Փաստ ինֆո

Մարաշի զինված խմբի գործով այսօրվա դատական նիստում դատարանը մերժեց փաստաբան Նարինե Ռշտունու միջնորդությունը իր պաշտպանյալ Հարություն Սարիբեկյանի կալանավորումը փոխելու կամ նրա նկատմամբ գրավ կիրառելու մասին:

Պաշտպանը հայտնեց, որ իր պաշտպանյալը կալանքի տակ է գտնվում 2015թ. դեկտեմբերի 3-ից, այսինքն՝ 2 տարի 4 ամիս: Դատարանը գործը վարույթ ընդունելիս անփոփոխ է թողել կալանավորումը՝ նշելով, որ չի վերացել դրա անհրաժեշտությունը: Պաշտպանական կողմը, սակայն, գտնում է, որ վերացել են կալանավորման պայմանները: Նարինե Ռշտունին նշեց, որ ամբաստանյալը ունի մշտական բնակության վայր, ընտանիք ու երեխաներ, արցախյան պատերազմի մասնակից է, երկրորդ կարգի հաշմանդամ, վերջին ամիսներին վատթարացել է նրա առողջական վիճակը, նա ազատության մեջ գտնվելով միայն կկարողանա անհրաժեշտ բուժում ստանալ քաղաքացիական հիվանդանոցում:

Մեղադրողը առարկեց միջնորդության դեմ՝ թվարկելով ամբաստանյալի մեղադրանքի հոդվածները և կասկած հայտնելով, որ նա ազատության մեջ հայտնվելով կարող է նոր հանցանք կատարել ու խոչընդոտել, անօրինական ազդեցություն ունենալ անձանց վրա:

Ամբաստանյալ Արթուր Վարդանյանի պաշտպան Լևոն Բաղդասարյանը հայտարարեց, որ նման բաներ հայտարարելուց առաջ ցանկալի է, որ մեղադրողը գոնե մի քիչ տիրապետի ինֆորմացիային: Ըստ պաշտպանի, պետական լիազոր մարմինը մարդկանց պահում է կալանքի տակ, որ նրանց մեջ սպանի հայրենիքը, կոտրի ըմբոստ ոգին ու որպեսզի այլոց համար դա մեսիջ լինի՝ ահա թե ինչ կլինի իրենց հետ, եթե իրենք էլ ըմբոստանան: Նրա պաշտպանյալն իր հերթին հավելեց՝ եթե մեղադրողը նույն բանն ասի, թող չգա:

Ամբաստանյալ Խաչիկ Ավետիսյանը հայտարարեց, որ ստանդարտ մեղադրանքներ են, նախաքննության ժամանակ որևէ գործողություն չեն կատարել, հիմնվել են մեկ անձի ցուցմունքի վրա, ով ազատության մեջ է:

Դատարանը մերժեց նաև փաստաբան Սիրուշ Աղվանյանի միջնորդությունը: Պաշտպանը նորից բարձրացրեց քրեական գործի քննությունն ԱԱԾ-ին հանձնարարելու որոշման օրինականության հարցը: Ըստ նրա, այդ որոշումը կայացվել է ոչ իրավասու անձի՝ գլխավոր դատախազի տեղակալ Արմեն Հարությունյանի կողմից: Թեև ի պատասխան դատարանի հարցման դատախազությունը հայտնել էր, որ այդ որոշման կայացման ժամանակահատվածում՝ 2015թ. նոյեմբերի 24-28-ը, Արմեն Հարությունյանը եղել է Գլխավոր դատախազի պաշտոնակատար, սակայն դա հերքվում է մամուլի հաղորդագրությամբ, ըստ որի նոյեմբերի 27-ին ՀՀ նախագահն ընդունել է ՀՀ գլխավոր դատախազ Գևորգ Կոստանյանին, ուստի ըստ պաշտպանի, դատախազության պատասխանը կեղծիք է պարունակում: Պաշտպանը միջնորդեց դադարեցնել իր պաշտպանյալներ Արթուր Վարդանյանի ու Անտոն Թոթոնջյանի քրեական հետապնդումն ու հաշվեհարդարը:

Դատարանում շարունակվեց գործի գրավոր նյութերի հետազոտումը: Մասնավորապես, հետազոտվեց գործում որպես մեղադրյալ ներգրավված անձանց հեռախոսային խոսակցությունների ձայնագրություններով ու լուսանկարներով լազերային սկավառակների զննության արձանագրությունը: Գործով ամբաստանյալ, ՀՀ նախկին փոխվարչապետ, Պաշտպանության նախկին փոխնախարար Վահան Շիրխանյանի պաշտպան Հայկ Ալումյանը հայտարարեց, որ ըստ արձանագրության, հեռախոսային խոսակցությունները զննվել են չորսուկես ժամ, թեև դրանց տևողությունը վեց ժամ է, արձանագրությունն իրականությանը չի համապատասխանում, ասաց Հ.Ալումյանը:

Վաղը դատարանում կհետազոտվեն լազերային սկավառակներն ինքնին:

Աղբյուր` Փաստինֆո