Փաստ ինֆո

Տրանսպորտային միջոցների տեխնիկական զննության կտրոնների կեղծ ձևաթղթերի վերաբերյալ գործով այսօր դատարանը հեռացավ խորհրդակցական սենյակ՝ դատական ակտ կայացնելու:

Չորս ամբաստանյալի՝ Արտյոմ Գալստյանի, Սամվել Բարխոյանի, Արտյոմ ու Արմեն Օրդուխանյանների վերաբերյալ գործը դատարանում քննվեց արագացված դատաքննության կարգով՝ ամբաստանյալների միջնորդության հիման վրա: Նրանք լիովին ընդունել են իրենց մեղքը, հատուցել հանցագործությամբ պատճառված վնասը:

Այսպես, ըստ մեղադրանքի, Արտյոմ Գալստյանն՝ ունենալով «HEIDELBERG GTO 52» մոդելի պոլիգրաֆիական տպագրության համար նախատեսված սարքավորում և զբաղվելով ապօրինի տպագրությամբ, ինչպես նաև տեղեկացված լինելով Հրաչ Մանգասարյանի կողմից խարդախության եղանակով` տրանսպորտային միջոցների տեխնիկական զննության կեղծ կտրոնների այլ անձանց իրացման միջոցով, մեկ միասնական դիտավորությամբ առանձնապես խոշոր չափերով գումարների հափշտակությունը կազմակերպելու մտադրության մասին, 2015թ. սեպտեմբեր և դեկտեմբեր ամիսներին վերջինիս հետ հանցավոր համաձայնության է եկել` նշված գործունեությանն օժանդակելու վերաբեյալ, և տպագրելով` իրավունք վերապահող և պատասխանատվությունից ազատող պաշտոնական փաստաթղթերի` տրանսպորտային միջոցների տեխնիկական զննության կտրոնների 1.200 կեղծ ձևաթղթեր, դրանք փոխանցել է Հրաչ Մանգասարյանին, յուրաքանչյուրի համար ստանալով պայմանավորված 1.000 ՀՀ դրամ գումարը: Այնուհետև այն իրագործելով ՀՀ տարբեր մարզերում խաբեության եղանակով պատճառել է առանձնապես խոշոր չափերի, նվազագույնը 10.650.000 ՀՀ դրամ գույքային վնաս:

Ըստ Սամվել Բարխոյանին առաջադրված մեղադրանքի, նա՝ հանդիսանալով «Վիկտորիա-Արման» ՍՊԸ տրանսպորտային միջոցների տեխնիկական զննության կայանի աշխատակից, շահադիտական դրդումներով, իրավունք վերապահվող և պատասխանատվությունից ազատող պաշտոնական փաստաթղթերի` տրանսպորտային միջոցների տեխնիկական զննության կեղծ կտրոնների իրացմամբ` օրինական կերպ կտրոններ ձեռք բերելու համար դիմած քաղաքացիներից, առանձնապես խոշոր չափերով` ընդհանուր 7.046.750 ՀՀ դրամի:

Արտյոմ Օրդուխանյանն, ըստ մեղադրանքի, շահադիտական դրդումներով, տրանսպորտային միջոցների տեխնիկական զննության կեղծ կտրոնների իրացմամբ օրինական կերպ կտրոններ ձեռք բերելու համար դիմած քաղաքացիներից խաբեության եղանակով հափշտակել է 887.500 ՀՀ դրամ գումար, ինչի հետևանքով պատճառվել է խոշոր չափերի գույքային վնաս:

Իսկ Արմեն Օրդուխանյանն, ըստ մեղադրանքի, տեղեկացված լինելով, որ Արտյոմ Օրդուխանյանը ցանկություն ունի շահադիտական դրդումներով, տրանսպորտային միջոցների տեխնիկական զննության կեղծ կտրոնների իրացմամբ` օրինական կերպ կտրոններ ձեռք բերելու համար դիմած քաղաքացիներից խաբեության եղանակով հափշտակություն կատարելու եղանակով պետությանը պատճառել է խոշոր չափերի` նվազագույնը 887.500 ՀՀ դրամ գույքային վնաս:

Մեղադրողն իր մեղադրական ճառում միջնորդեց Սամվել Բարխոյանին մեղավոր ճանաչել ՀՀ քրեական օրենսգրքի 34-178-րդ հոդվածի 3-րդ մասի 1-ին կետով՝ առանձնապես խոշոր չափերի խարդախության փորձ, 34-184-րդ հոդվածի 2-րդ մասի 1-ին կետով՝ առանձնապես խոշոր չափերի վնաս պատճառած՝ խաբեության կամ վստահությունը չարաշահելու եղանակով գույքային վնաս պատճառելու փորձ, և ընդհանուր առմամբ դատապարտել 5 տարվա ազատազրկման:

Մեղադրողը միջնորդեց ամբաստանյալ Արտյոմ Օրդուխանյանին մեղավոր ճանաչել ՀՀ քրեական օրենսգրքի 325-րդ հոդվածի 1-ին մասով՝ ձևաթղթեր կեղծելն, իրացնելը կամ օգտագործելը, 34-184-րդ հոդվածի 1-ին մասով՝ խաբեության կամ վստահությունը չարաշահելու եղանակով գույքային վնաս պատճառելու փորձ, և ընդհանուր առմամբ նշանակել տուգանք՝ 300 հազար ՀՀ դրամի չափով, իսկ Արմեն Օրդուխանյանին մեղավոր ճանաչել ՀՀ քրեական օրենսգրքի 38-325-րդ հոդվածի 1-ին մասով՝ ձևաթղթեր կեղծելուն, իրացնելուն կամ օգտագործելուն օժանդակելը, և 38-34-184-րդ հոդվածի 1-ին մասով՝ խաբեության կամ վստահությունը չարաշահելու եղանակով գույքային վնաս պատճառելու փորձին օժանդակելը, և նշանակել տուգանք 500 հազար ՀՀ դրամի չափով:

Մեղադրողը միջնորդեց ՀՀ քրեական օրենսգրքի 325-րդ հոդվածի 1-ին մասով ամբաստանյալ Արտյոմ Գալստյանին ազատել քրեական պատասխանատվությունից վաղեմության ժամկետն անցնելու հիմքով: Միաժամանակ մեղադրողը միջնորդեց ամբաստանյալին մեղավոր ճանաչել ՀՀ քրեական օրենսգրքի 38-178-րդ հոդվածի 3-րդ մասի 1-ին կետով՝ առանձնապես խոշոր չափերի խարդախության օժանդակելը, 38-184-րդ հոդվածի 2-րդ մասի 1-ին կետով՝ առանձնապես խոշոր չափերի վնաս պատճառած՝ խաբեության կամ վստահությունը չարաշահելու եղանակով գույքային վնաս պատճառելուն օժանդակելը, և դատապարտել ընդհանուր առմամբ 4 տարի 3 ամսվա ազատազրկման:

Սամվել Բարխոյանի պաշտպան Կարեն Սարդարյանն իր հերթին միջնորդեց իր պաշտպանյալի նկատմամբ նշանակել օրենքով նախատեսվածից ավելի վաղ պատիժ, բավարար համարելով առայսօր կալանքի տակ գտնվելու երկու տարին կամ եթե դատարանը կգտնի, որ երկու տարին բավարար չէ, նրա նկատմամբ պայմանականորեն պատիժ չկիրառել:

Արտյոմ Գալստյանի պաշտպան Մարինե Ֆարմանյանն ևս միջնորդեց իր պաշտպանյանի նկատմամբ նշանակվելիք պատիժը պայմանականորեն չկիրառել:

Արտյոմ ու Արմեն Օրդուխանյանների պաշտպան Դիանա Շախրամանյանը գտավ, որ մեղադրողի միջնորդությունը Արմեն Օրդուխանյանի մեղադրանքի երկու հոդվածներով 400 հազարական ՀՀ դրամի տուգանք նշանակելու մասին անհամաչափ է (մեղադրողը միջնորդել էր մասնակի գումարելով նշանակել տուգանք 500 հազար ՀՀ դրամի չափով), առավել ևս որ իր պաշտպանյալին առաջադրվել է հանցագործությանն օժանդակելու մեղադրանք:

Դատավճիռը կհրապարակվի վաղը:

Աղբյուր` Փաստինֆո