Փաստ ինֆո

Այն, ինչ հնչեցվում է հրապարակում, փոխզիջում չի ենթադրում, այլ ենթադրում է «ամեն ինչ կամ ոչինչ» սկզբունքը, որը կտրուկ տարբերվում է խորհրդարանական ժողովրդավարության մոդելի տրամաբանությունից: Այս մասին Հանրային հեռուստաընկերության «Օրակարգից դուրս» հաղորդմանը տված հարցազրույցում հայտարարել է ՀՀ պաշտպանության նախարար Վիգեն Սարգսյանը, հավելելով՝ «և այդ առումով ես չգիտեմ, թե ինչ փոխզիջումների մասին կարող է խոսքը լինել»:

Ըստ նախարարի, Նիկոլ Փաշինյանը աշխատանք ունի կատարելու խորհրդարանում, որպես մարդ, ով ստացել է համապատասխան քվե:

Վիգեն Սարգսյանը տեսակետ է հայտնել, որ տեղի ունեցող բողոքի գործընթացներն ավելի շատ ուղղված են ապագային, քան այսօրվան: Գլխավորն, ըստ նրա, այն է, որ չխախտվեն այն «կարմիր գծերը», որոնք գուցե հետո երկխոսության տեղ չթողնեն:

Նախարարը հատկապես վտանգավոր է համարել անչափահասների ներգրավումը քաղաքական գործընթացներում: «․․․ Ես չեմ կարծում, որ կարելի է այդքան հանգիստ, ձեռները վեր բարձրացնելով, ասել՝ մեր մտադրությունները խաղաղ են, այնուհետև փորձել այդ նույն ձեռքերով փշալարը քաշել, որի հետևանքով կարող են բախումներ առաջանալ ոստիկանության հետ: Տեսնում եմ մի քիչ ազնվության պակաս», - ասել է Վ.Սարգսյանը:

Երկրում տեղի ունեցող ցանկացած իրադարձություն ուղիղ կապ ունի բանակի հետ, և եթե կառավարման համակարգը կաթվածահար լինի, դա կազդի երկրի մարտունակության վրա, նշել է նախարարը: Միաժամանակ նա ընդգծել է․«Խոսքը կոնկրետ այս իրադարձությունների մասին չէ, բայց պատկերացրեք, եթե նման իրադարձությունները, ենթադրենք, ունենային ներուժ ներազդելու, կաթվածահար անելու, ինչպես ասում են որոշ գործիչներ, պետական ողջ համակարգը: Կարծում եմ, ցանկացած մարդու համար հասկանալի է, որ կաթվածահար կառավարման համակարգով պետության մարտունակությունը, իհարկե, կարող է մեծապես տուժել դրանից»:

Վիգեն Սարգսյանը նշել է, որ իր համար կանխատեսելի էր որոշ գործիչների կողմից իրավիճակի ծայրահեղացումը, սակայն հասկանալի չէ, թե որն է տեղի ունեցող բողոքի միջոցառումների դրդապատճառը: Ըստ նրա, բողոք և անհանգստություն պետք է լիներ, եթե ձայների մեծամասնություն ստացած խորհրդարանական ուժի ղեկավարը փորձեր ստվերից կառավարեր գործընթացները: «Եվ այդ դեպքում մտահոգությունները պետք է շատ ավելի ըմբռնելի լինեին, քան երբ ինքը՝ ստանձնելով քաղաքական պատասխանատվությունը այն ուժի համար, որը ձևավորել է մեծամասնություն, ներկայանում է խորհրդարան և ձևավորում է այն ուղղահայացը, որը որոշումների կայացման համար պատասխանատու է այս երկրում: Այնպես որ այդ դժգոհությունը ինձ համար գոնե այդքան ըմբռնելի չէ»,- ասել է Վ.Սարգսյանը:

Նախարարն արձանագրել է բավականին լուրջ առաջընթաց՝ ոստիկանության արհեստավարժություն: «… Ես կարծում եմ, որ ոստիկանությունը ոչ միայն համաչափ, այլ գերարհեստավարժ գործեց այս օրերին»:

Աղբյուր` Փաստինֆո