Փաստ ինֆո

Երրորդմասցի Լյովիկի ու նրա ընկերների սպանության աղմկահարույց գործով դատաքննությունը հասել է ավարտական՝ դատաքննությունը լրացնելու միջնորդությունների, փուլին:

Այսօրվա դատական նիստում պաշտպանական կողմը դատարանին ներկայացրեց մի շարք միջնորդություններ ապացույցներն օգտագործման համար անթույլատրելի ճանաչելու մասին: Դատարանը բոլոր դեպքերում նույն որոշումը կայացրեց՝ միջնորդության լուծումը հետաձգել մինչև էական հանգամանքների պարզումը, այն է՝ գնահատական տալ ապացույցին՝ այլ ապացույցների համակցությամբ, խորհրդակցական սենյակում դատական ակտ կայացնելիս:

Մասնավորապես, այսօր գործով երեք ամբաստանյալների պաշտպան Լուսինե Սահակյանը միջնորդեց հաստատել լուսանկարով անձին ճանաչման ներկայացնելու մասին երկու արձանագրություն:

Պաշտպանը նշեց, որ վկան տեսաձայնագրության մեջ ասում է՝ նմանեցնում եմ, վստահ չեմ, մինչդեռ քննիչն արձանագրության մեջ գրվել է՝ վստահ է (որ ներկայումս ամբաստանյալներից մեկն է): Վկան նաև ճանաչման համար ներկայացված չորս լուսանկարներից ճանաչել է մեկում պատկերվածին՝ «չախկալ աչքերից ու նոսր մազերից»: Պաշտպանն ընդգծեց, որ այդպիսի հատկանիշներ ունեցել է լուսանկարներում պատկերված չորս անձանցից միայն մեկը: Դա, նշեց պաշտպանը, Քրեական դատավարության օրենսգրքի համապատասխան նորմի խախտում է, ճանաչման ներկայացված լուսանկարներում պատկերված մարդիկ պետք է իրար նման լինել: Հակադարձելով մեղադրող Արամ Արամյանի առարկությանը՝ պաշտպանը հայտարարեց՝ նման են, որովհետև դրանք աչքե՞ր են:

Լուսինե Սահակյանը նաև հակադարձեց վկայի հայտնածի վերաբերյալ մեղադրողի ասածին՝ մի բառ այս կողմ, մի բառ այն կողմ, պաշտպանը հիշեցրեց, որ իր պաշտպանյալները սպանությա՛ն մեջ են մեղադրվում: Նա հավելեց, որ ինքն իր տեսածին ու լսածին է հավատում և ոչ թե քննիչի արձանագրածին: Պաշտպանի հայտարարություններին միացան նաև ամբաստանյալները, որակելով արձանագրությունն որպես միրաժ, «սուտ, բայց հետաքրքիր»:

Պաշտպանը մեկ այլ միջնորդությամբ վիճարկեց լուսանկարով անձին ճանաչման ներկայացնելու մասին ևս մեկ արձանագրություն: Ըստ դրա, վկան աչքերի ու քթի տեսքից ճանաչել է ներկայիս ամբաստանյալներից մեկին: Ըստ պաշտպանի, արձանագրությունը չի համապատասխանում գործողությանը: Տեսագրության մեջ երևում է, թե ինչպես է վկան նայում փաստաթղթերին, որի վրա փակցված է ճանաչման ենթակա անձի լուսանկարը: Բացի այդ, այս դեպքում ճանաչման ներկայացված լուսանկարներում պատկերված անձինք բացարձակապես նման չեն իրար:

Լ.Սահակյանը ևս մեկ միջնորդությամբ վիճարկեց նաև դեպքի վայրի զննության արձանագրությունը, ինչպես նաև զննության ենթարկված իրեղեն ապացույցների, մասնավորապես՝ զենքի, փորձաքննությունների եզրակացությունները և միջնորդեց հաստատել դրանց օգտագործման անթույլատրելիությունը: Ըստ Լուսինե Սահակյանի, վիճարկվող արձանագրությունները կազմվել են օրենքի խախտմամբ: Մասնավորապես, դատարանում հարցաքննված ընթերականերն էլ են հայտնել, որ էպիզոդիկ են ներկա գտնվել զննությանը և որ զննության ներկայացված զենքերը պատշաճ փաթեթավորված չեն եղել: Այսինքն՝ չի բացառվել այդ առարկաների վրա որևէ ներգործության հնարավորությունը: Այդ առարկաները չեն կարող ունենալ իրեղեն ապացույցի նշանակություն, ուստի և պետք է օգտագործման համար անթույլատրելի ճանաչվեն, ասաց Լուսինե Սահակյանը:
Հաջորդ նիստում պաշտպանական կողմը կշարունակի ներկայացնել միջնորդությունները:

Հիշեցնենք, որ գործով ամբաստանյալներն երեքն են՝ «Գաստիկ» մականվամբ Վահան Հակոբյանը, «Տլե» մականվամբ Սարգիս Հախանումյանն ու «Ծգլ» մականվամբ Սարգիս Գրիգորյանը:

Ըստ մեղադրական եզրակացության, Վահան Հակոբյանը մի խումբ անձանց կողմից նախնական համաձայնությամբ ապօրինի ձեռք է բերել և պահել մարտական ակոսափող հրազեն հանդիսացող` 1963թ. գործարանային արտադրության 7,62 մմ տրամաչափի «ԱԿՄՍ» տեսակի ինքնաձիգ, 1976թ. գործարանային արտադրության 7,62 մմ տրամաչափի «ԱԿՄ» տեսակի ինքնաձիգ և 1960թ. գործարանային արտադրության 7,62 մմ տրամաչափի «ԱԿՄ» տեսակի ինքնաձիգ , որոնք ապահովված են եղել պահունակներով, ինչպես նաև ռազմամթերք հանդիսացող փամփուշտներով:

Ըստ մեղադրանքի, 2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը և Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու և ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգերից կրակահերթ են արձակել (առնվազն 82 փամփուշտ) Լևոն Ղազարյանի, Դրաստամատ Թադևոսյանի և Մեսրոպ Նազարյանցի ուղղությամբ, որի հետևանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադևոսյանը «Էրեբունի» բժշկական կենտրոն տեղափոխվելու ճանապարհին մահացել են:

Նախաքննական մարմինը որպես սպանության դրդապատճառ նշել է այն, որ Վահան Հակոբյանը «լարված, անբարյացակամ, գժտված վիճակում» է եղել Լևոն Ղազարյանի ու նրա շրջապատի հետ և, ըստ մեղադրական եզրակացության, սպանությունը կատարվել է վրեժխնդրությունից դրդված:

Աղբյուր` Փաստինֆո