Փաստ ինֆո

Սահմանադրական դատարանն այսօր որոշեց Գյումրիում Ավետիսյանների ընտանիքի անդամների դաժան սպանության գործի հետ կապված դիմումի քննությունը հետաձգել մինչև մարտի 16-ը: ՍԴ-ն հայտնեց, որ հետաձգման պատճառը մեկն է՝ գործի հետ կապված պրակտիկան լրացուցիչ ուսումնասիրելու անհրաժեշտությունը:

Նշենք, որ դատարանում գործը քննվում է գրավոր ընթացակարգով, դատարանը հեռացել էր որոշում կայացնելու և խորհրդակցական սենյակում կայացրել էր հիշյալ որոշումը:

Տուժողների իրավահաջորդներ Լուսինե Ավետիսյանը, Անահիտ Կոշտոյանը, Անդրանիկ Պողոսյանը, Նարինե Պողոսյանը (ներկայացուցիչ Արամազդ Կիվիրյան) դիմել էին Սահմանադրական դատարան՝ խնդրելով որոշել ՀՀ քրեական դատավարության օրենսգրքի 60-րդ հոդվածի (Քաղաքացիական հայցվորը) 1-ին մասի, 154-րդ հոդվածի (Քաղաքացիական հայցի քննության ընթացքում կիրառվող օրենսդրությունը), 158-րդ հոդվածի (Քաղաքացիական հայցի հարուցումը) 2-րդ մասի, 159-րդ հոդվածի (Հայցադիմում ընդունելուց հրաժարվելը)՝ ՀՀ Սահմանադրությանը համապատասխանության հարցը:

Ըստ դիմողների, կյանքի իրավունքի խախտման հիմքով բարոյական վնասի հատուցման պահանջով իրենց քաղհայցը քննության առարկա չդարձնելու վերաբերյալ կայացված դատական ակտերն ուղղակիորեն առնչվում են դատարանի մատչելիության իրավունքի իրացման ընթացքին և ենթակա են բողոքարկման վերադասության կարգով՝ հաշվի առնելով և կարևորելով դատական լիարժեք պաշտպանության իրավունքը:

Հետևաբար, նման որոշումները բողոքարկելու իրավունքից զրկելը պետք է դիտվի որպես ոչ իրավաչափ:

Դիմողները մատնանշել են, որ ՀՀ քաղաքացիական դատավարության օրենսգիրքը նախատեսում է հայցադիմումը վերադարձնելու կամ հայցադիմումի ընդունումը մերժելու մասին որոշումների՝ վերադասության կարգով բողոքարկման հնարավորություն: Տվյալ պարագայում, դիմողների կարծիքով, անհասկանալի է օրենսդրի տարբերակված մոտեցումը քրեական դատավարության շրջանակներում քաղաքացիական հայցվորին հայցադիմումի մերժման որոշումը վերաքննության կարգով բողոքարկելու հնարավորությունից զրկելու
առումով:

Ըստ դիմողների, իրենց նկատմամբ կիրառված ՀՀ քրեական դատավարության օրենսգրքի 376.1 հոդվածը (Առաջին ատյանի դատարանի դատական ակտերի բողոքարկումը), չնախատեսելով և չընձեռելով անձին դատական ակտը բողոքարկելու հնարավորություն, ինչպես նաև կախված այն հանգամանքից, թե դատավարական ինչ կարգով է անձը ներկայացրել հայցը, տարբերակված մոտեցում է ցուցաբերում խախտված իրավունքների վերականգնման համար նախատեսված ինստիտուտի նկատմամբ` մի դեպքում անձին հնարավորություն ընձեռելով բողոքարկելու դատարանի որոշումը, իսկ մեկ այլ դեպքում՝ ոչ, ինչպիսի պայմաններում չի ապահովվում իրավունքի սուբյեկտի իրավունքների լիարժեք իրացման հնարավորությունը:

«Փաստինֆո»-ի լրագրողի հետ զրույցում դիմողների ներկայացուցիչ Արամազդ Կիվիրյանը նշեց, որ ակնկալիքն, ինչպես միշտ, արդար դատական ակտի կայացումն է:

«Կապված ՍԴ որոշումից՝ մեր հետագա գործողությունները նույնպես կուրվագծվեն»,- ասաց Ա.Կիվիրյանը՝ պարզաբանելով, որ եթե հաստատվի, որ կողմը հանիրավի զրկված է եղել ոչ նյութական վնասի հատուցման մասին պահանջ ներկայացնելու հնարավորությունից, դա հիմք կհանդիսանա իրենց համար վերանայման վարույթ հարուցելու համար: Իսկ եթե Սահմանադրական դատարանը արձանագրի, որ տվյալ դեպքում այդ առումով որևէ խախտում չկա, ուստի տուժող կողմը չի կարողանա վերանայման վարույթ հարուցել, ուստի կքննարկվի, թե ինչպիսի հետագա քայլեր իրենք կարող են իրականացնել: «Տեսնենք ինչպիսի որոշում կկայացվի, ըստ այդմ կձեռնարկենք համապատասխան քայլեր»,- ասաց Արամազդ Կիվիրյանը:

Աղբյուր` Փաստինֆո