիիրավ ոչ իրավաչափ գործողություն է: Եվ այն պետք է գնահատել տվյալ անձին անհատական պատասխանատվության ենթարկելու սկզբունքից, ոչ թե նրա հակաօրինական վարքը վերագրել նաև մյուսներին»,-ասաց նա:

Փաստաբանի կարծիքով՝ իրավապահ մարմինները պատասխանատվության պետք է ենթարկեն այն անձանց, ովքեր կատարում են այդ գործողությունները: Փաստերն արձանագրվել են, և մեկի խախտման հետևանքով մյուսները չեն տուժել:

ՀՀ ԱԺ պատգամավոր Նիկոլ Փաշինյանն ու կողմնակիցները ապրիլի 13-ից փակել էին Երևանի Ֆրանսիայի հրապարակը: Նրանք ապրիլի 16-ի առավոտից կաթվածահար էին արել մայրաքաղաքի կենտրոնի երթևեկությունը, փակել բանուկ փողոցները: Դրանք երեկոյան արդեն բացվել էին, սակայն ապրիլի 17-ի առավոտյան կրկին փակվել էին հավաքի կազմակերպիչների և մասնակիցների կողմից: Ապրիլի 16-ին Բաղրամյան պողոտայում ոստիկանների և հավաքի մասնակիցների միջև միջադեպ է գրանցվել: Վեց ոստիկան, Նիկոլ Փաշինյանն ու հավաքի մոտ չորս տասնյակ մասնակիցներ տարվել էին հիվանդանոցներ:

Այդ օրն ավելի քան 8 տասնյակ մարդ է բերման ենթարկվել ոստիկանություն վարչական իրավախախտումների դեպքերով: Ապրիլի 17-ի երեկոյան Փաշինյանը հայտարարել է, որ կբացեն Ֆրանսիայի հրապարակը և կգիշերեն տանը: Սակայն նրանք ապրիլի 18-ի առավոտյան կրկին փակեցին հրապարակը, ապա քայլերթով հասան ՀՀ վարչապետի նստավայր: Նրանք ապրիլի 18-ին ևս քայլերթեր են իրականացրել, իսկ ապրիլի 19-ին առավոտից փորձել են արգելափակել Կառավարության 3-րդ մասնաշենք աշխատակիցների մուտքը: Ապրիլի 19-ին ավելի քան 100 մարդ է բերման ենթարկվել: 

Աղբյուր` Փաստինֆո