Փաստ ինֆո

«Փաստինֆո»-ի տեղեկություններով՝ դատախազ եղբայրների կողմից Քննչական կոմիտեի ավագ քննիչ Սուրեն Նազարյանին ծեծի ենթարկելու վերաբերյալ քրեական գործը կարճվել է:

Մեր այս տեղեկությունը հաստատեցին նաև Հատուկ Քննչական ծառայությունից:

Հիշեցնենք, որ դեպը տեղի էր ունեցել նախորդ տարի՝ նոյեմբերի 20-ին, 26-ամյա ավագ քննիչ Սուրեն Նազարյանը ծեծի էր ենթարկվել դատախազներ, երկվորյակ եղբայրներ 32-ամյա Նարեկ և Հայկ Խաչատրյանների կողմից:

Փաստի առթիվ Հատուկ քննչական ծառայությունում քրեական գործ էր հարուցվել՝ ՀՀ քրեական օրենսգրքի 118-րդ հոդվածով (ծեծը):

Ամիսներ շարունակ կատարված նախաննության ընթացքում այդպես էլ մեղադրյալի կարգավիճակ ունեցող անձ չեղավ. Գլխավոր դատախազը նման ցուցում չտվեց իր ենթակաների նկատմամբ քրեական հետապնդում հարուցելու վերաբերյալ:

Նշենք նաև, որ դատախազների նկատմամբ քրեական հետապնդում կարող է հարուցել միայն գլխավոր դատախազը կամ նրա տեղակալները։

Մինչդեռ դատախազների կողմից ծեծի ենթարկված քննիչը դեպքից հետո ստացած վնասվածքներով տեղափոխվել էր թիվ 1 համալսարանական հիվանդանոց: Նշանակվել էր դատաբժշկական փորձաքննություն:

Դեպքի վերաբերյալ Քննչական կոմիտեի նախագահի տեղակալ Արթուր Ղամբարյանը ավելի վաղ լրագրողների հետ հանդիպմանն ասել էր, որ ըստ ՔԿ ներքին անվտանգության վարչություն ներկայացված զեկուցագրի՝ դեպքի պատճառը եղել է այն, որ դատախազը, ըստ նախնական տվյալների, որևէ գործի քննարկման ժամանակ բանավոր ցուցում է տվել քննիչին, իսկ քննիչը չի համաձայնել այդ բանավոր ցուցումը կատարել՝ ասելով, որ գրավոր ներկայացնեն, քանի որ օրենքի պահանջ է: Այստեղից էլ վիճաբանություն է ծագել:

Միևնույն ժամանակ Ղամբարյանը նաև նշել էր, որ դատախազներն իրավասու չեն քննիչներին բանավոր ցուցումներ տալու, դա բացասական է ազդում նախաքննական մարմնի քննության վրա, օրենքի հստակ պահանջ է՝ դատախազ պարտավոր է ցուցում տալ գրավոր, որպեսզի քննիչը նաև բողոքարկելու իրավունք ունենա, իսկ երբ բանավոր ես ասում, դա լիազորություններից որոշակիորեն շեղում է:

Միևնույն ժամանակ Ղամբարյանը նշել էր՝ այստեղ քրեաիրավական գնահատական տալուց պետք է հասկանալ, որ ոչ թե մասնավոր վեճ է անձերի միջև, այլ դատավարական գործողությունն օրենքի պահանջով չի կատարվել, ինչի հետևանքով էլ տեղի է ունեցել վիճաբանությունը:

Աղբյուր` Փաստինֆո