Փաստ ինֆո

Առանձնապես խոշոր չափերով կաշառք ստանալու, կաշառքի միջնորդության և կաշառք տալու գործով այսօր շարունակվեց ամբաստանյալ Բաբկեն Գասպարյանի որդի՝ Սոս Գասպարյանի հարցաքննությունը:
Այս գործով վկայի կարգավիճակ ունեցող Սոս Գասպարյանը, շարունակեց պնդել, որ ենթադրյալ կաշառքը՝ 3000 ԱՄՆ դոլար գումարը իրեն չի հետաքրքրում, կաշառքը ինքը չի տվել՝ հայրն է տվել, սակայն ինքը կաշառք ստացողներից գումարային պահանջ չունի:

Վկան նշեց՝ քննիչ Զադոյանն իրեն հուսադրել է, ասելով՝ «չվախենա, չես նստի, դատարանով դուրս կգաս», սակայն ի օգուտ իրեն՝ որևէ գործողություն չի կատարել:
Միևնույն ժամանակ վկան պնդեց, որ նախաքննության ընթացքում հայտնել է այն ինչ իրեն հայտնի է եղել: Ասել է թե՝ քննության խորթ մեթոդներ չեն կիրառվել:
Վկայի դատաքննական և նախաքննական ցուցմունքներում ամբաստանյալ Զադոյանի պաշտպան Ամիրխանյանը էական հակասություններ նկատեց և միջնորդեց հրապարակել նախաքննության ընթացքում տված ցուցմունքները:

Միջնորդությունը դատարանը մերժեց, նախ պարզաբանելով, նախաքննական ցուցմունքի հրապարակման վերաբերյալ քրեական դատավարության նորմը, ապա նաև նշեց, որ պաշտպանական կողմը չներկայացրեց հիմքեր, թե ինչ էական հակասություններն են առկա, իսկ այն հանգամանքները, թե վկան դատարանում մի բան է հայտնել, որը չի հայտնել նախաքննության ընթացքում՝ դա դեռ չի նշանակում, որ առկա են հակասություններ:

Այս առնչությամբ էլ պաշտպան Ամիրխանյանը հայտարարեց, թե դատարանն իրենց զրկվեց վկային հարցեր տալուց հնարավորությունից, քանի որ նախաքննական ցուցմունքի հրապարակումից հետո ցանկանում էին հարցեր ուղղել վկային:
Պաշտպանական կողմը գտնում է, որ վկա ուղղորդված վրեժխնդիր է լինում քննիչ Զադոյանից:

Հաջորդիվ հարցաքննվեց Էրեբունի և Նուբարաշեն վարչական շրջանների ավագ դատախազ Հայկ Մովսիսյանը:
Ըստ վկա դատախազի՝ ինքը Սոս Գասպարյանի վերաբերյալ՝ դիտավորությամբ մեկ ուրիշի առողջությանը ծանր վնաս պատճառելու գործով նախաքննության փուլում դատավարական հսկողություն է իրականացրել, իսկ այժմ էլ դատարանում մեղադրանքն է պաշտպանում:
Սոս Գասպարյանի գործը քննարկվել է վարչական շրջանի դատախազի, Երևանի դատախազի ինչպես նաև Գլխավոր դատախազությունում և որոշում է կայացվել գործը դատարան ուղարկել ՀՀ քրեական օրենսգրքի 112-րդ հոդվածով:
Քննարկումը կատարել են որպեզի մեղադրյալի արարքին սխալ քրեաիրավական գնահատական չտան՝ պարզաբանեց ավագ դատախազ Մովսիսյանը հավելելով, որ գործով անհրաժեշտ պաշտպանության սահմանազանցմամբ նշույլներ են առկա եղել, սակայն բոլոր հանգամանքները ստուգվել են որպեսզի անձին ճիշտ մեղադրանք առաջադրվի:

Քննչական մարմինը ևս համակարծիք է եղել ՀՀ քրեական օրենսգրքի 112-րդ հոդվածի հետ, եթե քննիչ Զադոյանը վստահ լիներ, որ 116 -րդ հոդված է, «ես հո նրա ձեռքը չէի կարող բռնել, բայց չի բողոքարկել, չի հակադարձել՝ գտել ենք, որ մեզ հետ համակարծիք է»:
Դատախազի Մովսիսյանի խոսքով՝ գործի վերաբերյալ քննարկմանը մասնակցել է նաև քննիչ Զադոյանը:

Ի դեպ, նախորդ դատական նիստերից մեկում գործով վկա Քննչական կոմիտեի կենտրոնական ապարատի քրեական գործերով քննության աջակցության ՀԿԳ ավագ քննիչ Էդուարդ Սիրականյանը, ով դեպքի ժամանակ զբաղեցրել է Էրեբունի և Նուբարաշեն վարչական շրջանների քննչական բաժնի պետի պաշտոնը հայտարարեց, որ ինքն է անձամբ քննարկումներ ունեցել վարչական շրջանի դատախազի հետ և ոչ քննիչ Զադոյանը, քանի որ որոշում կայացնողը ինքն էր:
Էդուարդ Սիրականյանի ցուցմունքից կարծիք էր ձևավորվում, որ քննիչն ինքնություն որոշում չի կարող կայացնել՝ առանց իր վերադասների ցուցումի:
Դատարանի կողմից սահմանված ապացույցների հաջորդականության համաձայն՝ հաջորդ նիստում կհետազոտվի գործով գրավոր ապացույցները՝ փաստաթղթերը և լազերային կրիչները:

Աղբյուր` Փաստինֆո