Փաստ ինֆո

ՀՀ աշխատանքի և սոցիալական հարցերի նախարարության սոցիալական ապահովության պետական ծառայության պետի առաջին տեղակալ Ա. Պարոնյանի թեթև ձեռքով 20.02.2018 թ. գրությամբ դադարեցվել է թոշակառու Սիրանուշ Հովհաննիսյանի կենսաթոշակ ստանալու իրավունքը:

Գրությամբ՝ վկայակոչելով «Պետական կենսաթոշակների մասին» ՀՀ օրենքին, ՀՀ կառավարության 2011 թվականի մայիսի 5-ի թիվ 665-Ն որոշման 44-րդ, 52-րդ կանոններին, պաշտոնյան նշել է, որ Արխիվային տեղեկանքում բացակայում են աշխատանքի ընդունվելու և աշխատանքից ազատվելու հրամանները, ինչպես նաև ըստ տարիների և ամիսների աշխատավարձերի չափերի վերաբերյալ տեղեկատվությունը և չի կարող հանդիսանալ աշխատանքային ստաժը հաստատող պատշաճ փաստաթուղթ:

Տեղեկացվում է, որ վերը նշված նոտարական ակտը, համաձայն Կանոնների 52-րդ կետի, չի կարող հիմք հանդիսանալ որպես պատշաճ փաստաթուղթ Ս. Հովհաննիսյանի աշխատանքային ստաժում վերը նշված ժամանակահատվածները հաշվառելու համար, առանց որի չի ապահովում Օրենքի 9-րդ հոդվածի համաձայն պահանջվող 10 տարվա աշխատանքային ստաժը:

Քաղաքացու ներկայացուցիչ Զարուհի Հայրապետյանը դիմել է ՀՀ աշխատանքի և սոցիալական հարցերի նախարարության սոցիալական ապահովության պետական ծառայությանը՝ խնդրելով վերացնել Ծառայության պետի առաջին տեղակալի հիշյալ գրությունը և կամ որոշումը, որով դադարեցվել է Սիրանուշ Հովհաննիսյանի կենսաթոշակի իրավունքը և վերականգնել այն` վճարել 2018 թվականի փետրվար ամսվա համար նախատեսված կենսաթոշակը:

Ըստ Զարուհի Հայրապետյանի, ակնհայտ է, որ ՀՀ ԱՍՀՆ ՍԱՊԾ պետի առաջին տեղակալի գրությունը, որով դադարեցվել է Սիրանուշ Հովհաննիսյանի կենսաթոշակը, ոչ իրավաչափ է, ուստի պետք է այն վերացվի և կենսաթոշակառուի թոշակը վերականգնվի:

Քաղաքացու ներկայացուցիչը՝ կատարելով մի շարք իրավանորմերի վերլուծություն, արձանագրում է, որ նոտարի կողմից իրավաբանական նշանակություն ունեցող փաստ հաստատելու դեպքում այդ նոտարական ակտը ենթակա է պարտադիր կատարման համար առանց վերապահման: 20.10.2017 թ. ՀՀ «Մարտունի» նոտարական տարածքի նոտար Քրիստինե Բադալյանի կողմից հաստատվել է իրավաբանական նշանակություն ունեցող փաստ, որի համաձայն «Հայաստանի Ազգային արխիվ» ՊՈԱԿ Մարտունու ներկայացուցչության 11.09.2017 թ. Սիրանուշ Ցոլակի Հովհաննիսյանին հասցեագրված տեղեկանքը և նրանում մատնանշված անձի մասին տեղեկությունները պատկանում և վերաբերում են Սիրանուշ Ցոլակի Հովհաննիսյանին:

Ըստ Զ.Հայրապետյանի, ի պատասխան ծառայության այն դիտարկմանը, որ ըստ տարիների և ամիսների աշխատավարձերի չափի վերաբերյալ առկա չէ որևէ տեղեկատվություն, իր վստահորդը ներկայացրել է աշխատավարձերի չափի վերաբերյալ տեղեկատվություն:

Իսկ աշխատանքի ընդունվելու և աշխատանքից ազատվելու հրամանների՝ արխիվային տեղեկանքում բացակայության մասին Ծառայության պատճառաբանության առնչությամբ կողմը նշում է, որ արխիվային տեղեկանքում ոչ թե բացակայում են դրանք, այլ արխիվային տեղեկանքում հստակ նշված է, որ Մարտունու պետ. տնկարանի հրամագրքերը չեն պահպանվել, որի պատճառով աշխատանքի ընդունման և ազատման հրամանների վերաբերյալ տեղեկանք տրամադրվել չի կարող:

Փաստաբանը նշում է, որ այդ կապակցությամբ ՀՀ կառավարության 2011 թվականի մայիսի 5-ի որոշմամբ հստակ կարգավորում է սահմանվել: Մասնավորապես, ըստ այդ կարգավորման, եթե անճշտությունը վերաբերում է աշխատանքի ընդունվելու կամ աշխատանքից ազատվելու ամսվան և օրվան, ապա աշխատանքի ընդունվելու ամիս և օր է համարվում տվյալ տարվա դեկտեմբերի 31-ը, իսկ աշխատանքից ազատվելու ամիս և օր՝ տվյալ տարվա հունվարի 1-ը:

Լուսանկարում՝ փաստաբան Զարուհի Հայրապետյանը

Աղբյուր` Փաստինֆո