Փաստ ինֆո

ՀՀ-ում Եվրոպական միության պատվիրակության կողմից հատկացված դրամաշնորհների գումարներից առանձնապես խոշոր չափերի հափշտակության գործով 14 մեղադրյալի մասով գործը կքննի երիտասարդ դատավոր Հարություն Մանուկյանը:

Քրեական գործը դատարան է ստացվել ապրիլի 12-ին և մակագրվել է նորանշանակ դատավոր Մանուկյանին:

Նշենք, Հարություն Մանուկյանը մարտի 27-ին է Նախագահի հրամանագրով դատավոր նշանակվել:

Ավելի վաղ տեղեկացրել էինք, որ չարաշահումները ներառում են 18 դրամաշնորհային ծրագիր, իսկ հափշտակված գումարն ավելի քան 907 մլն դրամ է։

Գործով մեղադրանքներ են առաջադրվել ՀՀ-ում Եվրոպական միության պատվիրակության դրամաշնորհային ծրագրերի համակարգող Մարինե Պապյանին ՝ 18 դրվագով, Տիգրան Սուքիասյանին (15 դրվագով), Գարիկ Չիլինգարյանին (6 դրվագով), Ռուբինա Տեր-Մարտիրոսյանին՝ (4 դրվագով), Արմեն Բարեղամյանին (2 դրվագով), Գևորգ Ղազարյանին (2 դրվագով), Դինա Մանուկյանին (մեկ դրվագով), Ալեքսանդր Պողոսյանին (մեկ դրվագով), Սերգեյ Բալասանյանին (մեկ դրվագով), Կարեն Ստեփանյանին (մեկ դրվագով), Կարեն Ստեփանյանին (մեկ դրվագով), Արմեն Միքայելյանին (մեկ դրվագով), Արման Մկրտչյանին (4 դրվագով), Անահիտ Ավագյանին (4 դրվագով) և Նելլի Սեդրակյանին (2 դրվագով) մասերով:

Ավելի վաղ ՀՀ քննչական կոմիտեն տեղեկացրել էր, որ ՀՀ-ում Եվրոպական միության պատվիրակության կողմից հատկացված դրամաշնորհի գումարներից առանձնապես խոշոր չափերի հափշտակություն է կատարվել, ինչի առիթով հարուցվել է քրեական գործ: Հափշտակություններն սկսվել են 2009-2010 թվականներին:

Եվս 5 մեղադրյալի մասով նախաքննությունը շարունակվում է։

Նշենք, որ 14 անձանցից միայն Մարինե Պապյանի նկատմամբ է խափանման միջոց կալանավորում ընտրվել, իսկ մյուսների նկատմամբ ընտրվել է չհեռանալու մասին ստորագրությունը:

Աղբյուր` Փաստինֆո