Փաստ ինֆո

Կաբարդինո-Բալկարիայից առանց ձեռքերի հաշմանդամ Ասլան Իրիտովը դարձել է իշխանության ներկայացուցչի նկատմամբ բռնություն գործադրելու վերաբերյալ քրեական գործով ֆիգուրանտ: Ըստ մեղադրանքի, նա ոստիկանի վզից բռնել է երկու ձեռքերի ոսկրերով և սեղմել է ձեռքերի մատները վզի շրջանում: Այդ մասին, ըստ lenta.ru-ի, ասվում է Իրիտովի ու նրա եղբոր Բեսլանի դեմ գործի նյութերում, հաղորդում է «Ընդդեմ խոշտանգումների կոմիտեն»:

Իրիտովների դեմ գործը հարուցվել է հինգ ամիս առաջ, սակայն ծանոթանալ դրա նյութերին, ինչպես նաև միջադեպի վայրից տեսաձայնագրությանը տղամարդկանց հաջողվել է միայն հիմա: «Խոշտանգումների դեմ կոմիտեն» չի ճշտում, թե փաստաթղթերում հիշատակվո՞ւմ են, արդյոք, ինչ-որ վնասվածքներ, որոնք ստացել են ուժայինները, սակայն ոստիկանների հետ հանդիպումից հետո Իրիտովների ընտանիքի չորս անդամի մոտ եղել են տարբեր վնասվածքներ ու կոտրվածքներ, սակայն այդ կապակցությամբ որևէ քննություն չի տարվել:

«Այդ ֆոնին լրիվ այլ տեսք ունի Իրիտովների հանդեպ քրեական գործի քննությունը: Գործը հարուցվել է անմիջապես, հայտարարություն տալու օրը: Քննիչներին նախկինի պես չեն շփոթեցնում ոստիկանության աշխատակիցների ցուցմունքների՝ միջադեպի տեսաձայնագրության հետ լուրջ հակասությունները: Կան նաև պարզապես աբսուրդային եզրակացություններ առ այն, որ հաշմանդամ Ասլան Իրիտովը, ում մոտ բացակայում են դաստակները, իբրև թե դրանցով խեղդում էր ոստիկանին, ընդ որում, սեղմելով նրա վիզը մատներով: Եվ քննության այդ եզրակացությունները տարօրինակ ձևով ձեռք են տվել դատախազությանը»,- նշել է կազմակերպության իրավաբան Մագոմեդ Ալամովը:

Ինչպես իրավապաշտպաններին պատմել են Իրիտովները, 2017թ. հոկտեմբերի 31-ին ուժայինները ծեծի են ենթարկել իրենց ամբողջ ընտանիքը Նալչիկում իրենց սեփական տան բակում: Այդ օրը համազգեստով ու քաղաքացիական հագուստով ոստիկանները եկել են իրենց մոտ ու պահանջել փողոց դուրս բերել տանտիրոջը: Ի պատասխան՝ Ասլան Իրիտովի դուստրն ու կինը պահանջել են փաստաթուղթ ներկայացնել, իսկ նրա եղբայր Բեսլանը վրդովվել է, որ եկածները իրենց բակը տեսանկարել են, և փորձել է վռնդել: Հաշմանդամը երկար ժամանակ հագնվում էր և երբ վերջապես բակ է դուրս եկել, այնտեղ են վազել դիմակավոր զինված մարդիկ: Նրանք տապալել են տանտիրոջը գետնին, որի հետևանքով նա գլխով խփվել է բորդյուրին, ապա նրան գլխով սեղմել են ասֆալտին ու սեղմել կոկորդը: Ըստ ընտանիքի պատմածի, մինչ նա պառկած է եղել, նրան մի քանի անգամ խփել են գլխին ու մարմնին: Հարվածել են նրա եղբոր քունքին, ոլորելով երկուսին քաշ տվել դեպի միկրոավտոբուսը: Ճանապարհին կոտրել են Բեսլանի կողոսկրը, իսկ Ասլանին գցել են գետին ու քաշ տվել գետնով:

Ոստիկանության բաժնում Բեսլան Իրիտովն իրեն վատ է զգացել, և նրա համար շտապօգնություն են կանչել: Բժիշկները նրա մոտ ախտորոշել են ճմլվածքներ, ունեցել են կոտրվածքի կասկած ու պահանջել ուղարկել տղամարդուն վնասվածքային կետ: Ավելի ուշ եղբայրներին բաց են թողել:

Քաշքշուկի հետևանքով տանտիրոջ կնոջ՝ Մարինա Իրիտովայի, ձեռքի մատը կոտրվել է: Իսկ դստերը՝ Անժելիկային, դեմքով հարվածել են հատակին ու վնասել նրա քիթը: Ընտանիքի՝ Քննչական կոմիտե դիմելուց հետո Իրիտով եղբայրներին մեղադրել են ոստիկանների վրա հարձակվելու մեջ, իսկ ոստիկանների գործողություններում քննիչը ոչ մի հակաիրավական բան չի գտել:

Աղբյուր` Փաստինֆո