Փաստ ինֆո

Մինչ Ազգային ժողովի պատգամավոր, «Քաղաքացիական պայմանագիր» կուսակցության ղեկավար Նիկոլ Փաշինյանի գլխավորությամբ իրականացվող հավաքի մասնակիցները շարունակում են մնալ Երևանի քաղաքապետարանի մոտ, նստել էին շենքի դիմացի աստիճաններին, ապա փակել հարակից փողոցները, մի խումբ քաղաքացիներ փորձում էին փակել Մաշտոցի պողոտան Ֆրանսիայի հրապարակի հարևանությամբ: «Արմենպրես»-ի հաղորդմամբ՝ ոստիկանները ցուցարարներին դուրս բերեցին փողոցի երթևեկելի հատվածից:

Որոշ քաղաքացիները նստեցվեցին տեղում գտնվող ոստիկանական մեքենա և բերման ենթարկվեցին: Կարճ ժամանակ անց Ֆրանսիայի հրապարակում Մաշտոցի պողոտայի երկայնքով երթևեկությունը բացվեց: Ոստիկաններից կազմված կենդանի պատը թույլ չի տալիս մայթերին գտնվող քաղաքացիների գալ ճանապարհի երթևեկելի մաս: 

Նիկոլ Փաշինյանն ու իր կողմնակիցները շարունակում են երթը Երևանում: Նշենք, որ հերթական հանրահավաքն է սպասվում երեկոյան:

Փաշինյանն ու կողմնակիցները ապրիլի 13-ից փակել էին Երևանի Ֆրանսիայի հրապարակը:

Նրանք ապրիլի 16-ի առավոտից կաթվածահար էին արել մայրաքաղաքի կենտրոնի երթևեկությունը, փակել  բանուկ փողոցները: 

Դրանք երեկոյան արդեն բացվել էին, սակայն ապրիլի 17-ի առավոտյան կրկին փակվել էին հավաքի կազմակերպիչների և մասնակիցների կողմից:

Ապրիլի 16-ին Բաղրամյան պողոտայում ոստիկանների և հավաքի մասնակիցների միջև միջադեպ է գրանցվել: 

Վեց ոստիկան, Նիկոլ Փաշինյանն ու հավաքի մոտ չորս տասնյակ մասնակիցներ տարվել էին հիվանդանոցներ:

Ավելի քան 8 տասնյակ մարդ է բերման ենթարկվել ոստիկանություն վարչական իրավախախտումների դեպքերով:

Ապրիլի 17-ի երեկոյան Փաշինյանը հայտարարել է, որ կբացեն Ֆրանսիայի հրապարակը և կգիշերեն տանը: 

Սակայն նրանք ապրիլի 18-ի առավոտյան կրկին փակեցին հրապարակը, ապա քայլերթով հասան ՀՀ վարչապետի նստավայր:

Աղբյուր` Փաստինֆո