Փաստ ինֆո

Հատուկ քննչական ծառայությունում քննվող առանձնապես խոշոր չափերով կաշառք ստանալու, ինչպես նաև պաշտոնեական լիազորությունները չարաշահելու գործի շրջանակներում կալանավորվել է ՔԿ ՀԿԳ քննության գլխավոր վարչության քննիչ Արտակ Հովհաննիսյանը:

«Փաստինֆո»-ի այս տեղեկությունը հաստատեցին նաև Հատուկ քննչական ծառայութունից՝ հայտնելով, որ գործի շրջանակներում կալանավորվել է ևս մեկ քննիչ:

Այս գործի շրջանակներում կալանավորված են ՀՀ Քննչական կոմիտեի Լոռու մարզի Քննչական վարչության նախկին պետ Թաթուլ Շուշանյան և նույն վարչության մեկ այլ քննիչ:

Ավելի վաղ տեղեկացրել էինք, որ Քննչական կոմիտեն հայտարարել էր, որ բազմակողմանի քննության արդյունքում տվյալներ են ստացվել առ այն, որ սպանությունը պատվիրելու մեջ մեղադրվող Վահագն Աբգարյանի և սպանությունը կատարելու մեջ մեղադրվող Վլադիմիր Դավթյանի օգտին ապօրինի գործողություններ կատարելու համար պետական հատուկ ծառայություն իրականացնող ՀՀ քննչական կոմիտեի պաշտոնատար անձանցից մեկն իր լիազորությունների շրջանակներում ստացել է առանձնապես խոշոր չափերի կաշառք, իսկ մի շարք այլ պաշտոնատար անձինք, շահադիտական և անձնական այլ շահագրգռվածությունից ելնելով, իրենց պաշտոնեական դիրքն օգտագործել են ծառայության շահերին հակառակ:

Նշված քրեական գործով բազմակողմանի քննության արդյունքում տվյալներ են ստացվել՝ ՔԿ առանձին ծառայողների կողմից այդ քրեական գործով թույլ տրված հնարավոր չարաշահումների վերաբերյալ, և դրանց հիման վրա քննչական կոմիտեում հարուցվել է քրեական գործ, որն ուղարկվել է ՀՔԾ:

Գլխավոր դատախազությունն էլ տեղեկացրել էր, որ Վ.Աբգարյանից առանձնապես խոշոր չափերով կաշառք ստանալու և պաշտոնեական լիազորությունները չարաշահելու համար ՀՀ քննչական կոմիտեի ծառայողին նախօրեին ՀՀ քրեական օրենսգրքի 311-րդ հոդվածի 4-րդ մասի 2-րդ կետով և 308-րդ հոդվածի 1-ին մասով մեղադրանք է առաջադրվել:

Դատարանի որոշմամբ նրա նկատմամբ որպես խափանման միջոց է կիրառվել կալանավորումը:

Մեր տեղեկություններով՝ Արտակ Հովհաննիսյանը աշխատանքից ազատվել էր դեռևս ամիսներ առաջ ինչի մասին ավելի վաղ հայտնել էր նաև Քննչական կոմիտեն:

Աղբյուր` Փաստինֆո