Փաստ ինֆո

ՀՀ վարչապետ Կարեն Կարապետյանի՝ մարզերում կատարած շուրջ 2 ամիս տևած շրջագայության արդյունքում քննարկվել են բոլոր մարզերի տարեկան ծրագրերը, ուսումնասիրվել և զեկուցվել է 2017 թվականի կատարողականը, դիտարկվել են այս տարվա կատարվելիք աշխատանքները, որոնք վերաբերվելու են բազմաթիվ ոլորտների: Կառավարության նիստից հետո լրագրողների հետ զրույցում այդ մասին ասաց ՀՀ տարածքային կառավարման և զարգացման նախարար Դավիթ Լոքյանը:

«Մեր առաջին և հիմնական խնդիրն է՝ մեկ շնչին ընկնող սեփական եկամուտները բարձրացնել 10 հազար դրամից», - «Արմենպրես»-ի փոխանցմամբ, ասաց Լոքյանը՝ ավելացնելով, որ 2017-ին այն կազմել է 8200 դրամ, իսկ 2016-ին՝ 7100:

Նախարարի խոսքով՝ քննարկվել են նաև, թե ինչ ներդրումներ են իրականացվել մարզերում: Ըստ Լոքյանի, 2017-ին մարզերում ներդրումային ծրագրերի արդյունքում մեկ շնչին բաժին ընկող ՀՆԱ-ն ավելացել է շուրջ 300 դոլարով: «Սա շատ մեծ թիվ է, և մենք պետք է փորձենք այն պահպանել», - ասաց նախարարը՝ ավելացնելով, որ 2018-ին մարզերում իրականացվող ներդրումները պետք է կազմեն շուրջ 400 միլիարդ դրամ:

Անդրադառնալով համայնքների սեփական եկամուտներին՝ Դավիթ Լոքյանն ասաց, որ ընթացիկ տարվա 3 ամսվա ցուցանիշներով համայնքները 1 միլիարդ 500 միլիոն դրամ ավելի են հավաքագրել՝ համեմատած 2017-ի նույն ժամանակահատվածի:

Աղբյուր` Փաստինֆո