Փաստ ինֆո

Կաշառք ստանալու մեջ մեղադրվող Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի նկատմամբ այսօր դատարանը սանկցիա կիրառեց՝ նախազգուշացման կարգով:

Բանն է, որ Բարսեղյանն այսօր ևս դատական նիստին չէր ներկայացել և գրությամբ դատարանին հայտնել է, որ ի վիճակի չէ դատարան ներկայանալ:

Միևնույն ժամանակ, «Դատապարտյալների հիվանդանոց» ՔԿՀ-ից տեղեկանք էր ստացել դատարանը, որում նշում էր, որ Բարսեղյանն ինքնուրույն կարողանում է տեղաշարժվել:

Հիշեցնենք, որ Իշխան Բարսեղյանն առողջական խնդիրներ ունի, այդ թվում նաև՝ բարձ զարկերակային ճնշում:

Հարցի վերաբերյալ դատախազը կարծիք հայտնեց, որ տևական ժամանակ է դատաքննությունը ձգձգվում է Բարսեղյանի բացակայության պատճառով, և դատարանին խնդրեց միջոցներ ձեռնարկել՝ Բարսեղյանի ներկայությունն ապահովվելու ուղղությամբ:

Նախագահող դատավոր Վաչե Մարգարյանն ընդգծեց՝ փետրվարի 1-ից սկսած 5 դատական նիստ չի կայացել, և Բարսեղյանի կողմից գրություններ են ուղղվել դատարանին՝ իր առողջական վիճակով պայմանավորված նիստերին չներկայանալու մասին. նման պայմաններում խոչընդոտվում է գործի քննությունը:

Դատարանը սանկցիա կիրառեց նախազգուշացման տեսքով և նաև զգուշացրեց, որ կարող է ավելի խիստ դատական սանկցիա կիրառել՝ հաշվի առնելով արդար դատաքննության շահը:

Դատական նիստը հետաձգվեց և նշանակվեց մարտի 22-ին:

Ըստ մեղադրանքի՝ 2016թ. հոկտեմբերի 27-ին` ժամը 19.35-ին, Երևան քաղաքի Արշակունյաց պողոտայի և Գարեգին Նժդեհի փողոցի խաչմերուկի գետնանցումում դատավոր Իշխան Բարսեղյանը հանդիպել է քաղաքացուն և վերջինիցս անձամբ ստացել 1000 ԱՄՆ դոլարը:

Իսկ հոկտեմբերի 28-ին` ժամը 01.45-ին դատավոր Իշխան Բարսեղյանը ձերբակալվել է խոշոր չափերով կաշառք ստանալու կասկածանքով:

Այսպիսով, ԱԱԾ-ի կողմից օպերատիվ օպերատիվ-հետախուզական միջոցառման արդյունքում Հատուկ քննչական ծառայությունը հարուցել է քրեական գործ, որի շրջանակներում դատավոր Իշխան Բարսեղյանին մեղադրանք է առաջադրվելով ՀՀ քրեական օրենսգրքի 311-րդ հոդվածի 4-րդ մասի 3-րդ կետով:

Ելնելով դատավորի կարգավիճակից, որ նա կարող է որոշակի ազդեցություն ունենալ մինչդատական վարույթում գործի օբյեկտիվ քննության վրա նախաքննական մարմնի կողմից դատավորի նկատմամբ խափանման միջոց կալանավորումն ընտրելու վերաբերյալ միջնորդությունը բավարարվել է:

Քրեական գործով մեղադրանք է առաջադրվել նաև փաստաբան Էլզա Զաքարյանին՝ ՀՀ քրեական օրենսգրքի 313-րդ հոդվածի 1-ին մասով, և նրա նկատմամբ որպես խափանման միջոց կիրառվել՝ չհեռանալու մասին ստորագրությունը:

Լուսանկարը՝ Hetq.am-ի

Աղբյուր` Փաստինֆո