Փաստ ինֆո

Վրաստանի նախկին նախագահ Միխեիլ Սաակաշվիլին խոստացել է վերադառնալ հայրենիք ու վերջ տալ գործող իշխանությանը: Սաակաշվիլիի տեսադիմումը տեղադրված է Facebook-ում «Միասնական ազգային շարժման» էջում:

«Այսօր տնտեսական վիճակը Վրաստանում կատաստրոֆիկ է: Պատճառը [նախկին վարչապետ, երկրի ամենահարուստ մարդու՝ Բիդզինայի] Իվանիշվիլիի գլխավորած մաֆիայի շվայտությունն է»,- ասել է վրաստանցի նախկին նախագահը: Ըստ նրա, երկրի բնակչությունը փաստացի դարձել է բանկային մաֆիայի պատանդը: «Իվանիշվիլին անում է այն, ինչ անում էր Ռուսաստանում՝ մի քանի բանկերի օգնությամբ վերածել է յուրաքանչյուր վրացական ընտանիքի պարտապանի»,- հավելել է նա:

«Ես ասում եմ այդ մաֆիային, որ մենք կվերացնենք նրա կառավարումը: Մենք վրացական ընտանիքներին, ամեն վրացու և իսկական վրացական գործարարներին՝ միջին ու փոքր բիզնեսի ներկայացուցիչներին, կվերադարձնենք տնտեսական իշխանությունը» , - խոստացել է Սաակաշվիլին:

Ըստ lenta.ru-ի, քաղաքական գործիչը կիսվել է նաև երկրի փրկության իր ծրագրերով: «Իրական վտանգը հաղթահարել կարելի է միայն էկոնոմիկայի ու կենսամակարդակի աճով: Ես մտադիր եմ անձամբ զբաղվել դրանով: Հիմա իմ դեմ մեղադրանք է առաջադրվել մեկ նպատակով, որպեսզի ես անգամ չմտածեմ Վրաստան վերադառնալու մասին: Դուք չեք հասնի դրան: Ես կժամանեմ Վրաստան ու կիրականացնեմ իմ բոլոր ծրագրերն իմ թիմի հետ միասին: Ես վրացի ժողովրդին դժբախտության մեջ չեմ թողնի»,- նշել է նա՝ հավելելով, որ վստահ է, որ արդեն 2018թ. իշխանությունը Վրաստանում կփոխվի:

Նշվում է, որ մարտին Սաակաշվիլին կոչ է արել «Միասնական ազգային շարժման» կողմնակիցներին ակտիվորեն նախապատրաստվել երկրում նախագահական ընտրություններին, ինչպես նաև ցանկություն է հայտնել վերադառնալ Վրաստանի իշխանությանը:

Վրաստանի նախագահի հերթական ընտրությունները նախատեսված են 2018թ. հոկտեմբերին: Պետության գործող ղեկավար Գեորգի Մարգվելաշվիլին իրավունք ունի քվեարկվել երկրորդ ժամկետի համար:

Միխեիլ Սաակաշվիլին զբաղեցրել է Վրաստանի նախագահի պաշտոնը 2004-2013թթ., այդ ժամանահատվածում էլ նրա հիմնադրած «Միասնական ազգային շարժում» կուսակցությունը երկրում եղել է իշխող: 2014թ. Սաակաշվիլիի դեմ Վրաստանում մի քանի քրեական գործ է հարուցվել, նրա նկատմամբ հայտարարվել է ներպետական հետախուզում:

Աղբյուր` Փաստինֆո