Փաստ ինֆո

Ոստիկանների գործողությունների հետևանքով քաղաքացուն աջ ուսագլխի տեղաշարժով և մարմնի տարբեր մասերի սալջարդ տեսքով մարմնական վնասվածքների դեպքի առթիվ «Ընդդեմ իրավական կամայականության» ՀԿ փաստաբան Արա Ղարագյոզյանը բողոք է ներկայացրել Վճռաբեկ դատարան:

Ըստ փաստաբանի, քրեական գործի հարուցումը մերժելու մասին քննիչի որոշումը վերացնելու առաջին ատյանի դատարանի որոշման դեմ դատախազի բողոքը բավարարելով՝ Վերաքննիչ դատարանը թույլ է տվել ՀՀ Սահմանադրության 18-րդ, Քրեական դատավարության օրենսգրքի 290-րդ, 7- րդ, 8-րդ, 9-րդ, 17-րդ հոդվածների, ՄԻԵԿ 6-րդ հոդվածով սահմանված արդար դատաքննության իրավունքի, ինչպես նաև ՄԻԵԿ 3-րդ հոդվածով երաշխավորված խոշտանգումների արգելքի խախտումներ: Ըստ նրա, խախտվել են նաև Եվրոպական կոնվենցիայի 10-րդ հոդվածը արտահայտվելու ազատություն, 11-րդ հոդվածը հավաքների և միավորման ազատության իրավունքները:

ՀԿ կայքում տեղադրված հաղորդագրության համաձայն՝ Արա Ղարագյոզյանն իր բողոքում նշել է, որ Վերաքննիչ դատարանը հանդես է եկել ոչ թե որպես անաչառ դատարան, այլ որպես կանխակալ և կողմնակալ դատարան։

Ըստ փաստաբանի, դատարանի պատճառաբանությունն առ այն, որ վարույթն իրականացնող մարմնի գործողությունները եղել են օրինական, չի բխում գործի նյութերից և ակնհայտ ապօրինի է, քանի որ ՀՀ հատուկ քննչական ծառայությունն որոշում կայացնելով քրեական գործի հարուցումը մերժելու մասին, իսկ Գլխավոր դատախազի տեղակալը փաստաբանի կողմից բողոքը մերժելով, ցուցաբերել են անգործություն:

Մի շարք կարևոր հանգամանքների շուրջ քննություն չիրականացնելով և դրանք փաստող կամ հերքող ապացույցներ ձեռք չբերելով, իսկ ձեռք բերված ապացույցների մեծ մասին տալով միակողմանի գնահատական՝ քողարկվել են ՀՀ ոստիկանության աշխատակիցների կողմից թույլ տրված խախտումները և անօրինական գործողութունները:

21.03.2017 թ. «Ընդդեմ իրավական կամայականության» ՀԿ է դիմել քաղաքացի Լաուրա Զաքարյանը և ներկայացրել հանցագործության մասին հաղորդում: Ըստ քաղաքացու, 18.03.2017 թ. Երևանի Ազատության հրապարակում ներկա է գտնվել Հաց բերող Արթուր Սարգսյանի հուղարկավորելու նպատակով անցկացվող հավաքին: Որոշ ժամանակ անց հավաքված անձանց կողմից կազմակերպվել է երթ դեպի ՀՀ կառավարության շենք, որի ընթացքում ոստիկանության ծառայողները, պահանջելով խտանալ դեպի ճանապարհի հոծ գիծը, սկսել են սեղմել հավաքի մասնակիցներին, առաջացած հրմշտոցի ժամանակ կինը վայր է ընկել, ոստիկաններն էլ նրան բարձրացնելու փոխարեն անցել են ընկած վիճակում գտնվող քաղաքացու վրայով, շարունակելով իրենց բռնի գործողությունները, ինչի հետևանքով էլ կինը ստացել է վերոհիշյալ վնասվածքները:

Հիշյալ հաղորդումը «Ընդդեմ իրավական կամայականության» ՀԿ-ի կողմից ուղարկվել է ՀՀ հատուկ քննչական ծառայություն հետագա ընթացքը լուծելու նպատակով: 14.04.2017թ. ՀՀ հատուկ քննչական ծառայության ՀԿԳ քննիչ` Ա.Ժ.Այվազյանը որոշում է կայացրել քրեական գործի հարուցումը մերժելու մասին, որոշման դեմ բողոք է ներկայացվել ՀՀ Գլխավոր դատախազին, 03.05.2017թ. ՀՀ գլխավոր դատախազի տեղակալ Հ.Ասլանյանը որոշում է կայացրել բողոքը մերժելու մասին:

25.10.2018թ. առաջին ատյանի դատարանը քաղաքացու բողոքը բավարարել է և քրեական գործի հարուցումը մերժելու մասին քննիչի 2017թ. ապրիլի 14-ի որոշումը վերացրել, սակայն առաջին ատյանի դատարանի որոշման դեմ դատախազի կողմից ներկայացված բողոքը 29.01.2018թ. Վերաքննիչ դատարանի որոշմամբ բավարարվել է։

Լուսանկարը՝ Ֆոտոլուրի

Լուսանկարում` փաստաբան Արա Ղարագյոզյանը

Աղբյուր` Փաստինֆո