Փաստ ինֆո

Նախորդ տարի ՄԻՊ-ի կողմից հոգեբուժական կազմակերպություններում իրականացված մշտադիտարկման արդյունքում մի շարք խնդիրներ են վեր հավել: Այդ մասին այսօր լրագրողների հետ հանդիպմանն ասել է ՄԻՊ Արման Թաթոյանը:

Մասնավորապես՝ Թաթոյանի խոսքով՝ թեև հոգեբուժական օգնությունն ու սպասարկումն անվճար է, սակայն արձանագրվել են հոգեբուժական վճարովի ծառայությունների տրամադրման դեպքեր, իսկ համայնքային մակարդակում` հոգեկան առողջության պահպանման ծառայություններն անհասանելի են:

Թաթոյանն ընդգծել է՝ առկա են ՀՀ քրեական և քաղաքացիական դատավարության օրենսգրքերով նախատեսված հարկադիր բուժման հետ կապված մի շարք օրենսդրական և գործնական խնդիրներ, օգտագործվել են օրենքով չնախատեսված զսպման, ներգործության միջոցներ և արձանագրվել են դրանց կիրառման կարգի խախտումներ, հոգեբուժական կազմակերպություններում բուժանձնակազմը ոչ բավարար քանակի է, իսկ մի շարք դեպքերում էլ չկան նեղ մասնագետները, այդ թվում նաև՝ մանկական հոգեբույժներ:

Սակայն թվարկված խնդիրներն այդքանը չեն. գիշերային ժամերին հոգեբույժների հերթապահությունը բացակայում է, իսկ հերթապահություն իրականացնող միջին բուժանձնակազմը ոչ բավարար քանակի է, Երևանում էլ չկա:

Թվարկված խնդիրներից բացի, արձանագրվել են ժամկետանց դեղեր և բժշկական պարագաներ, դեղերի ոչ պատշաճ պահպանում և խոտանում, հոգեմետ դեղերի հաշվառման և տրամադրման մատյանների ոչ պատշաճ վարման դեպքեր են գրանցվել:

Բացակայում են անհետաձգելի հոգեբուժական հիվանդանոցային բժշկական օգնություն և սպասարկում պահանջող դեպքերում անձին հոգեբուժական կազմակերպություններ տեղափոխելու և պատշաճ բժշկական օգնություն և սպասարկում իրականացնելու մեխանիզմները, առկա է դեղորայքային բուժումից զատ այլընտրանքային բուժման մեթոդների կիրառման խիստ պակաս:

Հոգեբուժական կազմակերպություններում էլ կան գերբնակեցվածության դեպքեր, որոշ կազմակերպություններում էլ կանանց և տղամարդկանց բաժանմունքների առանձնացման խնդիրներ են առկա:

Մշտադիտարկման արդյունքում արձանագրվել են նաև հոգեկան առողջության խնդիրներ ունեցող անձանց նկատմամբ խտրական մոտեցում։

Ինչ վերաբերում է կենցաղային, այդ թվում՝ սանիտարահիգիենիկ պայմաններին, ապա այստեղ էլ բարելավման և վերանորոգման անհրաժեշտության խնդիրներ կան:

Խնդիրներ կան նաև ոչ պատշաճ քանակի և միատեսակ սննդի տրամադրման առումով:

Հոգեկան առողջության հետ կապված խնդիրներ ունեցող անձանց զբոսանքի իրավունքը ևս պատշաճ կերպով չի ապահովվում:

Թվարկված խնդիրներից զատ, հոգեկան առողջության խնդիրներ ունեցող անձինք զրկված են նաև կենսաթոշակը ինքնուրույն տնօրինելուց:

ՄԻՊ-ի խոսքով՝ թվարկված խնդիրների վերաբերյալ անհրաժեշտ լուծումների առաջարկները ներկայացվել են ոլորտի իրավասու մարմիններին:

Աղբյուր` Փաստինֆո