Փաստ ինֆո

Երևան քաղաքի ընդհանուր իրավասության դատարանում՝ նախագահությամբ դատավոր Մեսրոպ Մակյանի, այսօր շարունակվեց առանձնապես խոշոր չափերով կաշառք ստանալու, կաշառքի միջնորդության և կաշառք տալու գործով ամբաստանյալ Բաբկեն Գասպարյանի որդի՝ Սոս Գասպարյանի հարցաքննությունը:

Վկան նույնաբովանդակ հարցերին տարբեր պատասխաններ էր տալիս: Մասնավորապես՝ հարցին, թե փաստաբան Գայանե Գալոյանն իրենց կողմից կաշառք տրված 3000 ԱՄՆ դոլար գումարը փոխանցե՞լ է քննիչ Զադոյանին, մի դեպքում պատասխանում էր, որ չգիտի մյուս դեպքում պնդեց՝ այո:

«Առերեսում քննչական գործողություններից մեկի ժամանակ քննիչ Զադոյանն ասել է՝ քեզ նորմալ պահիր, որ չզգան փող ես տվել…»,- հայտարարեց վկան:

Բացի այդ, վկայի խոսքով՝ քննիչն իր նկատմամբ բարեհամբյուր է գտնվել, կոպիտ չի եղել, ինքն էլ հասկացել է, որ կալանքից ազատ կարձակվի:

Ըստ վկայի՝ երբ փաստաբան Գալոյանի աշխատասենյակում են գտնվել ինքը եղբայրը և հայրը, վերջինս Գալոյանին փոխանցել է 3000 ԱՄՆ դոլար, որպեսզի ՀՀ քրեական օրենսգրքի 112-րդ հոդվածը վերաորակվի ինքնապաշտպանության և իրեն չկալանավորեն:

Գումարը վերցնելով, ըստ վկայի, Գալոյանն այն դրել է պայուսակի մեջ, թե ինչ գույն ու ձև ուներ այն, վկան չկարողացավ նկարագրել:

Միևնույն ժամանակ նշեց, որ երբ փաստաբանը կամ քննիչ Զադոյանն այցելել են իրեն կալանավայրում, հուսադրել են, որ ամեն բան լավ է լինելու, և մեղադրանքը վերաորակվելու է, իսկ կաշառքի վերաբերյալ խոսակցություններ չեն եղել:

Իսկ հարցին, թե ինչու որևէ անգամ գումարը հետ չի պահանջել, վկան ասաց, որ գումարը ինքը չի տվել, հայրն է տվել և իր իրավունքը չէր հետ պահանջելը:

Փաստաբան Գայանե Գալոյանն էլ գումարը վերցնելու և պայուսակում դնելու՝ վկայի հայտարարության վերաբերյալ ասաց, որ իրեն ճանաչողները գիտեն, որ պայուսակ չի կրում:

Վկայի ցուցմունքներն այսօր էլ անավարտ մնացին, Զադոյանի պաշտպան Ամիրխանյանը նկատեց, որ դրանցում առկա են էական հակասությունների և այդ կապակցությամբ կմիջնորդի հրապարակել նրա նախաքննական ցուցմունքները:

Հաջորդ դատական նիստը տեղի կունենա մարտի 26-ին:

Աղբյուր` Փաստինֆո