Փաստ ինֆո

ՀՀ-ում Եվրոպական միության պատվիրակության կողմից հատկացված դրամաշնորհների գումարներից առանձնապես խոշոր չափերի հափշտակության գործով 14-ի անձի մասով նախաքննությունն ավարտվել է և գործն ուղարկվել է դատարան: Այդ մասին «Փաստինֆո»-ի հարցմանն ի պատասխան հայտնեցին Քննչական կոմիտեից։  Չարաշահումները ներառում են 18 դրամաշնորհային ծրագիր， իսկ հափշտակված գումարը ավելի քան 907 մլն դրամ։

Ձեռք բերված ապացույցների համակցությամբ՝ մեղադրանքներ են առաջադրվել մի խումբ անձանց կողմից նախնական համաձայնությամբ խարդախությամբ առանձնապես խոշոր չափերի հափշտակություն, հափշտակությանն օժանդակելու, ինչպես նաև մի խումբ անձանց կողմից նախնական համաձայնությամբ փաստաթղթի կեղծիք կատարելու համար:

Մասնավորապես,  մեղադրանքներ են առաջադրվել  ՀՀ-ում Եվրոպական միության պատվիրակության դրամաշնորհային ծրագրերի համակարգող Մարինե Պապյանին ՝ 18 դրվագով, Տիգրան Սուքիասյանին (15 դրվագով), Գարիկ Չիլինգարյանին (6 դրվագով), Ռուբինա Տեր-Մարտիրոսյանին՝ (4 դրվագով), Արմեն Բարեղամյանին (2 դրվագով), Գևորգ Ղազարյանին (2 դրվագով), Դինա Մանուկյանին (մեկ դրվագով), Ալեքսանդր Պողոսյանին (մեկ դրվագով), Սերգեյ Բալասանյանին (մեկ դրվագով), Կարեն Ստեփանյանին (մեկ դրվագով), Կարեն Ստեփանյանին (մեկ դրվագով), Արմեն Միքայելյանին (մեկ դրվագով), Արման Մկրտչյանին (4 դրվագով), Անահիտ Ավագյանին (4 դրվագով) և Նելլի Սեդրակյանին (2 դրվագով) մասերով:

Ավելի վաղ ՀՀ քննչական կոմիտեն տեղեկացրել էր, որ ՀՀ-ում Եվրոպական միության պատվիրակության կողմից հատկացված դրամաշնորհի գումարներից առանձնապես խոշոր չափերի հափշտակություն է կատարվել, ինչի առիթով հարուցվել է քրեական գործ: Հափշտակություններն սկսվել են 2009-2010 թվականներին:

Եւս 5 մեղադրյալի մասով նախաքննությունը շարունակվում է։

Աղբյուր` Փաստինֆո