Փաստ ինֆո

Դատապարտյալի կողմից «Արմավիր» ՔԿՀ-ի օպերատիվ բաժնի գլխավոր մասնագետին կաշառք տալու գործով մեղադրական դատավճիռ է կայացվել:

30-ամյա Արմեն Մամիկոնյանը նախկինում մի քանի անգամ դատապարտված է եղել վերջին անգամ էլ դատապարտվել է 2011թ. 10-ը տարի ժամկետով ազատազրկման՝ ԼՂՀ քրեական օրենսգրքի 104-րդ հոդվածի 1-ին մասով՝ հոգեկան խիստ հուզմունքի վիճակում սպանություն կատարելու համար:

Ինչպես տեղեկանում ենք Դատական տեղեկատվական համակարգից՝ Արմեն Մամիկոնյանը 2015 թվականից պատիժը կրում է «Արմավիր» ՔԿՀ-ում: 2016թ. դեկտեմբերի վերջին իր ծանոթ, նույն հիմնարկի օպերատիվ բաժնի գլխավոր մասնագետ Կարեն Պետրոսյանին խնդրել է ՔԿՀ արգելված իր ներս մտցնել՝ 3 հատ բջջային հեռախոս:

Կարեն Պետրոսյանն էլ առիթը բաց չի թողել՝ լրացուցի գումար վաստակելու և դատապարտյալի խնդրանքը կատարելու դիմաց պահանջել է 300 ԱՄՆ դոլար գումար, որից 90.000 ՀՀ դրամը բջջային հեռախոսներ ձեռք բերելու համար, իսկ մնացած գումարը` 54.204 ՀՀ դրամը՝ որպես կաշառք` հեռախոսները քրեակատարողական հիմնարկ ներս մտցնելու և դատապարտյալին փոխանցելու դիմաց։

Սակայն դատապարտյալը ԱՄՆ-ում գտնվող հոր հետ հեռախոսազանգ ունենալուց հետո Պետրոսյանին ասել է, թե կարող է ընդամենը 250 դոլար տալ։

Կաշառքի շուրջ պայմանավորվածություն ձեռքբերելուց հետո դատապարտյալը խնդրել է հորը ԱՄՆ-ից բանկային փոխանցման միջոցով Կարեն Պետրոսյանի մատնանշած անձի` վերջինիս կնոջ ազգականի անվամբ ուղարկել 250 ԱՄՆ դոլար:

Այդպես էլ եղել է՝ գումարը փոխանցվել է 2017թ. հունվարի 3-ին: Կանխիկացված գումարից Կարեն Պետրոսյանը 60.000 -ով ձեռք է բերել «Միկրոմաքս» մոդելի թվով 2 բջջային հեռախոսներ, իսկ 61.177,5 ՀՀ դրամ գումարը պահել է իրեն։

ՔԿՀ աշխատակիցը ձեռքբերված 2 բջջային հեռախոսները փոխանցել է դատապարտյալին:

Դատարանում Արմեն Մամիկոնյանը իրեն առաջադրված մեղադրանքը չի ընդունել, նշել է, որ մեղադրական եզրակացությունում նկարագրված բոլոր գործողությունները ինքը կատարել է, սակայն ինքը որևէ հանցանք չի կատարել, չի իմացել կամ հասկացել, որ իր գործողությունները դիտվում են որպես կաշառք տալ, ինքը որևէ մեկի կաշառք չի տվել, այլ գնել է հեռախոսները, ինչպես անում են բոլոր դատապարտյալները։

Դատապարտյալը նշել, որ հեռախոսը իրեն անհրաժեշտ է եղել ընտանիքի հետ կապ հաստատելու համար:

Դատարանն արձանագրել է, որ Մամիկոնյանի այս պատճառաբանույունները անհիմն են և պատասխանատվությունից ու պատժից խուսափելու նպատակ են հետապնդում:

Նախաքննության ընացքում նա հայտնել է, որ ԼՂՀ-ում դատապարտվել է 10 տարի ժամկետով ազատազրկման, 2015թ. էտապավորվել է ՀՀ և պատիժ է կրել «Արմավիր» քրեակատարողական հիմնարկում։

2016թ. դեկտեմբերին ՔԿՀ աշխատակիցները խուզարկել են իր խուցը և առգրավել իր կողմից օգտագործվող բջջային հեռախոսը, ինքն էլ այդ մասին տեղեկացրել է Կարեն Պետրոսյանին և խնդրել է բջջային հեռախոս բերել իր համար կամ էլ օգնել հետ ստանալ առգրավված բջջային հետախոսը։

Կարեն Պետրոսյանն էլ ՔԿՀ է բերել թվով 3 բջջային հեռախոսներ և փոխանցել է իրեն ու հեռախոսների դիմաց պահանջել է 120.000 ՀՀ դրամ գումար, որին ինքը համաձայնվել է:

Ընդ որում այդ հեռախոսներից մեկը դատապարտյալը վաճառել է մեկ այլ դատապարտյալի: Իր մոտ եղած հեռախոսները տեսել են նաև այլ դատապարտյալներ և խնդրել են որպեսզի իրենց համար էլ բջջային հեռախոսներ ձեռք բերի և այդ հարցով կրկին դիմել է Կարեն Պետրոսյանին, ով իր խնդրանքը կատարելու և 3 բջջային հեռախոսներ ներկրելու համար իրենից պահանջել է 300 ԱՄՆ դոլար:

Ի վերջո դատապարտյալին հաջողվել է սակարկել՝ և Պետրոսյանը համաձայնվել է ՔԿՀ 3 հեռախոս ներս մտցնելու դիմաց գործը կատարել 250 դոլարով:

ատական ակտում նշվում է, որ հեռախոսների արժեքը եղել է 30 հազար դրամ, իսկ մնացած գումարը ՔԿՀ աշխատակիցը՝ պահել է իրեն կատարած աշխատանքի դիմաց:

Դատապարտյալը նախաքննության ժամանակ նաև հայտնել է, որ երբ հաղորդում է ներկայացրել Կարեն Պետրոսյանի ապօրինի գործողությունների վերաբերյալ, վերջինս բազմիցս զանգահարել է իրեն և խնդրել է հետ վերցնել ներկայացված բողոքը, որի դիմաց նաև գումար է առաջարկել իրեն:

Այսպիսով, Արմեն Մամիկոնյանը մեղավոր է ճանաչվել ՀՀ քրեական օրենսգրքի 312-րդ հոդվածի 1-ին մասով և դատապարտվել է 1 տարի 6 ամիս ժամկետով ազատազրկման։

Սակայն նշված պատիժը գումարվել է ԼՂՀ ընդհանուր իրավասության դատարանի նշանակված պատժի չկրած մասին և վերջնական պատիժ է նշանակվել 3 տարի 9 ամիս 4 օր ժամկետով:

Աղբյուր` Փաստինֆո