Փաստ ինֆո

21-ամյա ֆրանսուհի Սոֆի Լյուննետի այրված մնացորդները գտել էին Լոնդոնի հարավ-արևմուտքում, այգում: Աղջկա սպանության մեջ մեղադրում են 35-ամյա Սաբրինա Կուայդերին և 40-ամյա Ույսեմ Մեդունիին, որոնց տանը Սոֆին աշխատում էր որպես դայակ:

Ինչպես հաղորդում է Mirror-ը, Սաբրինա Կուայդերը դաժանորեն է վարվել իր երեխաների 21-ամյա դայակի հետ՝ մինչև աղջկան սպանելն ու այգում նրա մարմինն այրելը: Կինն ու նրա սիրեկանը մի քանի օր Սոֆիին պահել են Լոնդոնի հարավ-արևմուտքում գտնվող իրենց տանը, սովի մատնել ու ծեծի ենթարկել: Սաբրինան մեղադրել է աղջկան իր նախկին երիտասարդի՝ Boyzone փոփ-խմբի հիմնադիր Մարկ Ուոլտոնի հետ կապի համար և հայտարարել, որ դայակն ու երաժիշտը ազդում են իր վրա սև մոգության օգնությամբ:

Սաբրինա Կուայդերը նաև մեղադրել է դայակին անդամանդե կուլոն գողանալու և իր դեմ խարդավանքներ հյուսելու մեջ: «Հանցագործուհուն» պատժելու համար գործատուները կոտրել են նրա կրծքավանդակը, չորս կողոսկրերը, ծնոտը, իսկ մահից հետո փորձել են թաքցնել հանցանշանները և այրել են մարմինը հետին բակում:

«Սոֆիի կյանքի վերջին ժամերը իսկապես սարսափելի են եղել: Նա ենթարկվել է ինկվիզիտորական կտտանքների և սարսափելի բռնության»,- ասել է դատախազ Ռիչարդ Հորվելլը:

Հանցագործների ծրագիրը չի պսակվել հաջողությամբ: Նրանց հարևանուհին ծխի հոտ է զգացել ու հրշեջներ կանչել, որոնք այգում հայտնաբերել են մարմնի մնացորդները: Սաբրինա Կուայդերը ու Ույսեմ Մեդունին ժխտում են աղջկա սպանությանն իրենց մասնակցությունը, սակայն դատախազ Ռիչարդ Հորվելլը համոզված է զույգի մեղավորության մեջ: Նրա վարկածի օգտին են խոսում նաև քննիչների կողմից հայտնաբերված Սոֆիի օրագրերը, որոնցում աղջիկը գանգատվում է գործատուների կողմից դաժան վերաբերմունքից ու պնդում, որ նրանք թույլ չեն տալիս իրեն վերադառնալ Ֆրանսիա: Սոֆիի սպանության գործով դատական քննությունը շարունակվում է:

Աղբյուր` Փաստինֆո