Փաստ ինֆո

Հաղթանակի կամրջի վրա լարված իրավիճակ է: Ոստիկանները փորձում են ցուցարարներին ուղղորդել դեպի մայթեզր և վերականգնել ընդհատված երթևեկությունը: Ոստիկանները պատ են կազմել փողոցի ու մայթեզրի միջև և բոլորին խնդրում են դուրս գալ երթևեկելի հատվածից:

Արդեն տեղեկացրել ենք， որ ըստ ոստիկանների՝ այդքան մեքենա չի կարող գտնվել կամրջի վրա, այն կփլվի， սակայն ցուցարարները հրաժարվում են կատարել ոստիկանների պահանջը։

Ոստիկանները փորձում են նաև վերականգնել Խորենացի-Վազգեն Սարգսյան, Խորենացի-Մաշտոց, Ամիրյան-Մաշտոց հատվածների երթևեկությունը:

Հիշեցնենք， որ «Ելք» խմբակցության պատգամավոր Նիկոլ Փաշինյանն այսօր  հայտարարել է թավշյա հեղափոխություն իրականացնելու ծրագրի մասին:

«Ազգային ժողովում արդեն իսկ սկսվել է այս խամաճիկային նիստը, իսկ Հանրապետության տարբեր քաղաքներում բողոքի զանգվածային ցույցեր են», - դիմելով Երևանի Ֆրանսիայի հրապարակում հավաքված ցուցարարներին հայտարարել է Նիկոլ Փաշինյանը: - «Հայաստանում հաստատված է հեղափոխական իրավիճակ, և ես հիմա այստեղ հայտարարում եմ ժողովրդական, ոչ բռնի, թավշյա հեղափոխության մեկնարկը»:

Ապա նա ներկայացրեց իրենց հետագա քայլերի ծրագիրը․ «Նրանք հիմա ամբողջ Հայաստանի ուժային կառույցները հավաքել են այնտեղ և մեզ սպասում են այնտեղ, բայց մենք ուրիշ բան կանենք: Մենք հիմա երթով կշարժվենք այն ուղղությամբ, և գործողություններ կանենք մնացած բոլոր կառավարական շենքերի գործողությունը պարալիզացնելու ուղղությամբ:

Ն.Փաշինյանի ելույթից հետո մի շարք պետական գերատեսչությունների վարչական շենքերի մուտքերը շրջապատվեցին ցուցարարների կողմից， իսկ երեկոյան նախատեսվում է հանրահավաք կազմակերպել հենց Հանրապետության հրապարակում։

Աղբյուր` Փաստինֆո