Փաստ ինֆո

Երկու մարդու՝ տարեց կնոջ ու նրա երեքամյա թոռան, մահվան ելքով ՃՏՊ-ի գործով այսօր հարցաքննվեցին վկաները:

Վկա Գ.Չարխչյանը հայտնեց, որ մեքենայով ընթացել է փողոցով, երբ ձայն՝ դմփոց է լսել, իջել է ավտոմեքենայից ու մոտեցել պատահարի վայրին: Ըստ վկայի, չորս հետիոտներ՝ տարեց կինը, երիտասարդ աղջիկն ու երկու երեխաները գազոնով էին անցնում, այսինքն՝ փողոցն անցնելու համար ոչ թույլատրելի մասով: ԲՄՎ մակնիշի մեքենա էր կայանված, սակայն որտեղ վկան չհիշեց: Վկան չհիշեց նաև տարեց կինը որտեղ էր ընկած: Տեսել է, թե ինչպես երիտասարդ կինը պառկեցրել էր երեխային գազոնի վրա ու գոռում էր, իսկ տարեց կինը պառկած էր:

ԲՄՎ-ի վարորդը, այսինքն՝ ամբաստանյալը, վատ էր զգում իրեն, շրջապատած մարդիկ ասում էին հանգստացի՛ր, ջուր բերե՛ք:

Վկան հայտնեց նաև, որ կոնկրետ վրաերթի պահը չի տեսել: Դեպքից 10-20 րոպե հետո ժամանել էր շտապօգնությունը:

Մեղադրողի միջնորդության հիման վրա նախաքննական ու դատաքննական ցուցմունքների միջև առկա էական հակասությունների պատճառով հրապարակվեցին վկայի նախաքննական ցուցմունքները:

Վկան նախաքննության ժամանակ ասել էր, որ հետին տեսանելիության հայելիով տեսել է, որ վրաերթի են ենթարկվել տարեց կինն ու երեխան, վերջինս գտնվում էր կանաչապատ գոտում ու նրան օգնություն էին ցույց տալիս: Ըստ վկայի, երեխայի վրա ջուր են լցրել՝ փորձելով նրան ուշքի բերել, ապա տաքսիով տեղափոխել են հիվանդանոց, իսկ տարեց կնոջը, ինչպես նաև ԲՄՎ-ի վարորդին հիվանդանոց են տեղափոխել շտապօգնության ավտոմեքենայով:

Իսկ վկա Մուշեղ Զաքարյանը ընթացել է դիմացի մայթով, արգելակման ձայն ու դմփոց է լսել, իջել է ավտոմեքենայից, անցել փողոցը ու զանգահարել շտապօգնություն: Երկու մարդ վրաերթի էր ենթարկվել, շատ ծանր վիճակում էր նաև ԲՄՎ-ի վարորդը:

Նախաքննական ցուցմունքում վկան ասել էր, որ տեսել է ճանապարհին ընկած մի տարեց կնոջ, իսկ կանաչապատ գոտում երեխա էր պառկած՝ անգիտակից վիճակում:

Վարորդը շփոթված ու վախեցած վիճակում էր: Դեպքից օրեր անց վկան իմացել է, որ վրաերթի ենթարկվածները մահացել են:

Նախաքննական ցուցմունքում վկան հայտնել էր, որ տեսել է մեքենայի կապոտի վրայից ընկնող տարեց կնոջը: Այս կապակցությամբ պաշտպանական կողմի ուղղած հարցին ի պատասխան վկան հայտնեց, որ ուղղակի չի կարողացել դեպքը ճիշտ շարադրել: Ըստ վկայի, ինքն ընկնելու պահն է տեսել, երբ գետնին է ընկել:

Ամբաստանյալ Լևոն Խաչատրյանի պաշտպան Ռուբեն Բալոյանը միջնորդեց դատարանին փոխել իր պաշտպանյալի խափանման միջոց կալանավորումը կամ գրավով նրան ազատ արձակելը թույլատրելի ճանաչել:

Ըստ պաշտպանի, իր պաշտպանյալի նկատմամբ կալանավորումն ընտրվել է դեպքից 14 օր անց, մինչ այդ նրա կողմից պատշաճ վարքագիծ է դրսևորվել, այսինքն՝ որևէ հիմք չկա, որ ազատության մեջ հայտնվելով՝ նա կարող է թաքնվել կամ կատարել քրեական օրենսգրքով արգելված արարք: Ռ.Բալոյանը հայտնեց նաև, որ իր պաշտպանյալը տառապում է ծանր հիվանդությամբ:

Դատախազության մոդան է բոլորին կալանավայրեր լցնել, ասաց պաշտպանը՝ միաժամանակ շնորհակալություն հայտնելով, որ որոշ դատավորներ կոտրում են այդ կարծրատիպերը:

Պաշտպանը հայտնեց, որ մեկ անձի մասով վնասի հատուցման հարցը լուծված է, իսկ մյուս մասով մեծ գումար են պահանջում, և իր պաշտպանյալը չի կարողանում այն վճարել: Ռ.Բալոյանը նաև հայտարարեց, որ ամբաստանյալի հարազատները ի վիճակի չեն կալանավայրում նրան պահել:

Պաշտպանը միջնորդեց որպես գրավի չափ սահմանել մեկ մլն դրամը:

Միջնորդության քննարկումը կշարունակվի արդեն հաջորդ դատական նիստում:

Ըստ մեղադրանքի, Լևոն Խաչատրյանը 14.06.2017թ ժամը 11:20-ի սահմաններում իր անձնական օգտագործման ԲՄՎ մակնիշի ավտոմեքենայով երթևեկել է Բաբաջանյան փողոցի կողմից Անդրանիկի փողոցի ուղղությամբ Բաբաջանյան 140 շ մոտ վրաերթի է ենթարկել Ծ. Գրիգորյանին և մանկահասակ Ս. Գևորգյանին, նրանց պառճառել է մահ:

Լևոն Խաչատրյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասով՝ Ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու և ավելի մարդու մահ:

Աղբյուր` Փաստինֆո