Փաստ ինֆո

Անզգույշ հանցագործության, այն է՝ ՃՏՊ պատահարի, գործով դատապարտված Արտակ Դիլանյանը ներկայումս «Արթիկ» քրեակատարողական հիմնարկում պահվում է կիսաբաց ռեժիմի հիմնարկում՝ դիտավորյալ հանցագործություն կատարելու համար դատապարտված անձանց հետ համատեղ: Այս մասին «Փաստինֆո»-ի հետ զրույցում ահազանգեց Ա.Դիլանյանի պաշտպան, փաստաբան Վահե Դանիելյանը:

Ըստ պաշտպանի, Քրեակատարողական օրենսդրությամբ ընդհանրապես որևէ կարգավորում չկա առ այն, որ անզգուշությամբ հանցագործություն կատարելու համար դատապարտված անձը կարող է բաց ռեժիմից տեղափոխվել կիսաբաց ռեժիմ: Նա միաժամանակ նշեց, որ օրենսդրի կողմից սահմանված է իմպերատիվ պահանջ, որ անզգույշ հանցագործության համար դատապարտված անձը չի կարող պահվել դիտավորյալ հանցագործություն կատարած անձանց հետ համատեղ:

Վ.Դանիելյանը հայտնեց, որ նույն քրեակատարողական հիմնարկում բաց ռեժիմից կիսաբաց ռեժիմ դատապարտյալի տեղափոխությունը կատարվել է Տեղաբաշխման հանձնաժողովի որոշման հիման վրա, որում ուղղակիորեն նշվում է՝ հաշվի առնելով դատապարտյալի դրսևորած վարքագիծը, բաց ռեժիմի ուղղիչ քրեակատարողական հիմնարկից տեղափոխել ավելի խիստ մեկուսացվածության աստիճանի՝ կիսաբաց ռեժիմի ուղղիչ հիմնարկ, նույն «Արթիկ» քրեակատարողական հիմնարկում:

Ի պատասխան փաստաբանի դիմումի՝ ՔԿՀ պետը պատասխանել է, որ նպատակահարմար չեն գտնում միջնորդագրով դիմել ՔԿՎ-ին՝ հաշվի առնելով, որ Արտակ Դիլանյանի վերաբերյալ 355-րդ հոդվածի (Փախուստ ազատազրկման վայրից) հատկանիշներով գործ է քննվում: Եվ դա այն դեպքում, որ իր պաշտպանյալը բացատրություն է տվել, որ փախուստի դիմելու միտում չի ունեցել, գնացել է մերձակա եկեղեցի՝ մոմ վառելու և այնտեղ ծիսակատարություններին մասնակցելու: «Եթե փախուստի մտադրություն ունենար, հետագայում հետ չէր վերադառնա ՔԿՀ»,- ասաց պաշտպանը՝ հավելելով, որ բանտապետի կողմից պաշտոնապես թույլ է տրվել հետագայում ևս մասնակցել այդ ծիսակատարություններին:

Տվյալ պարագայում ՔԿՀ պետը կանխակալ մոտեցում է ցուցաբերում ու խախտում անմեղության կանխավարկածի սկզբունքը, ըստ որի անձն անմեղ է, քանի դեռ առկա չէ օրինական ուժի մեջ մտած, նրա մեղավորությունը հաստատող դատական ակտ, ասաց Վահե Դանիելյանը:

Տեղաբաշխման հանձնաժողովը պատճառաբանում է նաև, որ նա երկու անգամ լքել է ազատազրկման վայրը, այդ պատճառով ենթարկվել է տույժերի: Մինչդեռ այդ տույժերը ներկայումս մարված են, նաև դատապարտյալն ունի խրախուսանք՝ ՔԿՀ բարեկարգման աշխատանքներին ակտիվ մասնակցելու համար: Պաշտպանը վկայակոչեց Քրեակատարողական օրենսգրքի 97-րդ հոդվածն, ըստ որի անձը համարվում է տույժ չունեցող, եթե վերջին վեց ամիսների ընթացքում որևէ տույժ չունի: «Տույժերը մարված են, վերջին վեց ամսվա ընթացքում տույժի չի ենթարկվել, ուստի հիմք չկա նրան դիտավորյալ հանցագործության կատարած անձանց հետ պահելու համար»,- ասաց Վահե Դանիելյանը:

Ըստ պաշտպանի, իր պաշտպանյալի իրավունքի խախտումը պայմանավորված է ներկայումս Շիրակի մարզի դատարանում քննվող գործով: Դրա շրջանակներում փորձ է արվում ճնշում գործադրելու միջոցով տուժող Արտակ Դիլանյանից կորզել իրականությանը չհամապատասխանող ցուցմունքներ: Վերջինս բազմիցս հայտնել է, որ իրեն հարվածող անձն ամբաստանյալը չէ:

Խնդրի առնչությամբ պաշտպանը դիմումներ է գրել ՀՀ Գլխավոր դատախազին, Մարդու իրավունքների պաշտպանին, ՀՀ արդարադատության նախարարին, պատասխաններ առայժմ չեն ստացվել:

Աղբյուր` Փաստինֆո