Փաստ ինֆո

Ռոսսելխոզնադզորն ապրիլի 11-ից կստուգի լոլիկի հայ արտադրողներին թուրքական արտադրանքի վերարտահանման կասկածի պատճառով:

Այդ մասին, ինչպես տեղեկացնում Է «Արմենպրես»-ը, հայտնել Է գերատեսչությունը՝ ամփոփելով Հայաստանի գյուղատնտեսության նախարարության սննդամթերքի անվտանգության պետական ծառայության հետ կայացած բանակցությունների արդյունքները: «Ռուսական կողմն անհանգստություն Է հայտնել, որ ներկայում Հայաստանի Հանրապետությունում նպաստավոր իրադրություն Է ստեղծվել Հայաստանի Հանրապետության տարածքում արտադրված լոլիկի տեսքով թուրքական ծագման լոլիկի մատակարարումների համար… Կողմերը պայմանավորվել են լոլիկի արտադրության հայկական ձեռնարկությունների գործունեության ստուգումներ անցկացնել ապրիլի 11-ից»,-ասված Է հաղորդագրության մեջ:

Ռուսական գերատեսչության տվյալներով՝ ՌԴ-ի շուկային լոլիկ Է մատակարարվում առավելապես երկու արտահանող կազմակերպությունների՝ «Սպայկա» ՍՊԸ-ի եւ «Գրինպրոդուկտ» ՍՊԸ-ի կողմից, որոնք ունեն ինչպես սեփական արտադրական տարածքներ, այնպես Էլ զբաղվում են տարբեր արտադրողներից լոլիկի գնմամբ: Ինչպես նշել Է ռուսական ծառայությունը, լոլիկի արտադրության ծավալների եւ դրա բեռնառաքման ինտենսիվության մեծացումը վկայում Է հայկական կողմից լոլիկի, այդ թվում՝ թուրքական ծագման, հնարավոր վերարտահանման մասին: Հայաստանից ՌԴ-ին լոլիկի մատակարարումների հետ կապված իրադրությունը պարզելու համար Ռոսսելխոզնադզորն հայկական կողմից տեղեկատվություն Է խնդրել 2018 թվականին լոլիկի արտադրողների, դրա աճեցման ծավալների եւ այդ մթերքի արտադրության վայրերի վերաբերյալ: Այն գերատեսչությանը կներկայացվի ապրիլի 10-ին, հաղորդել Է ՌԻԱ Նովոստին:

Աղբյուր` Փաստինֆո