Փաստ ինֆո

39 օր հացադուլի մեջ գտնվող առանձնապես խոշոր չափերով կաշառք տալու մեջ մեղադրվող Արկադի Պապյանի ինքնազգացողությունն այս գիշեր կտրուկ վատացել է: Կալանավորին քրեակատարողական հիմնարկից տեղափոխել են քաղաքացիական հիվանդանոց, սակայն հրաժարվել է բուժօգնություն ստանալուց, ինչից հետո հետ են տեղափոխել ՔԿՀ: Այս մասին «Փաստինֆո»-ի թղթակիցը տեղեկացավ Արկադի Պապյանի պաշտպան Ամրամ Մակինյանից:

Պաշտպանը նշեց, որ այսօր առավոտյան է այցելել քրեակատարողական հիմնարկում գտնվող հացադուլավոր պաշտպանյալին, նրա վիճակը ծայրահեղ ծանր է, սակայն ընտրել է պայքարի այս միջոցը:

Արկադի Պապյանը բողոքում է իր նկատմամբ հարուցված քրեական գործից այն, որ իբրև «Վանաձոր» ՔԿՀ –ի պետ Գևորգ Մկրտչյանին ամիսներ շարունակ կաշառք է փոխանցել, ինչի դիմաց իրեն արտոնություններ են թույլ տրվել:

Պաշտպան Ամրամ Մակինյանը նշեց, որ ապացույցները բացակայում են, հանցակազմ չկա, իսկ այս իրավիճակում քրեական գործով պաշտոնատար անձանց վերաբերյալ մասն անջատվել է, և գործով այդ մասով դատարանն արդեն անցել է դատաքննության փուլի:

Պաշտպանի միջնորդություններն էլ գործերը միավորելու ինչպես նաև Պապյանին որպես վկա դատակոչելու վերաբերյալ՝ մերժվել են:

Նման իրավիճակում Պապյանը ինքնակործանման է գնում, սակայն անդրդվելի է: «Պատրաստ եմ իմ արածի համար դատապարտվել, բայց ոչ՝ չարածի»,- ասել է Պապյանը:

Հիշեցնենք, որ նա հացադուլի մեջ է գտնվում փետրվարի 8-ից:

Ավելի վաղ Հատուկ քննչական ծառայությունը տեղեկացրել էր՝ ՀՀ ԱՆ «Վանաձոր» քրեակատարողական հիմնարկի պաշտոնատար անձանց կողմից կատարված կոռուպցիոն հանցագործությունների` առանձնապես խոշոր չափերով կաշառք ստանալու, կաշառք տալու օժանդակության, կաշառք ստանալու դրդչության, ինչպես նաև դատապարտյալների օգտին ակնհայտ ապօրինի գործողություններ կատարելու համար պաշտոնեական դիրքի չարաշահման բազմաթիվ դրվագներով գործի նախաքննությունն ավարտվել է:

Այսպիսով, «Վանաձոր» ՔԿՀ-ի պետ Գևորգ Մկրտչյանը նույն հիմնարկում պատիժ կրող դատապարտյալների շրջանում հեղինակություն վայելող դատապարտյալներ, այսպես կոչված` «զոն նայող» Թ. Ֆ.-ի և Ա. Պ.-ի օգտին ակնհայտ ապօրինի գործողություններ կատարելու համար նրանցից պարբերաբար կաշառք է ստացել:

Մասնավորապես, նշված դատապարտյալների և նրանց «հովանավորության» տակ գտնվող այլ դատապարտյալների խցերի դռները սահմանված կարգի խախտմամբ բաց թողնելու և այդ կերպ նրանց ազատ տեղաշարժի հնարավորություն ընձեռելու, պատժի կրման ընթացքում արգելված իր հանդիսացող բջջային հեռախոսների, տեխնիկական սարքերի օգտագործումն ու այլ արտոնություններ տրամադրելու համար Գ. Մկրտչյանը Թ. Ֆ.-ից և Ա. Պ.-ից պահանջել ու Վանաձոր քաղաքի բնակիչ Կարեն Հակոբյանի միջոցով 2016 թվականի դեկտեմբերից 2017 թվականի հոկտեմբերն ընկած ժամանակահատվածում մաս-մաս ստացել է առանձնապես խոշոր չափերի՝ 2.750.000 ՀՀ դրամ կաշառք:

Կաշառքի գումարները ստանալուն զուգահեռ՝ Գ.Մկրտչյանը սահմանված կարգով միջոցներ չի ձեռնարկել անօրինական գործողություններ կատարած դատապարտյալներին և կալանավորված անձանց պատժելու, նրանց կողմից կազմակերպված թղթախաղերը կանխելու ուղղությամբ: Փոխարենն առանձին դեպքերում անձամբ է կազմակերպել դատապարտյալների միջև գումարի դիմաց թղթախաղով զբաղվելու գործընթացը: Արդյունքում՝ կաշառք տված դատապարտյալները, օգտվելով անպատժելիության մթնոլորտից, ժամանակ առ ժամանակ նույնիսկ ալկոհոլ ու թմրանյութեր են օգտագործել, կատարել անօրինական այլ գործողություններ:

Աղբյուր` Փաստինֆո