Փաստ ինֆո

ՀՀ տարածքային կառավարման և զարգացման նախարարությունը համագործակցելու է «ՓՄՁ Համագործակցության Ասոցիացիա» հասարակական կազմակերպության և  «Ուրբան» կայուն զարգացման հիմնադրամի հետ՝ հայեցակարգային, ռազմավարական և իրավական փաստաթղթերի և զարգացման ծրագրերի մշակման, վերապատրաստման  ծրագրերի  իրականացման  գործընթացներում: Այս մասին տեղեկացնում է Նախարարության լրատվական ծառայությունը:

ՀՀ  տարածքային կառավարման և զարգացման նախարարի տեղակալ Վարազդատ Կարապետյանը, «ՓՄՁ Համագործակցության Ասոցիացիա» ՀԿ-ի  տնօրեն Հակոբ Ավագյանը  և «Ուրբան» կայուն զարգացման հիմնադրամի  գործադիր տնօրեն Նունե Ղազախեցյանն այսօր   ստորագրել  են    համագործակցության  հուշագրեր:

Մասնավորապես, «ՓՄՁ համագործակցության ասոցիացիա» ՀԿ-ն կաջակցի ՀՀ մարզերի խոշորացված և խոշոր համայնքների տնտեսական զարգացման հարցերով պատասխանատուներին`կազմակերպելով  սեմինարներ  «Ձեռնարկատիրության գրանցում», «Հարկման դաշտի ընտրություն, հարկային օրենսդրության տարրական իմացություն» և այլ թեմաներով:Անհրաժեշտության դեպքում  կտրամադրի անվճար խորհրդատվություն:

Մեկ այլ հուշագրով «Ուրբան»  հիմնադրամը`  վարչատարածքային բարեփոխումների արդյունքում ձևավորված նորաստեղծ ՏԻՄ-երի կարողությունների զարգացման նպատակով, կաջակցի նախարարության բարեփոխումներին և զարգացման ծրագրերին, հանրային կառավարման ոլորտում լավագույն պրակտիկայի ներդրմանը:

Փոխնախարար Վ.Կարապետյանը կարևորել է փոխգործակցության հաստատումը, ընդծելով, որ համագործակցության համար ընտրված թիրախներն այսօր խիստ արդիական են նախարարության համար, հատկապես` խոշորացված և խոշոր համայնքների տնտեսական զարգացման հարցերով պատասխանատուների վերապատրաստումը: 

«Կառավարությունը փոխում է համայնքների հետ շփվելու լեզուն, բառապաշարը և ծրագրերի լեզվով է ուզում խոսել, այսինքն` աննպատակ միջոցների հատկացման ռազմավարությունն արդեն փոխվում է ծրագրերով, արդյունքային, ելքային ցուցանիշներով: Մենք պետք է կարողանանք համայնքների տնտեսական զարգացման ընդհանուր ռազմավարություն մշակել, կազմել ծրագրեր և ներկայացնել գործադիր մարմին։ Իսկ այդ նպատակին հասնելու համար անհրաժեշտ է տնտեսական պատասխանատուների մասնագիտական կարողությունները  զարգացնել,  և դրան է միտված այս հուշագրերի ստորագրումը»,- ասել է Վ. Կարապետյանը՝ հավելելով, որ առաջիկայում  համագործակցային կապեր կհաստատվեն նաև այլ կազմակերպությունների հետ:

Աղբյուր` Փաստինֆո