Փաստ ինֆո

Ապրիլի 2-ին Հյուսիսային պողոտայում գտնվող «Բուրգեր Քինգ» արագ սննդի կետում պայթյուն որոտաց: Ըստ նախնական վարկածի՝ պայթել էր գարեջրի ճնշումն ապահովող գլանատակառը. արդյունքում 8 անձինք տուժեցին, այդ թվում նաև՝ անչափահասներ:

Դեպքից օրեր են անցել, իրավապահները պայթյունի հանգամանքներն են պարզում, հանձնարարականներ են տրվում ընդհուպ մինչև երկրի վարչապետի կողմից՝ սեղմ ժամկետներում վերացնել հանրային օբյեկտներում տեխնիկական անվտանգության խնդիրները:

Ի՞նչ է ստացվում, ողբերգական ելքով միջադեպ պետք է գրանցվեր, որպեսզի խնդրին լուրջ մոտեցում ցուցաբերվե՞ր, իսկ ով կարող է վստահեցնել, որ Երևանում գործող տասնյակ հարյուրավոր սննդի կետերում առկա չէ նմանատիպ իրավիճակ:

«Փաստինֆո»-ին հաջողվեց պարզել, որ սննդի կետերում ալկոհոլային խմիչքների վաճառքի թույլտվություն տալուց հետո որևէ կառույցի կողմից տեղազննություն չի իրականացվում շինությունում՝ պարզելու համար արդյո՞ք անվտանգության կանոնները պահպանվում է, թե՝ ոչ:

Այսպիսով, «Բուրգեր Քինգ» արագ սննդի կետը 2017 թվականի նոյեմբերին, օրենքով սահմանված կարգով, ստացել է ալկոհոլային խմիչքների վաճառքի թույլտվություն, սակայն այդ թույլտվության ժամկետը լրացել է մեկ ամիս անց՝ 2017 թվականի դեկտեմբերին։

Հաջորդիվ ընկերությունը դիմել է՝ թույլտվության ժամկետը երկարացնելու համար, սակայն առանց դիմումի պատասխանն ստանալու շարունակել է վաճառել ալկոհոլային խմիչքներ, այդ թվում՝ լցնովի գարեջուր:

Կենտրոն վարչական տարածքի ղեկավարը հայտարարել է, թե տնտեսվարող սուբյեկտը չի դիմել՝ երկարացնելու համար, մինչդեռ «Փաստինֆո»-ն ունի ապացույցներ, որ անգամ ալկոհոլային խմբիչքների վաճառքի համար տնտեսվարող սուբյեկտը հունվարի 8-ին կատարել է համապասխան բյուջետային փոխանցումը, սակայն թույլտվության տրամադրման փաստաթուղթը չի ձևակերպվել իրավասու մարմինների կողմից։ Պաշտոնապես պատճառաբանվում է, թե հայտ չեն ստացել, իսկ որ տնտեսվարողը գումար է փոխանցել, դա, պարզվում է, վարչական տարածքի ղեկավարությանը չի մտահոգել և ոչ էլ հարկ են համարել վերադարձնել, անգամ այս ամիսների ընթացքում հարկ չեն համարել նախազգուշացնել, որ տնտեսվարողը անօրինականան գործունեություն է իրականացնում:

Բացի այդ, պարզվում է, որ ոգելից և ալկոհոլային խմիչքների վաճառքի թույլտվություն տրամադրելիս նախատեսված չի կատարել շինության տեղազննություն, այլ հիմք է հանդիսանում բացառապես վճարման անդորրագիրը և ներկայացված համապատասխան հայտը:

Թերևս այդ մասին, ի պատասխան վարույթն իրականացնող մարմնի, հայտնել է Երևան քաղաքի կենտրոն վարչական շրջանի ղեկավարը:

Ի՞նչ է ստացվում՝ ով գումար ունի և կարող է վճարել ձեռք բերել թույլտվություն սննդի կետերում ալկոհոլային խմիչքների վաճառքի վերաբերյալ, ապա կարող է հանգիստ վաճառել ոգելից և ալկոհոլային խմիչքներ, քանի որ որևէ մեկը չի այցելելու և տարածքում զննություն չի իրականացնելու, թե որքանով են անվտանգության պայմաններն ապահովված: Նկատենք, որ խոսքը չի գնում միայն շշալցված ալկոհոլային խմիչքների վաճառքի, այլ օրինակ լցնովի գարեջրի կամ գազավորված ոչ ալկոհոլային խմիչքների մասին։

Որտե՞ղ պետք է տեղադրվեն ճնշումն ապահովող բալոնները, ջեռոցների կողքին կարո՞ղ են տեղադրվել, թե՝ ոչ, ի՞նչ պայմանների դրանք պետք է համապատասխանեն։ Կենտրոն համայնքի ղեկավարն ասում է, թե նման պահանջներ չկան, այսինքն՝ միայն իրենց փողի տերն են և ոչինչ, որ դրանից կարող են տուժել հաճախորդները։

Նման պարագայում հարց է առաջանում՝ Երևանում քանի՞ այդպիսի սննդի կետեր են գործում և ո՞վ կարող է վստահեցնել, որ հերթական պայթյունը չի գրանցվի և չի վտանգվի հաճախորդների կյանքն ու անվտանգությունը։

Հիշեցնենք, որ պայթյունի դեպքի առթիվ ՀՀ ՔԿ ԵՔՔՎ Կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 279-րդ հոդվածի 2-րդ մասի 2-րդ կետով, ստեղծվել է քննչական խումբ, մշակվել քննչական պլան, առգրավվել սննդի կետում առկա անվտանգության տեսանկարահանող սարքերի տեսագրությունները։

Նախնական վարկածի համաձայն՝ «Բուրգեր Քինգ» արագ սննդի կետում պայթել է գարեջրի ճնշումն ապահովող գլանատակառը, որի պատճառները պարզելու համար նշանակվել է պայթյունատեխնիկական փորձաքննություն։

Հեղինակ՝ Էլեն Առաքելյան

Աղբյուր` Փաստինֆո