Փաստ ինֆո

Հյուսիսային պողոտայում գտնվող «Բուրգեր Քինգ» արագ սննդի կետում պայթյունի հետևանքով վնասվածքներ ստացած 8-ամյա Ռուբինա Մարկոսյանի վիճակը գնահատվում է միջին ծանրության: Այդ մասին լրագրողների հետ զրույցում հայտնել է «Սուրբ Գրիգոր Լուսավորիչ» հիվանդանոցի վերակենդանացման բաժանմունքի վարիչ Սամվել Կարապետյանը։

Մյուս անձանց վնասվածքները թեթև են եղել՝ քերծվածքների և սալջարդերի տեսքով: Վնասվածք ստացած Իրանի Իսլամական հանրապետության քաղաքացի Զեյնաբ Հուսեինին դուրս է գրվել:

Սամվել Կարապետյանի խոսքով՝ տուժածների մի մասն այսօր դուրս կգրվեն՝ նրանցից որևէ մեկի հետ կապված` մտավախություն չկա:

Հիշեցնենք, որ նախօրեին Հյուսիսային պողոտայի թիվ 5 հասցեում գտնվող «Բուրգեր Քինգ» սահմանափակ պատասխանատվության ընկերության արագ սննդի կետի խոհանոցում տեղի է ունեցել է ունեցել ածխաթթու գազի (CO2) 20 կգ-անոց բալոնի պայթյուն:

Տուժել է 8 անձ՝ Ռուդոլֆ Մարկոսյան (2012 թ.), Ռուբինա Մարկոսյան (2010 թ.), Զարուհի Մելիքյան (1999 թ.), Էրիկ Աշուղյան (2002 թ., ԻԻՀ քաղաքացի), Ալյոնա Ագապովա (2003 թ., ՌԴ քաղաքացի), Լիզա Աբրամովա (2004 թ., ՌԴ քաղաքացի), Յարոսլավ Լյուբենկո (2003 թ., ՌԴ քաղաքացի), Զեյնաբ Հուսեինի (1994 թ., ԻԻՀ քաղաքացի):

Մինչ փրկարարների` կանչի վայր հասնելը տուժածները հոսպիտալացվել են «Սուրբ Գրիգոր Լուսավորիչ» ԲԿ:

Ավելի վաղ Քննչական կոմիտեն տեղեկացել է, որ փաստի առթիվ հարուցվել է քրեական գործ՝ ՀՀ քրեական օրենսգրքի 279-րդ հոդվածի 2-րդ մասի 2-րդ կետով, ստեղծվել է քննչական խումբ, մշակվել քննչական պլան, առգրավվել են սննդի կետում առկա անվտանգության տեսանկարահանող սարքերի տեսագրությունները։

8 անձ ճանաչվել է տուժող: Դեպքի էական նշանակություն ունեցող հանգամանքները պարզելու համար նշանակվել են դատաբժշկական, պայթյունատեխնիկական, շինարարատեխնիկական և ապրանքագիտական փորձաքննություններ։

Աղբյուր` Փաստինֆո