Փաստ ինֆո

Հայաստանի ազգային հավաքականի նախկին հարձակվող Յուրա Մովսիսյանը շվեդական «Յուրգորդրեն» տեղափոխվելուց հետո հարցազրույց է տվել ակումբի պաշտոնական կայքին և կիսվել տպավորություններով: Այս մասին գրում է armsport.am-ը:

Հայ ֆուտբոլիստը, հիշեցնենք, մինչև մրցաշրջանի ավարտը վարձակալական հիմունքներով կխաղա շվեդական ակումբում.

«Հիանալի է Եվրոպա վերադառնալը, հատկապես` «Յուրգորդրենի» պես ակումբ տեղափոխվելը: Ամեն ինչ հիանալի է, ես ոգևորված եմ: Շատ եմ լսել  «Յուրգորդրենի» երկրպագուների մասին, ովքեր ահռելի ճնշում են գործադրում տրիբունաներում»,- ասել է Մովսիսյանն ու նշել, որ որոշ չափով ծանոթ է շվեդական ֆուտբոլին.

«Կիմ Չելստրումի հետ խաղացել եմ «Սպարտակում» և նա ինձ շատ բան է պատմել: Բայց շվեդական ֆուտբոլին ծանոթ եմ նաև դեռ այն ժամանակներից, երբ խաղում էի Դանիայում: Կարծում եմ` վերջին 5 տարում Շվեդիայի առաջնությունը բոլորվին նոր մակարդակի է հասել, իսկ շվեդական թիմերը սկսել են տպավորություն թողնել Եվրոպայում:

Ուրախ կլինեմ, եթե կարողանամ օգտակար լինել «Յուրգորդրենին»: Ցանկանում եմ շատ գոլեր խփել»,- ասել է Մովսիսյանը:

Հայ ֆուտբոլիստին հարց է ուղղվել նաև Հայաստանի հավաքականի կազմում անցկացրած տարիների մասին.

«Հայաստանի հավաքականի կազմում մասնակցել եմ աշխարհի և Եվրոպայի առաջնությունների որակավորման փուլերի: Հիանալի տարիներ էին: Շատ գոլեր եմ խփել հավաքականում: Հայաստանի հավաքականում խաղալն ինձ համար մեծ փորձ էր:

Խաղացել ենք մի շարք հիանալի հավաքականների դեմ և բազմաթիվ ուժեղ հավաքականների հետ խաղերում ունեցել ենք մեծ հաջողություններ: Հիանալի նվաճում էր»,- եզրափակել է իր խոսքը Մովսիսյանը:

Աղբյուր` Փաստինֆո