Փաստ ինֆո

«Հայբիզնեսբանկ» ՓԲԸ վարչության նախկին նախագահ Արա Կիրակոսյանի վերաբերյալ դատարանում քննվում է առևտրային կազմակերպության ծառայողի կողմից լիազորությունները չարաշահելու, որն առաջացրել է ծանր հետևանքներ, մեղադրանքով գործը:

Ըստ մեղադրանքի, Արա Կիրակոսյանը՝ հանդիսանալով «Հայբիզնեսբանկ» ՓԲԸ վարչության նախագահը, նույն Բանկում իր անվամբ ձևակերպված 344.000 ԱՄՆ դոլար գումարի վարկը մարելու, բացի այդ, իր քրոջ ամուսնուն` Արմեն Հովհաննիսյանին պատկանող ՌԴ Մոսկվա քաղաքում գրանցված «Էրմանո» ՍՊԸ ընկերության ունեցած 101.000 ԱՄՆ դոլար գումարի չափով վարկային պարտավորությունների կատարումը հետաձգելու նպատակով, իր լիազորություններն ընկերության շահերին հակառակ, իր և հիշատակված անձի օգտին օգտագործելով, 01.02.2013թ. հրավիրել է վարչության արտահերթ նիստ, որում ձայների մեծամասնությամբ ընդունվել է «Էրմանո» ՍՊԸ-ին 445.000 ԱՄՆ դոլար վարկի տրամադրումը հաստատելու վերաբերյալ որոշումը: Դրա արդյունքում կազմվել է վարկային պայմանագիր:

2013թ. փետրվարի դրությամբ «Հայբիզնեսբանկի» ծրագրային վարկավորման վարչության պետ, գործով վկա Հրաչյա Պետրոսյանը հայտնեց, որ մասնակցել վարկային կոմիտեի նիստին, սակայն ի՞նչ է որոշվել, չի հիշում, որքան հիշում է, «Էրմանո» ՍՊԸ-ին վարկի տրամադրումը հաստատելուն կողմ է քվեարկել, սակայն հաստատ չի կարող ասել: Որևէ մեկը բանկի ղեկավարությունից իրեն չի խնդրել կողմ քվեարկել: Ըստ վկայի, ինքը չի հիշում նաև, թե որքան գումարի վարկ է տրամադրվել:

Վկան հայտնեց, որ Բանկի վարչության նախագահի ու վարկառու կազմակերպության սեփականատիրոջ միջև բարեկամական կապի մասին իմացել է գործի քննության ընթացքում:

Էական հակասությունների պատճառով հրապարակվեց վկայի նախաքննական ցուցմունքը, որում նա, մասնավորապես, նշել է Բանկի վարչության նախագահի՝ վարկառու կազմակերպության սեփականատիրոջ հետ բարեկամական կապի մասին: Վկան նախաքննության ժամանակ՝ ի պատասխան քննիչի հարցին, հայտնել է, որ բանկի վարչության նախագահն իր վերադասն է, և ինքը լիազորություն չի ունեցել, որպեսզի բարեկամական կապի առկայության հետ կապված արգելի վարչության նախագահին մասնակցել քվեարկությանը: Վկան հայտնել է նաև, որ Արա Կիրակոսյանը չի առաջարկել իրեն կողմ քվեարկել:

Դատարանում պաշտպանական կողմի ու վկայի միջև քննարկում ծավալվեց բարեկամ-ազգակից հասկացությունների միջև տարբերությունների ու վկայի սուբյեկտիվ ընկալումների շուրջ: Ի պատասխան՝ հնչեց ընդհանրական պատասխան՝ ում ճանաչում ես, բարեկամ է, ի պատասխան դատարանի ճշտող հարցի՝ վկան պատասխանեց՝ կան հարևաններ, որ բարեկամից էլ մոտ են: Ուրեմն, ոչ բոլոր ճանաչածներն են բարեկամ, եզրահանգեց դատարանը:

2013թ. փետրվարի դրությամբ Բանկի վարչության նախագահի տեղակալ, վկա Խաչատուր Տոնոյանը հայտնեց, որ հաճախորդը նախկինում ունեցել է վարկ, հետագայում չի մարել վարկը, սեփականատերը որոշել է, որ առկա է իրավապահների ուշադրությանն արժանի արարք:
Ըստ վկայի, բանկի վարչության նախագահի ու վարկառուի միջև փեսա-աներ հարաբերությունների մասին իմացել է սկզբնական վարկը տալուց հետո: Խնդրե՞լ են, որ վարկի տրամադրումը հասատատելուն կողմ քվեարկեք հարցին վկան պատասխանեց՝ ընդհանրապես նման բան չի եղել:

Վկան նաև նշեց, որ կարևոր է ճանաչել ո՞վ է վարկառուն, ի՞նչ հեղինակություն ունի:

Արա Կիրակոսյանի դիրքորոշումն ազդե՞լ է վկայի դիրքորոշման վրա՝ պաշտպանական կողմի հարցին, վկան բացասական պատասխան տվեց:

Ա.Կիրակոսյանի պաշտպան Հայկ Ալումյանը առարկեց վկայի նախաքննական ցուցմունքը հրապարակելու դեմ՝ ընդգծելով, որ վկան ասում է՝ չի հիշում, այսինքն՝ նախաքննական ու դատաքննական ցուցմունքների միջև հակասություններ չկան:

Դատարանը, սակայն, գտավ, որ արդար դատաքննության սկզբունքից ելնելով՝ նախաքննական ցուցմունքը պետք է հրապարակվի:

Քրեական դատավարության շրջանակներում արդար դատաքննության սկզբունքը միայն ու միայն վերաբերվում է պաշտպանական կողմին, սակայն դատարանը՝ պաշտպանական կողմին հակառակ գործողություններ է անում, դատարանի որոշման դեմ առարկեց Հայկ Ալումյանը:

Նախաքննության ժամանակ վկան հայտնել է, որ հետագայում իմացել է, որ վարկառուն Արա Կիրակոսյանի բարեկամը կամ ծանոթն է: Վկան հայտնել է նաև, որ իր լիազորությունների մեջ չի մտել բանկի վարչության նախագահին արգելել մասնակցելու քվեարկությանը:

Այսօր դատարանում հարցաքննվեց նաև վկա Առաքել Գաբրիելյանը, ով 2013թ. փետրվարի դրությամբ զբաղեցրել է բանկի ռիսկերի կառավարման դեպարտամենտի տնօրենի պաշտոնը, նա Արա Կիրակոսյանի մորաքրոջ որդին է: Նա հայտարարեց, որ վարկի տրամադրման մանրամասներ չի հիշում: Մասնակցե՞լ եք վարկային կոմիտեի նիստին՝ չեմ հիշում, ասաց վկան: Իմացել եք, որ Ձեր ազգականի ամուսնու հարցն է քննարկվում՝ չեմ հիշում մանրամասները: Վկան չհիշեց նաև, թե հիշյալ նիստին ով էր նախագահում: Պաշտպանական կողմի հարցին, թե ամբաստանյալն որևէ կերպ իր կարծիքը հայտնե՞լ է վարկի տրամադրման մասին, վկան պատասխանեց՝ ոչ:

Մեղադրողը միջնորդեց հրապարակել վկայի նախաքննության ցուցմունքը՝ անգամ չնշելով դատաքննության ցուցմունքների հետ հակասությունների մասին: Դատարանը՝ համաձայնվելով պաշտպան Ալումյանի հետ, որ չնշվեց ցուցմունքները հրապարակելու որևէ հիմք, սակայն արդար դատաքննության սկզբունքից ու արդարադատության շահից ելնելով բավարարեց միջնորդությունը:

Հաջորդ դատական նիստին բերման կենթարկվեն մի շարք վկաներ, այդ թվում՝ Արմեն Հովհաննիսյանը:

Աղբյուր` Փաստինֆո