Փաստ ինֆո

Երեւանի ավագանու այսօրվա նիստը կրկին մեկնարկեց սկանդալով. Այս անգամ «հակամարտող» կողմերում էին հայտնվել «Երկիր ծիրանի» եւ «Ելք» խմբակցությունները։

Նիստի սկզբում «Ելք» խմբակցության անդամ Ալեն Սիմոնյանը հայտարարեց, որ օրակարգում ընդգրկված է մարտի մեկի զոհերի հուշարձանի տեղադրման հետ կապված հարցը: Նա նշեց, որ մոտ 10 տարի առաջ 2800-ամյա Երևանի կենտրոնում գնդակահարվեցին խաղաղ ցուցարարներ, ոստիկաններ, հետևաբար, առաջարկեց մեկ րոպե լռությամբ հարգել զոհերի հիշատակը: Ոտքի կանգնեցին միայն Ելք և Երկիր Ծիրանի խմբակցությունների անդամները: ՀՀԿ խմբակցությունը՝ քաղաքապետ Տարոն Մարգարյանի գկխավորությամբ, ոտքի չկանգնեցին:
«Ցավում եմ, որ մնացածը չհարգեցին մահացած մարդկանց հիշատակը, դա շատ բանի մասին է խոսում»,- ասաց Ալեն Սիմոնյանը:

Իսկ արդեն օրակարգային հարցերի քննչարկման ժամանակ կրքերը բորբոքվեցին։ Նշենք, որ Երևանի ավագանու Երկիր ծիրանի խմբակցությունկ ներկայացրել էր երկու նախագիծ,որոնք վերաբերում են Մարտի մեկի զոհերի հիշատակին հուշարձանի տեղադրմանն ու Վազգեն Սարգսյանի անվան փողոցը Վուդրո Վիլսոնի անունով անվանակոչելուն, ինչը միանշանակ չընդունվեց անգամ «Ելք» խմբակցության կողմից:

Անահիտ Բախշյանը հայտարարեց, որ Երկիր Ծիրանին այս քայլով փորձում է պառակտել Ելք խմբակցությունը: Նա նախագծերի հեղինակ Երկիր Ծիրանի խմբակցության ու իշխանության միջև զուգահեռներ անցկացրեց, նշեց, որ ինչպես իշխանությունն է ուզում պառակտել Ելքը, հավասարպես դա անում է Երկիր Ծիրանին:

Ըստ նրա՝ նախագծով Երկիր Ծիրանին նսեմացնում է Վազգեն Սարգսյանի դերը՝ առաջարկելով նրա անվան փողոցն անվանակոչել Վուդրո Վիլսոնի անունով: Տիկին Բախշյանի կարծիքով, քաղաքական տեսանկյունից պետք է ունենալ Վուդրո Վիլոսոնի անվան փողոց՝ նրա հուշարձանով հանդերձ: Պետք է նաև ունենալ քաղաքական ընդվզումների ժամանակ զոհվածների հոշարձանը, բայց ինչո՞ւ են փորձ անում դա անել Վազգեն Սարգսյանի դերը նսեմացնելու հաշվին: «Ասել եմ, չէ՞, իրար շատ սազում եք»,- Երկիր Ծիրանիին դիմեց Բախշյանը:

Ելքի մեկ այլ անդամ Տիգրան Տեր-Մարգարյանն էլ հայտարարեց, որ Երկիր ծիրանին կատարում է կողտոտ ու նողկալի պատվեր՝ ստանձնելով պատվիրատուների ծաղրածուների դերը:
«Սա ձեռնտու է բոլոր նրանց, ում հանգիստ չի տալիս Վազգեն Սարգսյանի հիշատակը», ասաց նա:

Ելքից Թեհմինա Վարդանյանն էլ տկարամիտ նախագիծ անվանեց փողոցն անվանակոչելու նախագիծը, ասաց, որ այն ուղղված է հենց Ելք խմբակցության դեմ:

«Փորձ է արվում մեզ սադրել ու ներքաշել իրենց տրագիկոմեդիկ դաշտ: Տիկնայք, դա չի ստացվի ձեզ մոտ, ես ինքս դա թույլ չեմ տա»,- ասաց նա:

Ելք խմբակցության ղեկավար Դավիթ Խաժակյանը հայտարարեց, որ զարմանալի է, երբ իշխող ՀՀԿ-ն առանց խնդրի այս երկու նախագծերը ներառել է ավագանու նիստի օրակարգ ու հենց նիստի սկզբում քննարկելու հնարավորություն է տվել:

«Փաստորեն, ՀՀԿ-ականներն ստեղծել են բացառիկ հնարավորություն, որպեսզի ականատես լինեն երկու ընդդիմադիր ուժերի բախմանը: Ելքը հայտարարում է, որ ունի այնքան քաղաքական հասունությունը, որ այս ծուղակը չի ընկնի, խմբակցությունը ՀՀԿ-Երկիր Ծիրանի բանավեճին չի մասնակցում և լքում է նիստերի դահլիճը»,- հայտարարեց Խաժակյանը: Նրա ելույթից հետո Ելքի անդամները լքեցին ավագանու նիստը:

Քաղաքապետ Տարոն Մարգարյանը զարմացավ, թե քիչ առաջ հայտարարում էին, որ թույլ չեն տա նման նախագծեր ընդունել, բայց հիմա հեռանում են: «Այսինքն՝ ՀՀԿ-ն թույլ չի տա, որ այս օրինագծերն ընդունվեն»,- հայտարարեց քաղաքապետը:

Ելք խմբակցության անդամների հայտարարություններին արձագանքեց Երևանի ավագանու Երկիր ծիրանի խմբակցության ղեկավար Զարուհի Փոստանջյանը՝ Անահիտ Բախշյանին մեղադրելով ամուսնու սպանության մեջ մեղադրվողի արյունոտ ձեռքերից մեդալ ստանալու մեջ։

«Ասում են՝ Ելք-ը, իբր թե, պառակտվում է մեր պատճառով: Կներեք, այդ Ելքը ստեղծվել էր որպես արհեստական միավոր՝ արհեստական օրակարգի ներքո և այն մարդկանց կողմից, ովքեր մի շաբաթ առաջ իրար ուղղակի հայհոյում էին: Հասկանալի է, որ ձեր ստեղծողն այսօր ցանկանում է ձեզ պառակտել, պառակտում է, դա է տեղի ունենում:

Ինչ վերաբերում է նրան, որ այս նախագծի հետևում ինչ-որ մարդիկ են կանգնած, այո, ձեր պապաներն են կանգնած եղել բոլոր իրադարձությունների հետևում, որը տեղի է ունեցել մեր հանրապետությունում՝ սկսած 1996 թվականից»,- հայտարարել է Փոստանջյանը: Ապա անդրադառնալով Անահիտ Բախշյանի ելույթին, ով ասել էր, թե Երկիր Ծիրանին ու իշխանությունն իրար լավ արժանի են՝ Զ.Փոստանջյանն ասաց՝ « մի տիկին, որը նաև իմ գործընկերն էր, իր ամուսնու սպանության մեջ մեղադրվողի արյունոտ ձեռքերից մեդալ էր ստանում: Սա է մեր պատկերը, մեր բարոյականությունը: Տիկին Բախշյանը բոլշևիկ է, քանի որ վերջին բոլշևիկից է մեդալ ստացել:

Մյուսը՝ Արամ Սարգսյանը գնացել ու վարչապետություն է ստացել իր եղբոր սպանության մեջ կասկածվող անձից: Սա է մեր իրականությունն ու բարոյականությունը»,- հայտարարեց Զարուհի Փոստանջյանը:

Լուսանկարը՝ Ֆոտոլուրի

Աղբյուր` Փաստինֆո