Փաստ ինֆո

Այսօր՝ ապրիլի 11-ին, Ստեփանակերտում տեղի է ունեցել «Զարամասի հրամանատարի անձնակազմի հետ տարվող աշխատանքների (ԱՀՏԱ) գծով տեղակալի աշխատանքը՝ մարտի բարոյահոգեբանական ապահովման, (ԲՀԱ) պլանավորման, անձնակազմի ուսումնադաստիարակչական գործընթացի կազմակերպման գործում: Հիմնախնդիրներ և լուծման ուղիներ» թեմայով համաբանակային կոնֆերանս:

«Արցախպրես»-ի թղթակցի հաղորդմամբ՝ կոնֆերանսը վարող ԱՀ ՊԲ հրամանատարի ԱՀՏԱ գծով տեղակալ, գեներալ-մայոր Վարդան Բալայանը, ողջունելով  ներկաներին,  ընդգծել  է, որ  քննարկվող թեման արդիական է  ու կարևոր:

«Մենք պետք է միշտ գիտակցենք, թե բանակում ինչ կարևոր նշանակություն ունի զինվորների մարտական ամուր ոգին: Դրա ապացույցը մարտական գործողություններում նրանց արձանագրած   հաղթանակներն  են»,-  մասնավորապես  նշել  է Վ.Բալայանը:

Միջոցառման  ընթացքում  ՊԲ  ԱՀՏԱ   գծով    սպաները  հանդես  են  եկել  մարտի  բարոյահոգեբանական  ապահովման  պլանավորումը  պետական  կառույցների  հետ  փոխգործակցության,  տեղեկատվական-դաստիարակչական, հոգեբանական, սոցիալ-իրավական, մշակութաժամանցային, ռազմատեղեկատվական աշխատանքների կազմակերպման և հակառակորդի տեղեկատվական-հոգեբանական  ազդեցությունից  անձնակազմի   պաշտպանության  կազմակերպման    մասին  ելույթներով: 

Կոնֆերանսին ներկա ՀՀ ՊՆ տեղեկատվության և հասարակայնության հետ կապերի վարչության պետ Գևորգ Ալթունյանն էլ ասել է, որ զինվորի և սպայի հոգեբանական   պատրաստվածությունն  անընդհատ  գործընթաց  է: 

Ըստ  Գ.Ալթունյանի՝  չի  կարելի մտածել, որ  եթե ունենք հոգեբանորեն  պատրաստված  զինվոր, ապա  այդ  ուղղությամբ  աշխատանքն     արդեն ավարտված  է:

«Այդ  ուղղությամբ  շարունակական աշխատանք  պիտի տարվի, միշտ զգոն  պիտի լինենք ու սթափ, որ կարողանանք դիմակայել թշնամուն: Մենք պետք է լինենք  նաև նախահարձակողի կարգավիճակում  և փորձենք  միշտ  մեկ  քայլ առաջ  լինել  հակառակորդից: Այդ առումով բանակում մեծ դերակատարություն  ունեն  հոգևոր  սպասավորները, քանի որ նրանք նաև   հոգեբանական  ծառայություն  են  մատուցում»,-ավելացրել  է  Գ.Ալթունյանը:

N զորամասի հոգևոր սպասավոր Սարգիս սարկավագ  Աբյանն իր ելույթում նշել է, որ  առանց հավատի  հզոր   բանակ դժվար  է պատկերացնել: Նրա խոսքով՝ դարեր շարունակ հայ  ժողովրդի   պայքարը նաև  հավատի համար  էր,  այսօր՝  նույնպես.  այդ  գիտակցումով և մեծ հավատով զինվորը պետք է ելնի մարտի դաշտ: 

ԱՀ պաշտանության բանակին առընթեր կանանց խորհրդի նախագահ Ռոմելա Դադայանը, խոսելով բանակ-հասարակություն կապի մասին, նշել է, որ այն մշտապես իրենց ուշադրության  կենտրոնում  է և իրենք պարբերաբար  այցելում    են զորամասեր, լինում  առաջնագծում,  հանդիպում, ինչպես  զինվորների, այնպես էլ տարբեր  ստորաբաժանումների   ղեկավարների,  գնդի հրամանատարների  հետ  և քննարկում  բանակին   առնչվող  խնդիրներ՝  հնարավորինս  դրանց  տալով  ճիշտ լուծումներ: 

Կոնֆերանսին ներկա  էին զինվորականներ, հոգևոր սպասավորներ, հասարակական  կազմակերպության անդամներ, ԶԼՄ-ների  ներկայացուցիչներ: 

Աղբյուր` Փաստինֆո