Փաստ ինֆո

Այսօր առավոտյան «Քաղաքացիական պայմանագիր» կուսակցության առաջնորդ, «Ելք» խորհրդարանական խմբակցության պատգամավոր Նիկոլ Փաշինյանը, ով գլխավորում է Հայաստանի երրորդ նախագահ Սերժ Սարգսյանին երկրի վարչապետ նշանակելու դեմ բողոքի ակցիաները, քաղաքացիական անհնազանդության զանգվածային ակցիաներ անցկացնելու կոչ է արել:

Նա, մասնավորապես, կոչ է արել իր կողմնակիցներին մտնել գերատեսչությունների, այդ թվում՝ նախարարությունների շենքեր, քաղաքապետարան, քաղաքային ու գյուղական վարչակազմեր և այլ պետական հաստատություններ ու փակել կենտրոնական փողոցները, հայտարարել գործադուլ և նստացույց:

Ընդ որում, նա նշել է, որ բողոքի ակցիաները պետք է անցնեն խաղաղ՝ կոչ անելով բռնություն ու վիրավորանքներ արտահայտելուց, ինչպես նաև գույքը վնասելուց ձեռնպահ մնալ:

Երևանի փոխոստիկանապետ Վալերի Օսիպյանը վաղ առավոտյան Փաշինյանին է փոխանցել ոստիկանության գրավոր ծանուցումը նախօրեին՝ ապրիլի 16-ին, տեղ գտած իրադարձությունները հաշվի առնելով՝ բողոքի ակցիաները դադարեցնելու որոշման մասին, սակայն Նիկոլ Փաշինյանը հրապարակավ պատռել է փաստաթուղթը:

Ցուցարարները՝ Նիկոլ Փաշինյանի գլխավորությամբ, նախօրեին Երևանի մի քանի կենտրոնական փողոցներ էին փակել և քաղաքացիական անհնազանդության ակցիաների կոչ արել:

Երևանում բողոքի ակցիայի մասնակիցները ցերեկը փորձել էին փշալարի միջով ճեղքել-անցնել Բաղրամյանի պողոտայում գտնվող Հայաստանի խորհրդարանի շենք: Դրանից հետո ցուցարարների ու իրավակարգի պահապանների միջև տեղի էին ունեցել խոշոր բախումներ: Ուժայինները հատուկ միջոցներ էին կիրառել: Առողջապահության նախարարության տվյալներով, բուժօգնության է դիմել 46 քաղաքացի, այդ թվում՝ 6 ոստիկան:

Հայաստանի ոստիկանությունը հայտարարությամբ էր հանդես եկել, որով Երևանում զանգվածային ակցիաների կազմակերպիչներին կոչ էր արել բացառել դրանցում դեռահասների մասնակցությունը:

Հայաստանի վարչապետի ընտրությունը տեղի կունենա այսօր՝ ապրիլի 17-ին, Հայաստանի խորհրդարանի հատուկ նիստում: Իշխող Հանրապետական կուսակցությունը նախօրեին վարչապետի պաշտոնի համար պաշտոնապես առաջադրել է Սերժ Սարգսյանի թեկնածությունը:

Աղբյուր` Փաստինֆո