Փաստ ինֆո

«Դոդիկ» արտահայտության համար ուսանողի սպանության, մեկ այլ ուսանողին միջին ծանրության վնասվածք պատճառելու գործով այսօր հետազոտվեցին գործի գրավոր ու իրեղեն ապացույցները:

Գործը սկզբնապես հարուցվել է ՀՀ քրեական օրենսգրքի 104-րդ հոդվածի առաջին մասի և 112-րդ հոդվածի առաջին մասի, այն է՝ սպանության և դիտավորյալ առողջությանը ծանր վնաս պատճառելու հատկանիշներով, սակայն հետագայում, երբ որ ճշտվել էր գործով երկրորդ տուժողի վնասվածքների աստիճանը, մեղադրյալի նկատմամբ առաջադրված մեղադրանքը փոփոխվել էր ու նոր մեղադրանք էր առաջադրվել ՀՀ քրեական օրենսգրքի 104-րդ հոդվածի առաջին մասի և 113-րդ հոդվածի առաջին մասի, այն է՝ սպանություն և դիտավորյալ առողջությանը միջին ծանրության վնաս պատճառելը, հատկանիշներով:

Ըստ գործում առկա բնակության վայրից ներկայացված բնութագրի, ամբաստանյալը մասնակցել է քառօրյա պատերազմին, Թալիշի պաշտպանությանը, նշվում է նաև նրա երաժշտական բարձր ունակությունների ու մարդկային դրական որակների մասին: Բնությունը Կ.Չատիկյանին ստեղծել է ամենաանաղարտ ձևով, ասվում է բնութագրում: Իսկ ըստ Երևանի պետական համալսարանի բնութագրի, նա ցածր առաջադիմություն է ունեցել, քառօրյա պատերազմին մասնակցելու համար նրա ուսման վարձը զեղչվել է 50%-ով:

Սպանված տուժող Վահե Մուրադյանի վերաբերյալ ԵՊՀ կողմից տրված բնութագրով նա ցուցաբերել է բարձր առաջադիմություն, աչքի է ընկել համեստությամբ ու խելացիությամբ, հարգանքով է վերաբերվել շրջապատին, նույնպիսի վերաբերմունք ստացել շրջապատի կողմից:

Ըստ դատահոգեբուժական փորձաքննության եզրակացության, ամբաստանյալը նախկինում չի տառապել ու չի տառապում հոգեկան հիվանդությամբ, կարող է ղեկավարել իր գործողությունները, մեղսունակ է:

Ամբաստանյալի պաշտպան Երեմ Սարգսյանը հայտարարեց, որ թեև գործում կա հիշատակում իր պաշտպանյալի հագուստների առգրավման մասին, սակայն գործում դրանք առկա չեն: Մեղադրողը պարզաբանեց, որ հագուստը իրեղեն ապացույց չի ճանաչվել, այդ իսկ պատճառով մնացել է նախաքննական մարմնի մոտ: Դատարանը բավարարեց պաշտպանական կողմի միջնորդությունը այն նախաքննական մարմնից պահանջելու մասին:

Նշենք, որ դատարանում հետազոտվեցին տուժողների հագուստները, որոնք իրեղեն ապացույցներ են ճանաչվել:

Դատական նիստում հետազոտվեց նաև իրեղեն ապացույց ճանաչված «բաբոչկա» տեսակի դանակը, ամբաստանյալը հաստատեց, որ դա իր դանակն է:

Պաշտպան Երեմ Սարգսյանը հայտարարեց, որ անկախ այն բանից դատարանն իր պաշտպանյալին մեղավոր կճանաչի, թե ոչ, իրենք ընդունում են, որ տուժողի մահը պատճառվել է ամբաստանյալի գործողությունների հետևանքով, ուստի և ամբաստանյալը պարտավորություն ունի հատուցել պատճառված վնասը, սակայն գումարի չափի մասին իրենց դիրքորոշումը կհայտնեն հետագայում: Հիշեցնենք, որ տուժողը քաղհայցով միջնորդել է հատուցել վնասը 4 մլն դրամի չափով:

Հաջորդ դատական նիստում ցուցմունք տալու իր իրավունքից ըստ ամենայնի կօգտվի ամբաստանյալը:

Հիշեցնենք, որ ըստ մեղադրանքի, Կարեն Չատիկյանը 2017թ, հունվարի 11-ին Երևան քաղաքի Վարդանանց փողոցի թիվ 28 շենքի բակում գտնվող բացօթյա տաղավարում տեղի ունեցած վիճաբանության ընթացքում իր մոտ եղած դանակով հարվածել է Ռաֆի Մարտիրոսյանին և Վահե Մուրադյանին, ինչի հետևանքով Ռ. Մարտիրոսյանի առողջությանը դիտավորությամբ պատճառել է միջին ծանրության վնաս, իսկ Վ. Մուրադյանին ապօրինաբար դիտավորությամբ զրկել կյանքից:

Աղբյուր` Փաստինֆո