Փաստ ինֆո

Վերջին օրերին բազմաթիվ են դեպքերը, երբ ոստիկանությունը մեծապես առանց բավարար հիմքերի ոստիկանության բաժանմունքներ է բերման ենթարկում առավելապես անչափահասների։

Փաստաբան Գևորգ Գյոզալյանն անդրադառնալով խնդրին նշում է՝ անչափահասների մեծ մասը բերման է ենթարկվում իբր թե ՀՀ քրեական դատավարության օրենսգրքի 153-րդ հոդվածի հիմքով։ Սա մեղմ ասած անօրինական է։

Փաստաբանի ֆեյսբուքյան էջի գրառումը ներկայացնում ենք ամբողջությամբ.

Մասնավորապես ոստիկանության աշխատակիցները երեխաներին ուժի գործադրմամբ նստեցնում են տարբեր տեսակի ավտոմեքենաներ և տանում են տարբեր ոստիկանական բաժանմունքներ։ Ընդ որում մեծաթիվ դեպքերում երեխաներին ոչ թե վարչական վարույթի ընթացակարգով են քննության ենթարկում, այլ քրեական վարույթի կարգով։ Այսինքն, երեխային դիտում են որպես կասկածյալ «Հանրային ռադիոյի» շենք մուտք գործելու գործով հարուցված ՀՀ քրեական օրենսգրքի 225-րդ հոդվածի և 225.1-րդ հոդվածի շրջանակներում և հարցաքննում են կամ որպես կասկածյալ կամ որպես վկա։ Սա շատ մեղմ ասած Անօրինական գործողություններն են, որը հետևողականության դեպքում պայթելու է ՄԻԵԴ-ում։

Շատ չխորանալով խնդրի էության մեջ (ներկայումս մշակում եմ փաստաբանական մարտավարություն՝ վստահորդների գործերով) այդուհանդերձ պետք է ասեմ, որ նախ ՀՀ Սահմանադրության 27-րդ հոդվածը երաշխավորում է յուրաքանչյուր անձի անձնական ազատության իրավունքը։ ՀՀ քրեական դատավարության օրենսգրքի 153-րդ հոդվածը սահմանում է, թե որ դեպքերում կարելի է անձին բերման ենթարկել։ Մասնավորապես, համաձայն այդ հոդվածի՝ «Բերման ենթարկելը առանց հարգելի պատճառի քննության չներկայացող կասկածյալին, մեղադրյալին, ամբաստանյալին, դատապարտյալին, վկային և տուժողին հարկադրաբար քրեական վարույթն իրականացնող մարմնին ներկայացնելն է` նրա նկատմամբ սույն օրենսգրքով նախատեսված համապատասխան դատավարական գործողություններ կատարելու համար, որը կարող է զուգորդվել բերման ենթարկվող անձի իրավունքների և ազատությունների ժամանակավոր սահմանափակմամբ»:

Ինչպես տեսնում ենք վկայակոչված հոդվածից խոսքը գնում է որոշակի այն դատավարության մասնակիցների մասին (կասկածյալ, մեղադրյալ, ամբաստանյալ, դատապարտյալ, վկա և տուժող) ովքեր առանց հարգելի պատճառի չեն ներկայանում քննությանը։ Ձերբակալման մասով իրավական նորմերի սահմանները ավելի նեղ են և կարգավորվում է ՀՀ քրեական դատավարության օրենսգրքի 17-րդ գլխով։ Այս առումով այդ իրավակարգավորումները սահմանում են, որ ձերբակալել կարելի է միայն` անձին, որը հիմնավոր կերպով կասկածվում է այնպիսի հանցագործության մեջ, որի կատարման համար կարող է նշանակվել պատիժ` կարգապահական գումարտակում պահելու, կալանքի, որոշակի ժամկետով ազատազրկման կամ ցմահ ազատազրկման ձևով. կիրառված խափանման միջոցի պայմանները խախտած մեղադրյալին: Ձերբակալումը կատարվում է` հանցանք կատարելու մեջ անմիջականորեն ծագած կասկածանքի հիման վրա. քրեական հետապնդման մարմնի որոշման հիման վրա:

Անմիջականորեն ծագած կասկածանք եզրույթը բավականին մեկնաբանվել է ՄԻԵԴ վճիռներում։ Ամփոփելով վերը ողջ ասվածը պետք է նշեմ, որ վերջին օրերում Երևան քաղաքի փողոցներում տեղի ունեցող ոստիկանության գործողությունները մեծապես կրում են անօրինակ բնույթ և կարծում եմ հետագայում ՀՀ-ն կարող է թանկ վճարել ՄԻԵԴ-ում։

Նկատենք， որ նախորդ օրերին ոստիկանությունը բազմիցս հանդես էր եկել հայտարարությամբ եւ կոչ արել երեխաներին， անչափահասներին հեռու պահել անօրինական հավաքներից։

Աղբյուր` Փաստինֆո