Փաստ ինֆո

«Լիա» գեղեցկության սրահում «ռազբորկայի» և սպանության գործով այսօրվա դատական նիստում լրացուցիչ հարցաքննվեցին մի շարք վկաներ՝ մի շարք հանգամանքների շուրջ: Վկաներին լրացուցիչ հարցաքննելու միջնորդությամբ հանդես է եկել մեղադրող կողմը:

Վկա Արամ Պետրոսյանն իր նախաքննական ցուցմունքում ասել էր, որ Մուշեղ Մուշեղյանը վազել է դեպի շքամուտքի դուռը, սակայն դուռը փակ է եղել, Գևորգ Ավետիսյանը վազել է նրա հետևից, նա ու այլ անձինք հարվածել են Մուշեղյանին (Մուշեղյանն ու Ավետիսյանը միջադեպի ժամանակ կյանքի հետ անհամատեղելի վնասվածքներ են ստացել ու մահացել): Մեղադրողի այս կապակցությամբ հնչեցրած հարցին ի պատասխան վկա Արտակ Նազարյանը հայտարարեց, որ ինքը նախաքննության ժամանակ չի ասել, որ Մուշեղ Մուշեղյանը վազել է դեպի դուռը, այլ ասել է, որ հետ-հետ է գնացել դեպի շքամուտքի դուռը: Վկան ասաց նաև, որ ինքը ուշ է գնացել դեպքի վայր ու տեսել է միայն, որ Մուշեղ Մուշեղյանը կանգնած վիճակում զենքը հանել է ու սկսել է կրակել: Գևորգ Ավետիսյանն էլ դանակ է հանել ու գրկախառնվել Մուշեղին, իսկ դանակով հարվածելու պահը վկան չի տեսել: Նա ասաց նաև, որ ուշ է գնացել, ընդամենը մի րոպե է ներկա եղել:

Վկա Արման Հարությունյանն էլ հայտնեց, որ Գևորգն ու Մուշեղն իրար հետ վիճում էին: Արդյոք իրականությունը համապատասխանո՞ւմ է, որ Մուշեղ Մուշեղյանը կրակոցներ է արձակել պառկած վիճակից՝ վկան ասաց, որ չի տեսել:

Մեղադրողի այն հարցին, թե ըստ հեռախոսային խոսակցությունների գաղտնալսումների, ամբաստանյալ Պետրոս Իսրայելյանը խոսակցության մեջ ասում է՝ որ ինքը տվել է, այսինքն՝ խփել է Մուշեղ Մուշեղյանին, հետո այլ անձինք էլ են տվել, ճի՞շտ է, հնչեց պատախանը՝ ոչ, չեմ տեսել: Իսկ որ Պետրոս Իսրայելյանը Բդոյին՝ ամբաստանյալ Արմեն Գասպարյանին, ասում է մորթի՞ն, ո՞ւմ մորթին մեղադրողի հարցին վկան պատասխանեց՝ չափազանցրել է:

Վկա Արսեն Սիմոնյանը հայտարարեց, որ միջադեպն երկու անձի՝ Մուշեղի ու Գևորգի, միջև է եղել:

Արդյոք միայն հանգուցյալների մասին խոսելը պայմանավորված չէ այն հանգամանքով, որ Ալիկ Բանդուրյանն՝ իմանալով, որ Մուշեղը մահացած է, ասել է «դուխով կարան վրեն գրեն աջ ու ձախ»:

Մեղադրողը հարց ուղղելիս հնչեցրեց «մեռել» բառը, ինչին ի պատասխան դատարանը հորդորեց հարգանքով վերաբերվել հանգուցյալներին: Մեղադրողը, սակայն, տեսակետ հայտնեց, որ «մեռելն» ու «հանգուցյալը» նույն բանն են:

Վկա Արամ Պետրոսյանն էլ հայտարարեց, որ Մուշեղին ընկած չի տեսել: Այն հարցին, թե Ալիկ Բանդուրյանի ասածով չէ, արդյոք, պայմանավորված, որ միայն հանգուցյալների մասին է ցուցմունք տալիս, վկան պատասխանեց՝ ինչ տեսել եմ, այն էլ ասում եմ: Վկայի հարցաքննության ժամանակ վերջինս՝ դիմելով մեղադրողներին, օգտագործեց «եթե մարդավարի ասեք» արտահայտությունը, ինչի համար դատարանը վկային նկատողություն հայտարարեց: Դատարանը նաև դիտողություն արեց մեղադրողներին՝ պահանջելով վկաներին դիմել «դուք»-ով:

Վկան՝ ի պատասխան դատարանի հարցի՝ ասաց՝ «հա ջան», ասել կուզեր՝ ինչպե՞ս, դատարանը պահանջեց, որպեսզի վկան դատարանին դիմի ինչպես հարկն է՝ հարգելի դատարան, ինչպե՞ս:

Հաջորդ դատական նիստում լրացուցիչ կհարցաքննվեն ևս երկու վկաներ, այդ թվում՝ ամբաստանյալ Պետրոս Իսրայելյանի որդին:

Հիշեցնենք, որ ըստ մեղադրանքի, Պետրոս Իսրայելյանը Մուշեղ Մուշեղյանին մորթելու, սատկացնելու, մահակներով ոտքերը ջարդելու և այլ ձևերով վերջինիս առողջությանը մի խումբ անձանց հետ ծանր վնաս պատճառելն իրագործելու վերաբերյալ Ալիկ Բանդուրյանի հորդորների հետևանքով նրա մոտ այլ անձանց հետ համատեղ Մուշեղ Մուշեղյանի առողջությանը ծանր վնաս պատճառելու վճռականություն է առաջացել: Դրանից հետո նախնական համաձայնության գալով Գևորգ Ավետիսյանի և քննությամբ չպարզված անձանց հետ` խմբի կազմում, Ալիկ Բանդուրյանի օժանդակությամբ նա իրագործել է Մուշեղ Մուշեղյանի նկատմամբ պլանավորված հանցավոր ոտնձգությունը, սակայն հանդիպելով Մուշեղ Մուշեղյանի զինված դիմադրությանը` վերջինիս կողմից անհրաժեշտ պաշտպանության վիճակում ատրճանակով կրակոցներ արձակելուն, Մուշեղ Մուշեղյանի դիմադրությունը հաղթահարելու և այդ ժամանակ ծագած Մուշեղ Մուշեղյանին սպանելու հանցավոր դիտավորությունն ավարտին հասցնելու նպատակով ապօրինաբար վերջինիս ուղղակի դիտավորությամբ զրկել է կյանքից:

Աղբյուր` Փաստինֆո