Փաստ ինֆո

«Երկիր Ծիրանի»-ին խմբակցության անդամներն աղմկահարույց ավագանու նիստի օրը քաղաքապետարան ժամանած շտապօգնության բուժակների ներկայությունից ճնշվել են, այն էլ՝ հոգեբանորեն։ Բացի այդ՝ բուժակների բրիգադի ներկայությունը խաթարել է խմբակցության բնականոն աշխատանքը:

Այս մասին «Երկիր Ծիրանի»-ին գրությամբ հայտնել է Գլխավոր դատախազությանը, որտեղից էլ Փոստանջյանի դիմումն ուղարկվել է Ոստիկանություն:

«Փաստինֆո»-ն Ոստիկանության ԶԼՄ-ների հետ կապի, վերլուծության և լրատվության բաժնի պետ Էդգար Ջանոյանից տեղեկացավ, որ դիմումը ստացվել է և նյութեր են նախապատրաստվում:

Զարուհի Փոստանջյանի այս դիմումը կարող է բումերանգի ազդեցություն ունենալ։ Եթե շտապօգնության բժիշկների ժամանումից «Երկիր Ծիրանի»-ին հոգեբանորեն ճնշվել է, արդյոք սա նշանակում է, որ հենց իրենք են խոստովանում, որ իրենց վարքագծից ավագանու մյուս անդամները կարող էին ոչ միայն հոգեբանորեն ճնշվել, այլ նաեւ՝ ահաբեկվել։

Հիշեցնենք, որ փետրվարի 13-ի ավագանու նիստին Փոստանջյանի գլխավորած «Երկիր Ծիրանի»-ի խմբակցության անդամները ներկայացել էին բժշկական դիմակներով, ձեռնոցներով, իսկ ձեռքներին էլ տարօրինակ բաղադրությամբ բաժակներ։

Ասել է թե՝ «Երկիր Ծիրանին» գիտակցել էր, որ բաժակների մեջի պարունակությունը կարող է վտանգավոր լինել եւ անվտանգության կանխարգելիչ միջոցառումներ իրականացրել իր անդամների համար, իսկ նիստի ներկա բազմաթիվ այլ անձանց առողջությունը վտանգի տակ դրել։

Պարզվում է, որ «Երկիր Ծիրանին» անյքան ահաբեկված է եղել շտապօգնության բժիշկներից, որ դա գիտակցել է 1 ամիս անց, կամ էլ պարզապես որոշել է գաղափար տալ հանրապետական գործընկերներին բարձրաձայնելու, որ իրականում իրենք ունեին բոլոր օբյեկտիվ հիմքերը փետրվարի 13-ի նիստին ահաբեկվելու «Երկիր Ծիրանիի» գործողություններից եւ Երեւանի քաղաքապետը եւս կարող էր զգուշանալ, որ բաժակը հնարավոր է պարունակում է թունավոր կամ առողջության համար վտանգավոր նյութ, քանի որ այն, ինչպես երեւում է կադրերում, քաղաքապետին մոտեցնելիս «Երկիր Ծիրանի» խմբակցության անդամը եղել է բժշկական դիմակով եւ ձեռնոցով։

Լուսանկարը՝ Ֆոտոլուրի

Աղբյուր` Փաստինֆո